କେନ୍ଦ୍ରାପଡ଼ା,୧୪।୧୦: ମା’ଗଜଲକ୍ଷ୍ମୀଙ୍କ ଭସାଣି ଉତ୍ସବ ପାଇଁ କେନ୍ଦ୍ରାପଡ଼ା ସହର ଉତ୍ସବମୁଖର ହୋଇପଡ଼ିଛି। ସାତଦିନ ଧରି ମଣ୍ଡପରେ ପୂଜାର୍ଚ୍ଚନା ପରେ ଏବେ ବିଦାୟ ନେଉଛନ୍ତି ମା’ ଗଜଲକ୍ଷ୍ମୀ। ଏନେଇ ଲୋକଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଛି। ଭସାଣି ଉତ୍ସବରେ ବିଭିନ୍ନ ରଙ୍ଗାରଙ୍ଗ କାର୍ଯ୍ୟକ୍ରମ ସହ ରାସ୍ତା ଉପରେ କଳାକାରଙ୍କ ଭୂତ-ତାନ୍ତ୍ରିକ ଲଢ଼େଇ ଦେଖିବାକୁ ମିଳିଛି।
ଭସାଣି ଉତ୍ସବକୁ ଶାନ୍ତି ଶୃଙ୍ଖଳା ଓ ସରସସୁନ୍ଦର କରିବାକୁ ଜିଲା ପ୍ରଶାସନ ପକ୍ଷରୁ ବିଭିନ୍ନ ନିୟମ ଏବଂ କଟକଣା ଜାରି କରାଯାଇଛି। ଅପରପକ୍ଷରେ ଏହି ଗଣପର୍ବର ଆରମ୍ଭରୁ ସହରର ବିଭିନ୍ନ ମଣ୍ଡପ ନିକଟରେ ସାଂସ୍କୃତିକ କାର୍ଯ୍ୟକ୍ରମ କରାଯିବା ସହ ମେଳଣ ଓ ଭସାଣି ନିମନ୍ତେ ଜିଲା ଏବଂ ବାହାର ରାଜ୍ୟରୁ କଳାକାର ଆସି ନିଜ କାଳ, କୌଶଳ ପ୍ରଦର୍ଶନ କରୁଛନ୍ତି। ଏହା ଦେଖିବାକୁ ଲୋକଙ୍କ ଗହଳି ଲାଗି ରହିଛି। ଏଭଳିସ୍ଥିତି ଭସାଣି ଉତ୍ସବରେ ଏକ ସୁନ୍ଦର ଦୃଶ୍ୟ ସାମ୍ନାକୁ ଆସିଛି। ମା’ଙ୍କୁ ମେଲାଣି ଦେବାକୁ ଆସିଛି ତାଙ୍କ ବାହାନ ପେଚା। ଏହା ଲୋକଙ୍କୁ ଭାବବିହ୍ବଳ କରି ଦେଇଛି।
