ଗୁଡ଼ାରି,୧୮।୨ (ପ୍ରମୋଦ କୁମାର ପତି): ରାୟଗଡ଼ା ଜିଲା ଗୁଡ଼ାରି ବ୍ଲକ୍ର ଚାଷୀଙ୍କୁ ଜଳସେଚନ ସୁବିଧା ଯୋଗାଇଦେବାକୁ ଶିରିଗୁଡ଼ା ଗ୍ରାମପଞ୍ଚାୟତରେ ଗତ ୨୦ ବର୍ଷ ପୂର୍ବେ ଖାରିକୁଟି କ୍ଷୁଦ୍ର ଜଳସେଚନ ପ୍ରକଳ୍ପ ନିର୍ମାଣ ହୋଇଥିଲା। ବଡ଼ ଡଙ୍ଗର ଓ ତେରେଡ଼ା ପାହାଡ଼ ମଧ୍ୟଭାଗରେ ପ୍ରବାହିତ ଚିରସ୍ରୋତା ଖାରିକୁଟି ନାଳରେ ଏହି କ୍ଷୁଦ୍ର ଜଳସେଚନ ପ୍ରକଳ୍ପ ନିର୍ମାଣ ହେବାର ଦୀର୍ଘ ବର୍ଷ ବିତିଯାଇଥିଲେ ମଧ୍ୟ ଏହି ପ୍ରକଳ୍ପ ଏବେ ସୁଦ୍ଧା ସମ୍ପୂର୍ଣ୍ଣ ଭାବେ କାର୍ଯ୍ୟକ୍ଷମ ହୋଇପାରିନାହିଁ। ଏହି ପ୍ରକଳ୍ପ ଦ୍ୱାରା ଅଞ୍ଚଳର ମୋଟ ୧୭.୧୫ କିଲୋମିଟର ଦୈର୍ଘ୍ୟ ବିଶିଷ୍ଟ କେନାଲ ଦ୍ୱାରା ଶତାଧିକ ଏକର ଚାଷଜମିକୁ ଜଳସେଚନ ହେବା ନିମନ୍ତେ ଧାର୍ଯ୍ୟ ହୋଇଥିଲେ ମଧ୍ୟ ଏବେ ମାତ୍ର ୨. ୪୬ କିଲୋମିଟର ଦୈର୍ଘ୍ୟ କେନାଲ ଦ୍ୱାରା ଜଳସେଚନ ହେଉଛି। ତେବେ ରକ୍ଷଣାବେକ୍ଷଣ ଅଭାବରୁ ଏହି ୨.୪୬ କିଲୋମିଟର ଦୈର୍ଘ୍ୟ ବିଶିଷ୍ଟ କେନାଲ ପୋତିହେବାକୁ ବସିଲାଣି। ସେହିପରି ପ୍ରକଳ୍ପର ଉଭୟ ପାର୍ଶ୍ୱରେ ନିର୍ମିତ ଲୁହାଗେଟ୍ ମଧ୍ୟ ନଷ୍ଟ ହୋଇଗଲାଣିି।
ବର୍ତ୍ତମାନ ଏହି ପ୍ରକଳ୍ପ ଶିରିଗୁଡ଼ାର ନଉକାଲମା ପାଣିପଞ୍ଚାୟତ ଅଧୀନରେ ରହିଛି। ଏହି ପ୍ରକଳ୍ପ ଦ୍ୱାରା ଏବେ ଶିରିଗୁଡ଼ା ଗ୍ରାମପଞ୍ଚାୟତର ଧୋବାବିଲ, ଭୁରୁକୁଡୁ, ରେଙ୍ଗାମ ଓ ଶିରିଗୁଡ଼ା ଗ୍ରାମର ପ୍ରାୟ ୨୦୦ ଏକର ଜମିକୁ ଜଳସେଚନ ହେଉଥିବା ବେଳେ ୧୦୦ରୁ ଊର୍ଦ୍ଧ୍ୱ ଚାଷୀ ଜଳକର ପୈଠ କରୁଥିବା ସ୍ଥାନୀୟ ଚାଷୀ ମତ ଦେଇଛନ୍ତି। ଚାଷୀଙ୍କ କହିବାନୁଯାୟୀ ନିୟମିତ ଜଳକର ପୈଠ କରୁଥିଲେ ମଧ୍ୟ ତାଙ୍କ ଜମିକୁ ଜଳ ପହଞ୍ଚତ୍ପାରୁନାହିଁ। ଏହି ପ୍ରକଳ୍ପ ସମ୍ପୂର୍ଣ୍ଣ ଭାବେ କାର୍ଯ୍ୟକ୍ଷମ ହେଲେ ବ୍ଲକ୍ର ଶିରିଗୁଡା, ଅସଡ଼ା, କଦମା ଓ ଏମ୍କେ ରାଇ ଗ୍ରାମପଞ୍ଚାୟତର ପ୍ରାୟ ୫୦ରୁ ଊର୍ଦ୍ଧ୍ୱ ଗ୍ରାମର ୨୦୦୦ ଏକରରୁ ଊର୍ଦ୍ଧ୍ୱ ଚାଷଜମି ଜଳସେଚିତ ହୋଇପାରିବ ବୋଲି କୃଷକ ନେତା ଗଙ୍ଗାଧର ଚଲାଣ କହିଛନ୍ତି। ଏହି ଅଞ୍ଚଳରେ ଜଳ ଅଭାବରୁ ପ୍ରତିବର୍ଷ ଶତାଧିକ ଏକର ଧାନ ଜମିରେ ମରୁଡ଼ି ଦେଖାଦେଉଛି। ଅନ୍ୟପକ୍ଷେ ପ୍ରାକୃତିକ ସୌନ୍ଦର୍ଯ୍ୟରେ ପରିପୂର୍ଣ୍ଣ ଏହି ଅଞ୍ଚଳରେ ଜଳସେଚନ ସାଙ୍ଗକୁ ଏଠାରେ ଉଭୟ ପାଶ୍ୱର୍ର୍ ପାହାଡ଼ରେ ବିଭିନ୍ନ ଔଷଧୀୟ ବୃକ୍ଷ ରୋପଣ ହେଲେ ସବୁଜିମା ସୃଷ୍ଟିହେବା ସହ ନୂତନ ଜଙ୍ଗଲ ସୃଷ୍ଟିହୋଇପାରିବ। ରାଜ୍ୟ ସରକାର ଯଦି ଏହି ପ୍ରକଳ୍ପ ପୁନରୁଦ୍ଧାର କାର୍ଯ୍ୟ ହାତକୁ ନିଅନ୍ତି ତେବେ ବ୍ଲକ୍ର ବହୁ ଚାଷୀ ଉପକୃତ ହେବେ। ଅଞ୍ଚଳରେ ଧାନ ସମେତ ଅର୍ଥକରୀ ଫସଲ ଯଥା ଆଖୁ, ସୂର୍ଯ୍ୟମୁଖୀ, ବିରି, ମୁଗ, ରାଶି ଓ ବିଭିନ୍ନ ପ୍ରକାର ଫୁଲଚାଷ ହୋଇପାରିବ ବୋଲି ଚାଷୀମାନେ କହିଛନ୍ତି। ଏହାଛଡ଼ା ଏହା ଏକ ପର୍ଯ୍ୟଟନସ୍ଥଳୀ ଭାବେ ଚିହ୍ନଟ ହୋଇପାରିବ। ଏହି ପ୍ରକଳ୍ପର ପୁନରୁଦ୍ଧାର ନିମନ୍ତେ କୃଷକ ନେତା ଗଙ୍ଗାଧର ଚଲାଣ ବହୁଥର ଜିଲାପାଳ, ବିଭାଗୀୟ ଅଧିକାରୀଙ୍କୁ ପତ୍ର ମାଧ୍ୟମରେ ଅବଗତ କରାଇବା ସହ ସ୍ଥାନୀୟ ଚାଷୀଙ୍କ ସହଯୋଗରେ ବ୍ଲକ୍ କାର୍ଯ୍ୟାଳୟ ସମ୍ମୁଖରେ ଅନଶନରେ ବସିଥିଲେ। ପ୍ରତିଶ୍ରୁତି ମିଳିଥିଲେ ମଧ୍ୟ ତାହା କେବଳ ପ୍ରତିଶ୍ରୁତିରେ ରହିଗଲା। ଏହି ଖାରିକୁଟି କ୍ଷୁଦ୍ର ଜଳସେଚନ ପ୍ରକଳ୍ପରେ ୟୁଜିପିଏଲ୍ ମାଧ୍ୟମରେ ଜମିକୁ ଜଳସେଚନ କରାଯିବା ନେଇ ରାୟଗଡ଼ା ଏମ୍ଆଇ ଡିଭିଜନର କାର୍ଯ୍ୟ ନିର୍ବାହୀ ଯନ୍ତ୍ରୀ ୧୧।୨।୨୦୨୨ରେ ଜୟପୁର ଅଧୀକ୍ଷକ ଯନ୍ତ୍ରୀଙ୍କୁ ଅବଗତ କରିଥିଲେ।
ସେମାନଙ୍କ ମୁହଁରୁ…
ଖାରିକୁଟି କ୍ଷୁଦ୍ର ଜଳସେଚନ ପ୍ରକଳ୍ପର ପୁନରୁଦ୍ଧାର ନିମନ୍ତେ ପୂର୍ବରୁ ବିଧାନସଭାରେ ପ୍ରଶ୍ନ କରିଥିଲି। ଏହାଛଡ଼ା ବିଭାଗୀୟ ଉଚ୍ଚ ପଦସ୍ଥ ଅଧିକାରଙ୍କ ସହ ମଧ୍ୟ ଆଲୋଚନା କରିଛି। ଏହି ପ୍ରକଳ୍ପ କିପରି ସମ୍ପୂର୍ଣ୍ଣ କାର୍ଯ୍ୟକ୍ଷମ ହେବ ସେ ଦିଗରେ ନିଶ୍ଚିତ ଭାବେ ସରକାରଙ୍କ ନିକଟରେ ଦାବି କରିବି।
-ସତ୍ୟଜିତ ଗମାଙ୍ଗ, ଗୁଣପୁର ବିଧାୟକ
ଏହି ପ୍ରକଳ୍ପ କାର୍ଯ୍ୟକ୍ଷମ ହେଲେ ବ୍ଲକ୍ର ୪ଟି ଗ୍ରାମପଞ୍ଚାୟତର ୫୦ରୁ ଊଦ୍ଧ୍ୱର୍ର୍ ଗ୍ରାମର ୨୦୦୦ ଏକର ଚାଷଜମି ଜଳସେଚିତ ହୋଇପାରିବ।
-ଗଙ୍ଗାଧର ଚଲାଣ, ଆଞ୍ଚଳିକ ବିକାଶ ପରିଷଦ ସଭାପତି
ସରକାର ତୁରନ୍ତ ପଦକ୍ଷେପ ନେଇ ଏହି ପ୍ରକଳ୍ପ କାର୍ଯ୍ୟ ସମ୍ପୂର୍ଣ୍ଣ କରନ୍ତୁ ଏବଂ ଆମ ଅଞ୍ଚଳର ଶତାଧିକ ଚାଷୀଙ୍କ ପେଟକୁ ଦୁଇମୁଠା ଦାନା ଦିଅନ୍ତୁ।
-ବିରାଟ ଗୌଡ଼, ସ୍ଥାନୀୟ ଚାଷୀ
ଅଞ୍ଚଳର ଚାଷୀଙ୍କ ସମସ୍ୟାକୁ ଗୁରୁତ୍ୱ ଦେଇ ଏହି ପ୍ରକଳ୍ପ କାର୍ଯ୍ୟକ୍ଷମ କରିବା ପାଇଁ ସରକାର ପଦକ୍ଷେପ ନିଅନ୍ତୁ। ମୋ ଜୀବନର ଶେଷ ପାହାଚରେ ଏହି ପ୍ରକଳ୍ପ କାର୍ଯ୍ୟକ୍ଷମ ହେବ ବୋଲି ଆଶା ରହିଛି।
-ପଦ୍ମନାଭ କାଦମ୍ବାଲୁ,
ପାଣି ପଞ୍ଚାୟତ ସଭାପତି
ପ୍ରକଳ୍ପ କାର୍ଯ୍ୟକ୍ଷମ ହେଲେ ଆମ ଅଞ୍ଚଳରେ ଚାଷୀଙ୍କ ଅର୍ଥନୈତିକ ବିକାଶ ହୋଇପାରିବ ଏବଂ ପରିବେଶର ସୁରକ୍ଷା ହୋଇପାରିବ।
-ଜି. ଗିରିବାବୁ,
ଭାଜପା ନେତା
