କେସିଙ୍ଗା,୬ା୫(ତୁମେଶ୍ବର ସାହୁ)- କଳାହାଣ୍ଡି ଜିଲା କେସିଙ୍ଗା ଏନ୍ଏସିକୁ ମ୍ୟୁନିସିପାଲିଟି ଘୋଷଣା ପାଇଁ ସିଟିଜେନ ଫୋରମ ପକ୍ଷରୁ ଦାବି କରାଯାଇଛି। ଏହି ମର୍ମରେ ଫୋରମର ସଭାପତି ଡା. ହେମସାଗର ସାହା ପୌର ପ୍ରଶାସନ ନିର୍ଦ୍ଦେଶକ ଅରିନ୍ଦମ ଡାକୁଆ ଏବଂ ଗୃହ ଓ ନଗର ଉନ୍ନୟନ ବିଭାଗ ପ୍ରିନ୍ସିପାଲ ସେକ୍ରେଟାରୀ ଉଷା ପାଢ଼ୀଙ୍କୁ ମଙ୍ଗଳବାର ଭୁବନେଶ୍ବରଠାରେ ସାକ୍ଷାତକରି ୯ଦଫା ସମ୍ବଳିତ ଦାବିପତ୍ର ପ୍ରଦାନ କରିଛନ୍ତି। ସେ ଏଥିରେ ଦର୍ଶାଇଛନ୍ତି, କେସିଙ୍ଗା ଏନ୍ଏସି ୧୯୬୫ ମସିହାରୁ ଗୃହ ଓ ନଗର ଉନ୍ନୟନ ବିଭାଗ ପକ୍ଷରୁ ବିଜ୍ଞାପିତ ଅଞ୍ଚଳ ପରିଷଦ ଭାବେ ପରିଚାଳିତ ହୋଇଆସୁଛି। ୨୦୧୧ ଜନଗଣନା ଅନୁସାରେ ସହରର ୧୨ ୱାର୍ଡରେ ଜନସଂଖ୍ୟା ୧୯,୨୩୯ ରହିଛି। ସେଥିମଧ୍ୟରୁ ୯୮୪୪ ପୁରୁଷ ଓ ୯୩୯୫ ମହିଳା। ବର୍ତ୍ତମାନ ଏହି ସଂଖ୍ୟା ୨୬ ହଜାରରେ ପହଞ୍ଚତ୍ଲାଣି। ଏହି ପରିପ୍ରେକ୍ଷୀରେ କେସିଙ୍ଗାକୁ ମ୍ୟୁନିସିପାଲିଟି ଘୋଷଣା କରାଗଲେ ସହରର ଭିତ୍ତିଭୂମି, ବାଣିଜ୍ୟ ବ୍ୟବସାୟ, ଲୋକଙ୍କ ଆର୍ଥିକ ମାନଦଣ୍ଡ ସୁଦୃଢ଼ ହୋଇପାରିବ। ଏହାଛଡ଼ା ଉକ୍ତ ଏନ୍ଏସି ୨୦୨୪-୨୫ ଆର୍ଥିକ ବର୍ଷରେ ହୋର୍ଡିଂ ଟାକ୍ସ ବାବଦକୁ ୫୯.୭୪ଲକ୍ଷ ଓ ବିଭିନ୍ନ ରାଜସ୍ବ ବାବଦରେ ୧.୫କୋଟି ଟଙ୍କା ଅର୍ଥ ଆଦାୟ କରିଛି। ଏନ୍ଏସି ୧୨ ୱାର୍ଡରେ ରାସ୍ତାଘାଟ ନିର୍ମାଣ, ଡ୍ରେନ୍, ପାନୀୟଜଳ, ବିଦ୍ୟୁତ୍ ସେବା, ଶିକ୍ଷା, ସ୍ବାସ୍ଥ୍ୟ ଆଦି ସୁବିଧା ଦେଇଆସୁଛି। ରାଜ୍ୟ ସରକାର ତୁରନ୍ତ ଏ ଦିଗରେ ପଦକ୍ଷେପ ନେବାକୁ ସିଟିଜେନ ଫୋରମ ସଭାପତି ସାହା ଦାବିପତ୍ରରେ ନିବେଦନ କରିଛନ୍ତି।
