ନୂଆଦିଲ୍ଲୀ,୩୦।୫: ଆସନ୍ତା ବର୍ଷ ହରିୟାଣାରେ ହେବାକୁ ଥିବା ବିଧାନସଭା ନିର୍ବାଚନ ପାଇଁ ବିଭିନ୍ନ ରାଜନୈତିକ ଦଳ ପ୍ରସ୍ତୁତି ଆରମ୍ଭ କରିଦେଇଛନ୍ତି। ଆମ ଆଦମୀ ପାର୍ଟି (ଏଏପି) ଜାତୀୟ ସଂଯୋଜକ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ଦଳର ଅଭିଯାନ ପକ୍ଷରୁ ଆସନ୍ତା ସପ୍ତାହରେ ରାଜ୍ୟ ଜିନ୍ଦ ଜିଲାର ତିରଙ୍ଗା ଯାତ୍ରାରେ ସାମିଲ ହେବେ ବୋଲି ସୂଚନା ମିଳିଛି। ହରିୟାଣା ବିଧାନସଭାର କାର୍ଯ୍ୟକାଳ ୩ ନଭେମ୍ବର ୨୦୨୪ରେ ଶେଷ ହେବ।
ନିକଟରେ ହରିୟାଣା ୟୁନିଟର ସଭାପତି ଭାବରେ ନିଯୁକ୍ତ ହୋଇଥିବା ଏଏପିର ରାଜ୍ୟ ସଭା ସଦସ୍ୟ ସୁଶୀଲ କୁମାର ଗୁପ୍ତା ସୋମବାର କହିଛନ୍ତି , ଜୁନ ୮ରେ ହରିୟାଣାର ଜିନ୍ଦ ଜିଲାରେ ଏକ ରୋଡ ଶୋ’ ସହିତ ତିରଙ୍ଗା ଯାତ୍ରା ଆୟୋଜିତ ହୋଇଛି। ଏହି ଯାତ୍ରାରେ କେଜ୍ରିଓ୍ବାଲ ଏବଂ ପଞ୍ଜାବ ମୁଖ୍ୟମନ୍ତ୍ରୀ ଭଗବନ୍ତ ମାନ ସାମିଲ ହେବେ। ଯେଉଁଥିରେ ପ୍ରାୟ ୫୦,୦୦୦ ଲୋକ ଯୋଗଦେବେ ବୋଲି ଆଶା କରାଯାଉଛି।
