ଥିରୁଭାନନ୍ତପୁରମ,୨।୯: ନାବାଳିକାଙ୍କ ସୁରକ୍ଷା ମାମଲାରେ କେରଳ ହାଇକୋର୍ଟ ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି । କୋର୍ଟ ସ୍ପଷ୍ଟ କରିଛନ୍ତି ଯେ, ଆଇନ ଓ ଶିଶୁଙ୍କ ସୁରକ୍ଷାଠାରୁ କୌଣସି ଧାର୍ମିକ ପ୍ରଥା କିମ୍ବା ବ୍ୟକ୍ତିଗତ ଆଇନ ଉପରେ ନୁହେଁ। ୧୭ ବର୍ଷୀୟା ଜଣେ ନାବାଳିକାଙ୍କ ସହ ବାରମ୍ବାର ବଳାତ୍କାର ଅଭିଯୋଗରେ ଚାଲିଥିବା ଅପରାଧିକ ମାମଲାକୁ ରଦ୍ଦ କରିବା ପାଇଁ ଅଭିଯୁକ୍ତ କରିଥିବା ଆବେଦନକୁ ହାଇକୋର୍ଟ ଖାରଜ କରିଦେଇଛନ୍ତି।
ଅଭିଯୁକ୍ତଙ୍କ ପକ୍ଷରୁ ଯୁକ୍ତି ଦିଆଯାଇଥିଲା ଯେ, ମୁସଲିମ୍ ରୀତିନୀତି ଅନୁଯାୟୀ ସେ ନାବାଳିକାଙ୍କୁ ବିବାହ କରିଥିଲେ। ତେଣୁ ତାଙ୍କ ବିରୋଧରେ ବଳାତ୍କାର ମାମଲା ଚାଲିପାରିବ ନାହିଁ ବୋଲି ଦାବି କରାଯାଇଥିଲା। ଅଭିଯୁକ୍ତଙ୍କ ଓକିଲ ଭାରତୀୟ ଦଣ୍ଡ ସଂହିତାର ଧାରା ୩୭୫ର ଅପବାଦ-୨କୁ ମଧ୍ୟ ଉଲ୍ଲେଖ କରିଥିଲେ। ଯୁକ୍ତି ଥିଲା ଯେ ୧୫ରୁ ୧୮ ବର୍ଷ ବୟସ ମଧ୍ୟରେ ଥିବା ‘ଆଇନଗତ ପତ୍ନୀ’ଙ୍କ ସହ ଶାରୀରିକ ସମ୍ପର୍କକୁ ବଳାତ୍କାର ଭାବେ ଗଣାଯାଇପାରିବ ନାହିଁ।
ମାମଲାର ପୃଷ୍ଠଭୂମି ୨୦୨୧ ଅକ୍ଟୋବରର। ଅଭିଯୋଗ ଅନୁସାରେ, ଅଭିଯୁକ୍ତ ଜଣକ ନାବାଳିକାଙ୍କୁ ପ୍ରଲୋଭିତ କରି ନିଜ ଘରକୁ ନେଇଯାଇଥିଲେ। ସେଠାରେ ପ୍ରାୟ ୪ ଦିନ ଧରି ତାଙ୍କ ସହ ଲଗାତାର ଯୌନ ନିର୍ଯାତନା କରାଯାଇଥିବା ଅଭିଯୋଗ ରହିଛି। ଏହି ଘଟଣାରେ ଅନ୍ୟ କିଛି ଲୋକ ମଧ୍ୟ ସହଯୋଗ କରିଥିବା ଅଭିଯୋଗ ରହିଛି। ଏପରିକି ନାବାଳିକାଙ୍କ ମାତାପିତା ସବୁକିଛି ଜାଣିଥିଲେ ମଧ୍ୟ ଚୁପ୍ ରହିଥିବା ଅଭିଯୋଗ କରାଯାଇଛି। ଜଷ୍ଟିସ୍ ଜୋବିନ୍ ସେବାଷ୍ଟିଆନ୍ ଅଭିଯୁକ୍ତଙ୍କ ଯୁକ୍ତିକୁ ଖାରଜ କରି ସୁପ୍ରିମକୋର୍ଟଙ୍କ ‘ଇଣ୍ଡିପେଣ୍ଡେଣ୍ଟ ଥଟ୍’ ମାମଲାର ରାୟକୁ ଉଲ୍ଲେଖ କରିଛନ୍ତି।ହାଇକୋର୍ଟ ସ୍ପଷ୍ଟ କରିଛନ୍ତି ଯେ, ୧୮ ବର୍ଷରୁ କମ୍ ବୟସର କୌଣସି ନାବାଳିକାଙ୍କ ସହ ଶାରୀରିକ ସମ୍ପର୍କ, ସେ ଅଭିଯୁକ୍ତଙ୍କ ପତ୍ନୀ ହୋଇଥିଲେ ମଧ୍ୟ, POCSO ଆଇନ ଅନୁଯାୟୀ ଅପରାଧ।
କୋର୍ଟ କହିଛନ୍ତି, ବ୍ୟକ୍ତିଗତ ଆଇନ କିମ୍ବା ଧର୍ମୀୟ ରୀତିନୀତିର ମାନ୍ୟତା ଯାହା ବି ହେଉ, ଏହା POCSO ଆଇନର କଠୋର ବ୍ୟବସ୍ଥାରୁ କାହାକୁ ସୁରକ୍ଷା ଦେଇପାରିବ ନାହିଁ। ପଟ୍ଟାମ୍ବି ଫାଷ୍ଟ ଟ୍ରାକ୍ ସ୍ପେଶାଲ୍ କୋର୍ଟରେ ଚାଲିଥିବା ଏହି ମାମଲାକୁ ନେଇ ହାଇକୋର୍ଟ କହିଛନ୍ତି ଯେ, POCSO ଆଇନର ଧାରା ୪୨ଏ ଅନୁଯାୟୀ ଏହି ଆଇନକୁ ଅନ୍ୟ ଆଇନ ଉପରେ ପ୍ରାଧାନ୍ୟ ମିଳିଛି। ଅର୍ଥାତ୍, ୧୮ ବର୍ଷରୁ କମ୍ ବୟସର ଜଣେ ଶିଶୁଙ୍କ ଅଧିକାର ଓ ସୁରକ୍ଷା ପ୍ରଶ୍ନରେ କୌଣସି ଧର୍ମୀୟ ପ୍ରଥା, ବ୍ୟକ୍ତିଗତ ଆଇନ କିମ୍ବା ପରମ୍ପରା ଆଇନର ବ୍ୟବସ୍ଥାକୁ ଅକାମୀ କରିପାରିବ ନାହିଁ।