ଆଇଏମ୍ଡିବି ରେଟିଂରେ ବଡ ବଡ ବ୍ଲକବଷ୍ଟର ଫିଲ୍ମକୁ ପଛରେ ପକାଇଛି ଓଡ଼ିଆ ଫିଲ୍ମ ‘ଦମନ’। ବିଶାଳ ମୋର୍ଯ୍ୟ ଏବଂ ଦେବୀ ପ୍ରସାଦ ଲେଙ୍କା ଦ୍ୱାରା ନିର୍ଦ୍ଦେଶିତ ତଥା ବାବୁଶାନ ଅଭିନୀତ ଏହି ଫିଲ୍ମ ନଭେମ୍ବର ୪ରେ ରିଲିଜ ହୋଇଛି। ଫିଲ୍ମକୁ ଦର୍ଶକେ ବେଶ ପସନ୍ଦ କରୁଛନ୍ତି। ଛୋଟ ସହରରୁ ଆରମ୍ଭ କରି ମହାନଗର ପର୍ଯ୍ୟନ୍ତ ଶୋ’ ହାଉସଫୁଲରେ ଚାଲିଛି। ଫିଲ୍ମକୁ ମିଳିଛି ୧୦ରୁ ୯.୭ ଆଇଏମ୍ଡିବି ରେଟିଂ। ବାହୁବଳୀ, କେଜିଏଫ୍ ଏବଂ ଆର୍ଆର୍ଆର୍, କାନ୍ତାରା ଭଳି ସୁପରହିଟ୍ ଚଳଚ୍ଚିତ୍ରଠାରୁ ଏହା ଅଧିକ। ଫଳରେ ‘ଦମନ’ ସବୁଠାରୁ ଅଧିକ ରେଟିଂ ହାସଲ କରିଥିବା ଭାରତୀୟ ଫିଲ୍ମ ପାଲଟିଛି।
ପ୍ରଥମେ ‘ଦମନ’ କେବଳ ଓଡ଼ିଶାରେ ରିଲିଜ ହୋଇଥିଲା। ପ୍ରଥମ ସପ୍ତାହରେ ଅପାର ସଫଳତା ମିଳିବା ପରେ ଦେଶର ବିଭିନ୍ନ ସହରରେ ଏହାକୁ ରିଲିଜ କରାଯାଇଛି। ବାଙ୍ଗାଲୋର, ଦିଲ୍ଲୀ, ମୁମ୍ବାଇ, ନୋଏଡା, ଗୁରୁଗାଓଁ, ଅହମ୍ମଦାବାଦ, ହାଇଦ୍ରାବାଦ, କୋଲକାତାର ବିଭିନ୍ନ ସିନେମାଘରେ ଏହା ପ୍ରଦର୍ଶିତ ହେଉଛି। ଏବେ ଫିଲ୍ମକୁ ହିନ୍ଦୀ ଭାଷାରେ ମଧ୍ୟ ରିଲିଜ କରାଯାଉ ବୋଲି ଦାବି ହେଉଛି।
