କୋଚି,୪।୧୧: ମୁସଲମାନ ପୁରୁଷଙ୍କ ଦ୍ୱିତୀୟ ବିବାହକୁ କେରଳ ବିବାହ ପଞ୍ଜୀକରଣ (ସାଧାରଣ) ନିୟମ, ୨୦୦୮ ଅନୁଯାୟୀ ପଞ୍ଜୀକରଣ କରିବା ପୂର୍ବରୁ, ତାଙ୍କର ପ୍ରଥମ ସ୍ତ୍ରୀଙ୍କୁ ଶୁଣିବାର ସୁଯୋଗ ଦିଆଯିବା ଜରୁରୀ ବୋଲି କେରଳ ହାଇକୋର୍ଟ ଏକ ଗୁରୁତ୍ୱପୂର୍ଣ୍ଣ ରାୟରେ କହିଛନ୍ତି।
ଜଷ୍ଟିସ୍ ପି.ଭି. କୁଞ୍ଜିକୃଷ୍ଣନ୍ ଏହି ମାମଲାର ଶୁଣାଣି କରିବାବେଳେ କହିଛନ୍ତି ଯେ ଯଦିଓ ମୁସଲମାନ ବ୍ୟକ୍ତିଗତ ଆଇନ୍ କିଛି ପରିସ୍ଥିତିରେ ଜଣେ ପୁରୁଷଙ୍କୁ ଏକାଧିକ ବିବାହ କରିବାକୁ ଅନୁମତି ଦିଏ, ତଥାପି ବିବାହକୁ ଆଇନଗତ ଭାବେ ପଞ୍ଜୀକରଣ କରିବାକୁ ହେଲେ ଦେଶର ଆଇନ ପ୍ରାଥମିକତା ପାଇବ।
“ଧର୍ମ ସାମ୍ବିଧାନିକ ଅଧିକାର ଠାରୁ ଗୌଣ ହୋଇଯାଏ,” ବୋଲି କୋର୍ଟ ମନ୍ତବ୍ୟ ଦେଇଛନ୍ତି।
କୋର୍ଟ ମୁସଲମାନ ପୁରୁଷ ଏବଂ ତାଙ୍କ ଦ୍ୱିତୀୟ ସ୍ତ୍ରୀଙ୍କ ଆବେଦନକୁ ଖାରଜ କରିବାବେଳେ କହିଛନ୍ତି ଯେ, ଯଦି ପ୍ରଥମ ସ୍ତ୍ରୀ ଏହି ପଞ୍ଜୀକରଣକୁ ବିରୋଧ କରନ୍ତି ଏବଂ ଦ୍ୱିତୀୟ ବିବାହ ବୈଧ ନୁହେଁ ବୋଲି ଅଭିଯୋଗ କରନ୍ତି, ତେବେ ପଞ୍ଜୀକରଣ ଅଧିକାରୀ ଦ୍ୱିତୀୟ ବିବାହକୁ ପଞ୍ଜୀକୃତ କରିବେ ନାହିଁ।
ଏପରି ପରିସ୍ଥିତିରେ, ପକ୍ଷମାନଙ୍କୁ ସେମାନଙ୍କର ଧାର୍ମିକ ଆଇନ୍ ଅନୁଯାୟୀ ଦ୍ୱିତୀୟ ବିବାହର ବୈଧତା ପ୍ରତିଷ୍ଠା କରିବା ପାଇଁ ସକ୍ଷମ କୋର୍ଟକୁ (competent court) ପଠାଯିବା ଉଚିତ୍।
ଜଷ୍ଟିସ୍ କୁଞ୍ଜିକୃଷ୍ଣନ୍ କହିଛନ୍ତି, “ଜଣେ ମୁସଲମାନ ପ୍ରଥମ ସ୍ତ୍ରୀ ତାଙ୍କ ସ୍ୱାମୀଙ୍କ ଦ୍ୱିତୀୟ ବିବାହ ପଞ୍ଜୀକରଣକୁ ନୀରବଦ୍ରଷ୍ଟା ହୋଇ ଦେଖିପାରିବେ ନାହିଁ।”
କୋର୍ଟ ୨୦୦୮ ନିୟମର ଧାରା ୧୧କୁ ଉଲ୍ଲେଖ କରି କହିଛନ୍ତି ଯେ ରେଜିଷ୍ଟ୍ରାର୍ ବିବାହର ସ୍ମାରକପତ୍ର (memorandum)ରେ ପୂର୍ବ ବୈବାହିକ ସ୍ଥିତି ସମେତ ସମସ୍ତ ବିବରଣୀ ଯାଞ୍ଚ କରିବାକୁ ଆବଶ୍ୟକ। ଜଜ୍ ଗୁରୁତ୍ୱାରୋପ କରିଛନ୍ତି ଯେ ବ୍ୟକ୍ତିଗତ ଆଇନ୍ ଏକାଧିକ ବିବାହକୁ ଅନୁମତି ଦେଉଥିଲେ ମଧ୍ୟ, ଏହା ସହିତ ସ୍ୱାମୀ ଉଭୟ ସ୍ତ୍ରୀଙ୍କୁ ସମାନ ଭାବରେ ବ୍ୟବହାର କରିବାର ଏବଂ ସମାନ ଭରଣପୋଷଣ ଯୋଗାଇବାର କ୍ଷମତା ଭଳି ସର୍ତ୍ତ ଜଡ଼ିତ।
ସମ୍ବିଧାନର ଧାରା ୧୪ ଏବଂ ୧୫ ଅନୁଯାୟୀ ସମାନତା ଅଧିକାର ମହିଳାମାନଙ୍କୁ ଏପରି ମାମଲାରେ ଏଡ଼ାଇ ଦିଆଯିବାରୁ ରକ୍ଷା କରେ ବୋଲି କୋର୍ଟ କହିଛନ୍ତି।
