ଦେବଗଡ଼ ୫।୧୨:( ଡି. ଏନ. ଏ.): ଲୋକଙ୍କୁ ଲୋଭ ଦେଖାଇ ଅନଲାଇନରେ ଲୁଟୁଛନ୍ତି ଲକ୍ଷ ଲକ୍ଷ ଟଙ୍କା। ଏଭଳି ଏକ ଗ୍ୟାଙ୍ଗର ପର୍ଦ୍ଦାଫାଶ କରିଛି ଦେବଗଡ଼ ପୋଲିସ। ଅନ୍ଲାଇନ ଲୁଟ୍ ଘଟଣାର ଛାନ୍ଭିନ୍ କରି ୭ ଜଣଙ୍କୁ ଗିରଫ କରିବା ନେଇ ଦେବଗଡ଼ ଆଦର୍ଶ ଥାନାରେ ଅନୁଷ୍ଠିତ ଖବରଦାତା ସମ୍ମିଳନୀରେ ଏସ୍ ପି ପ୍ରମୋଦ କୁମାର ରଥ ସୂଚନା ଦେଇଛନ୍ତି। ସୂଚନା ଅନୁଯାୟୀ, ବିହାରର କିଛି ଲୋକ ଝାରସୁଗୁଡାରେ ରହି ଏଭଳି ସାମ୍ରାଜ୍ୟ ଚଳାଉଥିଲେ। ମାତ୍ର ଘଟଣାର କିଙ୍ଗପିନ ଏବେ ବି ଧରା ପଡ଼ିନାହିଁ । ମୁଖ୍ୟ ଅଭିଯୁକ୍ତ ବିହାରରେ ଥିବା ଏସ ପି ଶ୍ରୀ ରଥ ସୂଚନା ଦେବା ସହ ତାଙ୍କୁ ଧରିବା ପାଇଁ ଏକ ସ୍ବତନ୍ତ୍ର ଟିମ୍ ଗଠନ କରାଯାଇଛି । ଗିରଫ ହୋଇଥିବା ଅଭିଯୁକ୍ତଙ୍କ ମଧ୍ୟରେ ୩ ଜଣ ଝାରସୁଗୁଡାର ହୋଇଥିବା ବେଳେ ଅନ୍ୟ ୪ ଜଣ ସୁନ୍ଦରଗଡ଼ ଜିଲାର ଥିବା ଜଣାପଡିଛି । ଅଭିଯୁକ୍ତଙ୍କଠାରୁ ନଗଦ ଏକ ଲକ୍ଷ ଚାଳିଶ ହଜାର ଟଙ୍କା ସହ ୧୮ଟି ଏଟିଏମ, ୭ ମୋବାଇଲ , ୧୩ଟି ପାସ୍ବୁକ ଏବଂ ୧୦ଟି ଚେକ୍ ବହି ଜବତ କରାଯାଇଛି । କେବିସି ଲଟେରୀ ଜିତିଥିବା କହି ଦେବଗଡ଼ ରାଇତାଳ ଗ୍ରାମର ବିସ୍ମୟ ବେହେରା( ୧୯) ଙ୍କ ଠାରୁ ଗତ କିଛି ଦିନ ତଳେ ବିଭିନ୍ନ ସମୟରେ ୨.୫ ଲକ୍ଷ ଟଙ୍କା ନେଇଥିଲେ। ପରେ ବିସ୍ମୟ ଠକାମୀର ଶିକାର ହୋଇଥିବା ଜାଣିବା ପରେ ଦେବଗଡ଼ ଥାନାରେ ଅଭିଯୋଗ କରିଥିଲେ। ଅଭିଯୋଗ କ୍ରମେ ଦେବଗଡ଼ ଥାନା ପୋଲିସ ଘଟଣାର ତଦନ୍ତ କରି ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି । ଗିରଫ ଅଭିଯୁକ୍ତ ମାନେ ହେଲେ ଝାରସୁଗୁଡା ଚୌକିପଡାର ଲଖନ ସାହୁ (୨୩) , ତାଲିଭଟା ର ପବନ ପ୍ରସାଦ (୨୦), ରୋଶନ ଶା (୨୩) , ସୁନ୍ଦରଗଡ ଜିଲା ନବଙ୍ଗପୁରର ଉଦୟ ସାହୁ (୨୫), ଲେମିଲମାର କିଶୋର ଓରାମ (୨୭) , ଲେମିଲମାର ବିକାଶ ଓରାମ (୨୨) ଏବଂ ନବଙ୍ଗପୁରର ରାଜୀବ ରଞ୍ଜନ ଗୁପ୍ତା (୨୯) । ଘଟଣାର କିଙ୍ଗପିନ ସହ ଲଖନ ଅଭିଯୋଗକାରୀ ବ୍ୟକ୍ତିଙ୍କ ଟଙ୍କା ଅନ୍ୟ ଗିରଫ ବ୍ୟକ୍ତିଙ୍କ ଆକାଉଣ୍ଟରେ ଆଣିଥିଲା। ସେମାନଙ୍କୁ ଅଳ୍ପ କିଛି ଟଙ୍କା ଦେଇ ନିଜେ ମାଲେମାଲ ହେଉଥିଲେ। ଖବରଦାତା ସମ୍ମିଳନୀରେ ଡି ଆଇ ବି ଡ଼ିଏସପି ପ୍ରଦୀପ କୁମାର କେରକେଟା , ଦେବଗଡ଼ ଥାନା ଅଧିକାରୀ ସୁରେନ୍ଦ୍ର ନାଏକ , ଇନିସପେକ୍ଟର ସରୋଜ କୁମାର ସେଠୀ ପ୍ରମୁଖ ଉପସ୍ଥିତ ଥିଲେ।
