ମେଲ୍ବୋର୍ନ,୨୫ା୨(ପି.ଟି.): ଅଷ୍ଟ୍ରେଲିଆରେ ବ୍ରିସ୍ବେନ୍ରେ ଥିବା ଭାରତର ଅନରାରି କନ୍ସୁଲେଟ୍କୁ ଖଲିସ୍ତାନୀ ସମର୍ଥକମାନେ ଟାର୍ଗେଟ କରିଛନ୍ତି। ସେମାନେ କନ୍ସୁଲେଟ୍ କାର୍ଯ୍ୟାଳୟ ଆଗରେ ଖଲିସ୍ତାନୀ ପତାକା ଉଡ଼ାଇଛନ୍ତି। ଅଷ୍ଟ୍ରେଲିଆରେ ଭାରତୀୟ ସମ୍ପ୍ରଦାୟଙ୍କ ବିରୋଧରେ ଏହା ସଦ୍ୟତମ ଉଗ୍ରବାଦୀ କାର୍ଯ୍ୟ ବୋଲି ଏକ ଗଣମାଧ୍ୟମ ରିପୋର୍ଟରେ କୁହାଯାଇଛି। ଅଷ୍ଟ୍ରେଲିଆରେ ଭାରତୀୟମାନଙ୍କୁ ଉଗ୍ରବାଦୀ ଟାର୍ଗେଟ କରୁଥିବାରୁ ସତର୍କ ରହିବା ପାଇଁ ବହିର୍ବ୍ୟାପାର ମନ୍ତ୍ରୀ ଏସ୍. ଜୟଶଙ୍କର କିଛିଦିନ ପୂର୍ବରୁ ସେଠାରେ କହିଥିଲେ। ବ୍ରିସ୍ବେନ୍ର ସ୍ବାନ୍ ରୋଡ୍ଠାରେ ଥିବା ଭାରତର ଅନରାରି କନ୍ସୁଲେଟ୍କୁ ଗତ ୨୧ ତାରିଖରେ ଖଲିସ୍ତାନୀ ସମର୍ଥକମାନେ ଟାର୍ଗେଟ୍ କରିଥିବା ଅଷ୍ଟ୍ରେଲିଆ ଟୁଡେ୍ ପୋର୍ଟାଲରେ ପ୍ରକାଶ ପାଇଛି। ଭାରତୀୟ କନ୍ସଲ ଅର୍ଚ୍ଚନା ସିଂ ଏ ନେଇ କୁଇନ୍ସଲାଣ୍ଡ ପୋଲିସକୁ ଜଣାଇଥିଲେ। ଏହା ପୂର୍ବରୁ ଉଗ୍ରପନ୍ଥୀମାନେ ଜାନୁୟାରୀ ୨୩ରେ ମେଲବର୍ନର ଆଲବର୍ଟ ପାର୍କରେ ଥିବା ଇସ୍କନ୍ ମନ୍ଦିରରେ ଭଙ୍ଗାରୁଜା କରିବା ସହ ହିନ୍ଦୁସ୍ଥାନ ମୁର୍ଦ୍ଦାବାଦ ପୋଷ୍ଟର ଲଗାଇଥିଲେ। ଏହାର ସପ୍ତାହେ ପୂର୍ବରୁ ଭିକ୍ଟୋରିଆର କାରମ୍ ଡାଉନ୍ସରେ ଥିବା ଶ୍ରୀ ଶିବ ବିଷ୍ଣୁ ମନ୍ଦିରରେ ଅନୁରୂପ ଭାବେ ଭଙ୍ଗାରୁଜା କରାଯାଇଥିଲା। ଜାନୁୟାରୀ ୧୨ରେ ଭାରତ ବିରୋଧୀ ତତ୍ତ୍ୱମାନେ ମେଲବର୍ନରେ ଥିବା ସ୍ବାମୀନାରାୟଣ ମନ୍ଦିରରେ ଭଙ୍ଗାରୁଜା କରିଥିଲେ।
