ଯୋଡ଼ା,୪ା୧୦(ଡି.ଏନ୍.ଏ): କେନ୍ଦୁଝର ଜିଲା ଯୋଡ଼ା ଖଣି ଉପତ୍ୟକାରେ ଚଳିତ ବର୍ଷ ଆଡ଼ମ୍ବରରେ ଶାରଦୀୟ ଦୂର୍ଗାପୂଜା ପାଳନ କରାଯାଉଛି। ଖଣି ଓ ଶିଳ୍ପର ରୁଗୁଣ ଅବସ୍ଥା ମଧ୍ୟରେ ଶ୍ରଦ୍ଧାଳୁଙ୍କ ଭାବାବେଗରେ ଉତ୍ସାହ କମି ନାହିଁ। ଖଣି କ୍ଷେତ୍ର ଜୁରୁଡ଼ି, ବାମେବାରୀ, ଜରିବାହାଲ ସମେତ ଯୋଡ଼ା ସହର, ବିଲେଇପଦା ପ୍ରଭୃତି ସ୍ଥାନରେ ମୃଣ୍ମୟୀ ମୂର୍ତ୍ତି ପୂଜା ହେବା ସହିତ ଦେବୀ ପୀଠ ଗୁଡ଼ିକରେ ମା’ଙ୍କ ଆରାଧନା ହେଉଛି।
ଜୁରୁଡ଼ି ଠାରେ ହେଉଥିବା ଦୂର୍ଗା ପୂଜାରେ ମା’ଙ୍କ ଖଣ୍ଡା ଏବଂ ମୁକୁଟ ପୂଜା ଭଳି ସ୍ବତନ୍ତ୍ର ପରମ୍ପରା ରହିଛି ବୋଲି କମିଟି ସମ୍ପାଦକ ପ୍ରଭୁରଞ୍ଜନ ଶତପଥୀ କହିଛନ୍ତି। ବିଆଇଏଲ ସ୍ଥିତ ତାରିଣୀ ମନ୍ଦିରରେ ଷୋଡ଼ଶ ଉପଚାରରେ ଓ ଯୋଡ଼ା ମଙ୍ଗଳା ମନ୍ଦିରରେ ରୀତିନୀତି ଅନୁଯାୟୀ ପୂଜାର୍ଚ୍ଚନା ଚାଲିଛି। ପଣ୍ଡିତ ବଳରାମ ଆଚାର୍ଯ୍ୟ ଓ ପୂଜକ ସ୍ମୃତିରଞ୍ଜନ ଦାସ ପୂଜା କାର୍ଯ୍ୟ ସମ୍ପାଦନ କରୁଛନ୍ତି। ତାରିଣୀ ମନ୍ଦିରର ଭଜା ଖେଚୁଡ଼ି ସ୍ଥାନୀୟ ଅଞ୍ଚଳରେ ପ୍ରସିଦ୍ଧି ଲାଭ କରିଛି। ଶ୍ରଦ୍ଧାଳୁ ମାନଙ୍କ ପାଇଁ ଏହି ଖେଚୁଡ଼ି ଭୋଗ ପୂଜା ଅବସରରେ ଦଶମୀ ପର୍ଯ୍ୟନ୍ତ ବଣ୍ଟନ କରାଯାଇ ଥାଏ ବୋଲି ମନ୍ଦିର ପକ୍ଷରୁ ସୁରେନ୍ଦ୍ର ନାଥ ମହାନ୍ତି କହିଛନ୍ତି ।ଅନ୍ୟପକ୍ଷେ ଦୀର୍ଘ ୫ ଦଶନ୍ଧୀ ଧରି ପଶ୍ଚିମ ଯୋଡ଼ାରେ ହେଉଥିବା ଦୂର୍ଗାପୂଜା ମଣ୍ଡପକୁ ସ୍ଥାନାନ୍ତରିତ କରାଯାଇଥିବାରୁ ଯୋଡ଼ା ବସ୍ତି, ଗୋପ ମହାନ୍ତି ହଟିଂ, ହନୁମାନ ହଟିଂର ଶ୍ରଦ୍ଧାଳୁ ମାନେ ଅସନ୍ତୋଷ ପ୍ରକାଶ କରିଛନ୍ତି।
