କୋକସରା,୨୧।୬(ଡି.ଏନ୍.ଏ.): ନାବାଳିକାକୁ ବିବାହର ପ୍ରଲୋଭନ ଦେଖାଇ ଅପହରଣ କରିଥିବା ଅଭିଯୋଗରେ କଳାହାଣ୍ଡି ଜିଲା କୋକସରା ଥାନା ପୋଲିସ ଜଣେ ଯୁବକଙ୍କୁ ଆନ୍ଧ୍ରପ୍ରଦେଶ ୱେଷ୍ଟ ଗୋଦାବରୀ ଏଲୁରରୁ ଗିରଫ କରି କୋର୍ଟ ଚାଲାଣ କରିଛି। ପୋଲିସ ନାବାଳିକାଙ୍କୁ ଉଦ୍ଧାର କରିଛି। ଗିରଫ ଯୁବକ ହେଲେ ଲଡୁଗାଁର ବାଲେଶ୍ୱର ବାଗ(୨୬)।
ଅଭିଯୋଗ ମୁତାବକ, କୋକସରା ବ୍ଲକ ଲଡୁଗାଁର ବାଲେଶ୍ୱର ଜଣେ ନାବାଳିକାକୁ ପ୍ରେମ ଜାଲରେ ଫସାଇ ଗତ ୨୭।୦୪।୨୨ରେ ଅପହରଣ କରି ଆନ୍ଧ୍ରପ୍ରଦେଶର ୱେଷ୍ଟ ଗୋଦାବରୀ ଏଲୁରକୁ ନେଇ ଯାଇଥିଲେ। ଏ ନେଇ ନାବାଳିକାଙ୍କ ବାପା ଗତ ୨୯।୦୪।୨୨ରେ କୋକସରା ଥାନାରେ ଏତଲା ଦେଇଥିଲେ। ଏପରି କି ଝିଅକୁ ଉଦ୍ଧାର ପାଇଁ ନିବେଦନ କରିଥିଲେ। ପୋଲିସ ଘଟଣାର ତଦନ୍ତ ଆରମ୍ଭ କରିଥିଲା। ବାଲେଶ୍ୱରଙ୍କ ମୋବାଇଲ ଟ୍ରାକିଂ କରି ମାମଲାର ତଦନ୍ତ ଅଧିକାରୀ ହେମନ୍ତ କୁମାର ପାତ୍ରଙ୍କ ନେତୃତ୍ୱରେ ପୋଲିସର ଏକ ଟିମ୍ ଏଏସଆଇ ମନୋରଞ୍ଜନ ଆଚାର୍ଯ୍ୟ ଏବଂ ମହିଳା କନଷ୍ଟେବଲ ଭୁବନେଶ୍ୱରୀ ମାଝି ଗତ ୧୮।୦୬।୨୨ରେ ଆନ୍ଧ୍ରପ୍ରଦେଶ ଏଲୁରରୁ ନାବାଳିକାଙ୍କ ସହ ବାଲେଶ୍ବରଙ୍କୁ ଗିରଫ କରି କୋକସରା ଥାନାକୁ ଆଣିଥିଲା। ନାବାଳିକାଙ୍କୁ ଅପହରଣ ଓ ଶାରୀରିକ ଶୋଷଣ ମାମଲାରେ ପୋଲିସ ଏକ ମାମଲା(ନଂ.୯୫/୨୨) ରୁଜୁ କରି ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିବା ଥାନା ପକ୍ଷରୁ କୁହାଯାଇଛି।
