ନୂଆଦିଲ୍ଲୀ,୪।୧୧: ୧୯୮୪ ଶିଖ ଦଙ୍ଗାର ୩୬ତମ ବାର୍ଷିକୀ ଅବସର ପୂର୍ବରୁ ଖଲିସ୍ତାନ ସମର୍ଥକ ସଂଗଠନ ପକ୍ଷରୁ ଧମକ ଦିଆଯାଉଛି। ଦିଲ୍ଲୀ ବିମାନ ବନ୍ଦରକୁ ଉଡାଇଦେବାକୁ ଖଲିସ୍ତାନୀ ସଂଗଠନ ପକ୍ଷରୁ ଧମକ ଦିଆଯାଇଥିବା ସୂଚନା ମିଳିଛି। ଖଲିସ୍ତାନ କମାଣ୍ଡୋ ଫୋର୍ସର ସଦସ୍ୟ ତଥା ଘୋଷିତ ଆତଙ୍କବାଦୀ ଗୁରୁପତବନ୍ତ ସିଂହ ପନୁନ ଅନେକ ଲୋକଙ୍କ ମୋବାଇଲରେ ଏକ ଧମକପୂର୍ଣ୍ଣ ଭଏସ୍ ମ୍ୟାସେଜ୍ ପଠାଇଥିବା ଜଣାପଡ଼ିଛି। ନଭେମ୍ବର ୫ ଅର୍ଥାତ୍ ଗୁରୁବାର ଦିଲ୍ଲୀ ବିମାନ ବନ୍ଦରରୁ ଏୟାର ଇଣ୍ଡିଆର ୨ଟି ବିମାନକୁ ଲଣ୍ଡନ ପହଞ୍ଚିବାକୁ ଦିଆଯିବ ନାହିଁ ବୋଲି ଉକ୍ତ ଭଏସ୍ ମ୍ୟାସେଜରେ ଉଲ୍ଲେଖ କରାଯାଇଛି। ଏଭଳି ଧମକପୂର୍ଣ୍ଣ ମ୍ୟାସେଜ ମିଳିବା ପରେ ଦିଲ୍ଲୀରେ ଆଲର୍ଟ ଜାରି କରାଯାଇଛି। ଏଥିସହ ଏୟାର ଇଣ୍ଡିଆ, ଏୟାରପୋର୍ଟ ପୋଲିସ, ସିଆଇଏସ୍ଏଫ୍ ସିକ୍ୟୁରିଟି ୟୁନିଟ ଓ ସ୍ପେଶାଲ ସେଲ୍କୁ ଆଲର୍ଟ କରାଯାଇଥିବା ନେଇ ଦିଲ୍ଲୀ ପୋଲିସର ଏୟାରପୋର୍ଟ ଡିସିପି ସୂଚନା ଦେଇଛନ୍ତି। ସୂଚନାଯୋଗ୍ୟ, ୧୯୮୪ରେ ଦିଲ୍ଲୀରେ ହୋଇଥିବା ଦଙ୍ଗାକୁ ନଭେମ୍ବର ୫ରେ ୩୬ବର୍ଷ ପୂରଣ ହେଉଛି। ଏଥିପାଇଁ ଖଲିସ୍ତାନୀ ଆତଙ୍କବାଦୀ ଅନେକ ନମ୍ବରରେ ଫୋନ କରି ଏଭଳି ଧମକ ଦେଇଥିବା କୁହାଯାଉଛି। ଅନ୍ୟପଟେ ମଙ୍ଗଳବାର ଖଲିସ୍ତାନ ସମର୍ଥକ ସଂଗଠନ ସହ ଜଡ଼ିତ ୧୨ଟି ଓ୍ବେବସାଇଟ ଉପରେ ସରକାର ପ୍ରତିବନ୍ଧକ ଲଗାଇବାକୁ ଘୋଷଣା କରିବା ପରେ ଏଭଳି ଧମକ ମିଳିଥିବା ଚର୍ଚ୍ଚା ହେଉଛି।
