ବମ୍ବେ,୯।୮: କେସ୍ ନଂ ୧୬୬। ଏକ ୭ ବର୍ଷୀୟ ନାବାଳିକାର ନିଖୋଜ ହେବାର ଏହି ମାମଲା ଏବେ ଚର୍ଚ୍ଚାରେ। କାରଣ ବମ୍ବେର ଜଣେ ପୋଲିସ ଅଫିସର ନିଜ ଚାକିରିକାଳ ସମୟରେ ୧୬୫ ନିଖୋଜ ପିଲାଙ୍କୁ ଖୋଜିଥିଲେ ହେଁ ୧୬୬ ନଂ କେସ୍ରେ ତାହା କରିପାରି ନ ଥିଲେ। ୨୦୧୩ରେ ଉକ୍ତ ନାବାଳିକାଙ୍କୁ ଅପହରଣ କରାଯାଇଥିବା ବେଳେ ସେ ୨୦୨୨ରେ ନିଜ ଘରକୁ ଫେରିଛନ୍ତି। ହେଲେ ଏହା ପଛର କାହାଣୀ କୌଣସି ଫିଲ୍ମଠାରୁ କମ୍ ନୁହେଁ।
ବମ୍ବେର ଅନ୍ଧେରୀ ଓ୍ବେଷ୍ଟ ଅଞ୍ଚଳରେ ରହୁଥିବା ସନ୍ତୋଷ ଗୌଡ଼ଙ୍କ ୭ ବର୍ଷୀୟ ଝିଅ ପୂଜା ଭାଇ ସହ ସ୍କୁଲକୁ ଯାଉଥିଲେ। ବାଟରେ ଆଇସ୍କ୍ରିମ୍କୁ ନେଇ ଉଭୟଙ୍କ ମଧ୍ୟରେ ଝଗଡ଼ା ହୋଇଥିଲା। ଫଳରେ ସେ ଭାଇଠାରୁ ଦୂରରେ ଚାଲିଥିଲେ। ଏହାର ଫାଇଦା ଉଠାଇ ଏକ ଦମ୍ପତି ତାଙ୍କୁ ଆଇସକ୍ରିମ ଦେବା ବାହାନାରେ ଅପହରଣ କରିନେଇଥିଲେ। ଉକ୍ତ ଦମ୍ପତିଙ୍କର ସନ୍ତାନ ନ ଥିବାରୁ ସେ ପୂଜାଙ୍କୁ ପାଳିତ କନ୍ୟା କରିବାକୁ ଇଚ୍ଛା ରଖିଥିଲେ। ହେଲେ ଧିରେ ଧିରେ ପୂଜାଙ୍କ ସହ ଉକ୍ତ ଦମ୍ପତି ଚାକରାଣି ଭଳି ବ୍ୟବହାର କରିଥିଲେ। ତାଙ୍କ ଦ୍ୱାରା ଘରର ସମସ୍ତ କାମ କରିଥିଲେ। ମାର୍ପିଟ୍ ମଧ୍ୟ କରିଥିଲେ। ପରବର୍ତ୍ତୀ ସମୟରେ ଦମ୍ପତିଙ୍କର ନିଜର ସନ୍ତାନ ଜନ୍ମ ନେଇଥିଲା। ଏହାପରେ ପୂଜାଙ୍କ ଉପରେ ଅତ୍ୟାଚାର ବଢ଼ି ଯାଇଥିଲା। ସେମାନେ ତାଙ୍କୁ ଅନ୍ୟ ଘରେ କାମ କରିବାକୁ ଛାଡ଼ିଥିଲେ।
ଅପରପକ୍ଷେ ପୂଜାଙ୍କୁ ଖୋଜିବାକୁ ଅନେକ ଲୋକ ଚେଷ୍ଟା ଜାରି ରଖିଥିଲେ। କିଛି ସାମାଜିକ ଅନୁଷ୍ଠାନ, ସ୍ବେଚ୍ଛାସେବୀଙ୍କ ସାଙ୍ଗକୁ ଉକ୍ତ ପୋଲିସ ଅଫିସର ଏଥିରେ ସାମିଲ ଥିଲେ। ୨୦୧୩ରେ ମୁମ୍ବାଇର ଡିଏନ୍ ନଗର ଥାନାରେ ଅପହରଣ ମାମଲା ରୁଜୁ ହୋଇଥିଲା। ସେତେବେଳେ ଏହାର ତଦନ୍ତ ଭାର ସବ୍ ଇନ୍ସପେକ୍ଟର ରାଜେନ୍ଦ୍ର ଭୌସଲେଙ୍କୁ ଦିଆଯାଇଥିଲା। ସେ କିନ୍ତୁ ପୂଜାଙ୍କୁ ଖୋଜିବାରେ ସଫଳ ହୋଇପାରି ନ ଥିଲେ। ପରେ ସେ ଅବସର ନେଇଥିଲେ। ହେଲେ ପକେଟରେ ପୂଜାଙ୍କ ଫଟୋକୁ ସର୍ବଦା ରଖି ଆସୁଥିଲେ।
୯ ବର୍ଷ ପରେ ପୂଜା ଅପହରଣ କରିଥିବା ଦମ୍ପତିଙ୍କ ସହ ଅନ୍ଧେରୀ ଅଞ୍ଚଳରେ ରହିବାକୁ ଆସିଥିଲେ। ସେ ସେଠାରେ କିଛି ଘରେ କାମ କରୁଥିଲେ। ଏହି ସମୟରେ ସେ ଜଣଙ୍କ ଘରେ ପିଲାକୁ ସମ୍ଭାଳିବା ଦାୟିତ୍ୱ ତୁଲାଉଥିଲେ। ସେଠାରେ ତାଙ୍କ ଭେଟ ଅନ୍ୟ ଜଣେ ଯୁବତୀଙ୍କ ସହ ହୋଇଥିଲା। ସେ ତାଙ୍କୁ ନିଜ ଜୀବନକାହାଣୀ କହିଥିଲେ। ଏହାଶୁଣି ଉକ୍ତ ଯୁବତୀ ପୂଜାଙ୍କ ଘରଲୋକଙ୍କୁ ଖୋଜିବାକୁ ଚେଷ୍ଟା କରିଥିଲେ। ଗୁଗଲ୍ରେ ସର୍ଚ୍ଚ କରିବା ସରେ ସେ ପୂଜାଙ୍କ ବିଷୟରେ ଅନେକ କିଛି ଜାଣିବାକୁ ପାଇଥିଲେ। କାରଣ ବହୁତ କିଛି ଅପ୍ଲୋଡ କରାଯାଇଥିଲା। ଏହିଭଳି ଭାବେ ପୂଜା ପ୍ରଥମେ ଜଣେ ସ୍ବେଚ୍ଛାସେବୀଙ୍କୁ ପ୍ରଥମେ ଯୋଗାଯୋଗ କରିଥିଲେ। ସେଠାରୁ ଖବର ପାଇ ପୋଲିସ ସହ ଯୋଗାଯୋଗ କରାଯାଇଥିଲା। ଶେଷରେ ଉକ୍ତ ଦମ୍ପତିଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି। ପୂଜା ନିଜ ପରିବାରକୁ ଭେଟି ବେଶ ଖୁସି ହୋଇଛନ୍ତି। ଏହି ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି।
