କୋକସରା,୧୭।୪(ଡି.ଏନ.ଏ): କଳାହାଣ୍ଡି ଜିଲା କୋକସରା ବ୍ଲକ ଲଡୁଗାଁ ବନାଞ୍ଚଳ ବିଜମରା କେନ୍ଦୁପତ୍ର ଫରେଷ୍ଟ ସେକ୍ସନରେ ରହିଥିବା ୧୪ଟି କେନ୍ଦୁପତ୍ର ଫଡ଼ି ବିରିମୁହାଣ, ଆମପାଣି, ରଏନଗୁଡା ବିଜମରା, ଧୋବେନଚଞ୍ଚରା, ଘଣ୍ଟିଗୁଡା, କୁଳେରଗୁଡା, ଗୋତୋମୁଣ୍ଡା, ପିପଲଝାପର, ଭାଲୁଚୁଆଁ, କନକପୁର,ପାଇକପଡା, ଜୟନ୍ତପୁର ଓ କନ୍ଦାଗଡ ଫଡ଼ିରେ ବିଗତ ୨/୩ ବର୍ଷ ହେବ ରାଜ୍ୟ ବାହାରର ବିଭିନ୍ନ ବେସରକାରୀ କମ୍ପାନୀ ସ୍ଥାନୀୟ କିଛି ନେତା ଓ ଦଲାଲଙ୍କୁ ହାତବାରିସୀ କରି ଗ୍ରାମସଭା ମାଧ୍ୟମରେ କେନ୍ଦୁପତ୍ର କ୍ରୟ ଆରମ୍ଭ କରିଛନ୍ତି। ଫଳରେ ୧୯୭୩ରୁ ସରକାରୀ ଭାବେ କେନ୍ଦୁପତ୍ର ଫରେଷ୍ଟ ଡିଭିଜନ କାର୍ଯ୍ୟ କରୁଥିବା କେନ୍ଦୁପତ୍ର କ୍ରୟ କର୍ମଚାରୀ ଚେକର, ମୁନସି, ଚପରାଶି ଓ ତୋଳାଳୀମାନେ ଜୀବିକା ହରାଇବା ସହ କେନ୍ଦୁପତ୍ର ତୋଳାଳୀଙ୍କ ପାଇଁ ରହିଥିବା ସରକାରଙ୍କ ବିଭିନ୍ନ ଯୋଜନାରୁ ବଞ୍ଚିତ ହେଉଥିବା ନେଇ ଅଭିଯୋଗ ହେଉଛି।
ଏନେଇ ଲଡୁଗାଁ ରେଞ୍ଜ ବିଜମରା ସେକ୍ସନ କେନ୍ଦୁପତ୍ର କର୍ମଚାରୀ ଓ ତୋଳାଳୀ ଶ୍ରମିକଙ୍କ ପକ୍ଷରୁ ତ୍ରିନାଥ ପୋଟାଙ୍କ ପରିଚାଳନାରେ କୋକସରା ବ୍ଲକ ମହିମା ପଞ୍ଚାୟତ ମହାଭାରତ ପଡ଼ି କେନ୍ଦୁପତ୍ର କର୍ମଚାରୀ ଓ ତୋଳାଳି ଶ୍ରମିକଙ୍କ ପକ୍ଷରୁ ଏକ ପ୍ରତିବାଦ ବୈଠକ ଅନୁଷ୍ଠିତ ହୋଇଯାଇଛି। ବୈଠକରେ କୋକସରା ବ୍ଲକ ଉପାଧ୍ୟକ୍ଷ ରାଜୀବ କୁମାର ଅଗ୍ରୱାଲ, ଆମପାଣି ଜିଲା ପରିଷଦ ସଭ୍ୟ ହେମନ୍ତ ମାଝୀ, ଲଡୁଗାଁ କେନ୍ଦୁପତ୍ର ଡିଭିଜନର ରେଞ୍ଜର ରେବତୀକାନ୍ତ ନାଏକ, ବିଜମରା ଫରେଷ୍ଟର ହରିଶଙ୍କର ଧରୁଆ, ଜୟପାଟଣା ଫରେଷ୍ଟର ତ୍ରିଲୋକ୍ୟ ମାଝୀ, ରେଙ୍ଗାଳପାଲି ଫରେଷ୍ଟର ସୁଦାମ ଚରଣ ସାହୁ, ହେଡ ଚେକର ଦାମୋଦର ବିଶି, ସର୍କଲ ଚେକର ଅଲେଖ ନାଏକ, ତ୍ରିଭୁବନ ବଗର୍ତ୍ତି, ଟେମରା ସରପଞ୍ଚ କ୍ଷିତିରାମ ପାତ୍ର, ଗୋତୋମୁଣ୍ଡା ସମିତି ସଭ୍ୟା ଶାମୁକା ନାଏକ, ଗୋତୋମୁଣ୍ଡା ସରପଞ୍ଚ ପଦ୍ମିନୀ ପୂଝାରି, ମହିମା ସରପଞ୍ଚ ଇଶରାମ କୋଲଥିଆ, ଡୁଡୁକାଠେଙ୍ଗା ସରପଞ୍ଚ ହରିପ୍ରିୟା ନାଗ ଉପସ୍ଥିତ ରହି କେନ୍ଦୁପତ୍ର ତୋଳାଳୀଙ୍କୁ ରାଜ୍ୟ ସରକାରଙ୍କ ନିର୍ଦ୍ଦେଶ ଅନୁସାରେ ସରକାରୀ ସହାୟତାର ଲାଭ ଉଠାଇବାକୁ ପରାମର୍ଶ ଦେବା ସହ ବେସରକାରୀ କମ୍ପାନିକୁ କେନ୍ଦୁପତ୍ର ବିକ୍ରି ନ କରିବାକୁ ପରାମର୍ଶ ଦେଇଛନ୍ତି। ଏହି ବୈଠକରେ ଲଡୁଗାଁ କେନ୍ଦୁପତ୍ର ଫରେଷ୍ଟ ଡିଭିଜନର ୧୪ ଫଡ଼ିରେ ନିୟୋଜିତ ରହିଥିବା ମୁନସି , ଚେକର, ଚପରାଶି ଓ କେନ୍ଦୁପତ୍ର ତୋଳାଳୀ ଶ୍ରମିକ ଉପସ୍ଥିତ ରହିଥିଲେ।
