ଥୁଆମୂଳ ରାମପୁର,୧୨ା୨(ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର (CHC) ପରିସରରେ ବୁଧବାର ସମ୍ମାନଜନକ ‘କାୟାକଳ୍ପ’ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ସରକାରୀ ଚିକିତ୍ସାଳୟ ଗୁଡ଼ିକରେ ସ୍ବଚ୍ଛତା, ପରିମଳ ଏବଂ ସେବାର ମାନ ବୃଦ୍ଧି କରିବା ଲକ୍ଷ୍ୟରେ ଏକ ପ୍ରତିନିଧି ଦଳ ଏହି ବାହ୍ୟ ମୂଲ୍ୟାୟନ (External Assessment) କରିଛନ୍ତି । ଏହି ଅବସରରେ ଜିଲା କାର୍ଯ୍ୟକ୍ରମ ପରିଚାଳକ (DPM) ଦିଲ୍ଲୀପ କୁମାର ଦୁବେ, ଡି.ଏମ. ଆର.ସି.ଏଚ୍ ରଶ୍ମି ରଞ୍ଜନ ମହାନ୍ତି, ବି.ପି.ଏଚ.ଓ ଡାକ୍ତର ପ୍ରଦୋଷ କୁମାର ପଣ୍ଡା ଓ ପି.ଓ ସୁଧାଂଶୁ ଶେଖର ପଣ୍ଡା ପ୍ରମୁଖ ଉପସ୍ଥିତ ରହି ସ୍ବାସ୍ଥ୍ୟ କେନ୍ଦ୍ରର ବିଭିନ୍ନ ବିଭାଗ ଅନୁଧ୍ୟାନ କରିଥିଲେ।
ରାଜ୍ୟ ମିଶନ ନିର୍ଦ୍ଦେଶକଙ୍କ ନିର୍ଦ୍ଦେଶକ୍ରମେ ବାହ୍ୟ ପରୀକ୍ଷକ ଭାବେ ଖାଦ୍ୟ ନିରାପତ୍ତା ଯୁଗ୍ମ କମିଶନର ଡାକ୍ତର କ୍ଷେତ୍ରମୋହନ କାଣ୍ଡ, ପି.ଟି.ସି ପରାମର୍ଶଦାତା ସୁଧାଂଶୁ ଶେଖର ସାମନ୍ତ ଏବଂ ଏସ.ପି.ଏମ (ଅରମାନ) ଡାକ୍ତର ଦେବବ୍ରତ ମହାପାତ୍ର ଯୋଗଦେଇ ସ୍ବାସ୍ଥ୍ୟ କେନ୍ଦ୍ରର ଭିତ୍ତିଭୂମି ଓ ସେବା ପ୍ରକ୍ରିୟାର ସମୀକ୍ଷା କରିଥିଲେ। ଚିକିତ୍ସାଳୟର ରୂପରେଖ ଓ ଗୁଣବତ୍ତା ବଜାୟ ରଖିବାରେ ନିୟୋଜିତ କର୍ମଚାରୀଙ୍କ ଭୂମିକାକୁ ଅଧିକାରୀମାନେ ପ୍ରଶଂସା କରିଥିଲେ ।
ଏହି ଅନୁଧ୍ୟାନ ସମୟରେ ପି.ଏଚ.ଇ.ଓ ମମତା ସାହୁ, ବି.ପି.ଏମ ଦୀପକ କୁମାର ମାଝୀ, ଡି.ଭି.ବି.ଡି.ସି ଦିନେଶ କୁମାର ପ୍ରହରାଜ, ବି.ଡି.ଏମ ଅମୂଲ୍ୟ କୁମାର ନାଏକ, ବି.ଏ.ଏମ ନାରାୟଣ ମିଶ୍ର, ଏସ.ଟି.ଏସ ସଞ୍ଜୟ କୁମାର ମୁଣ୍ଡ ଏବଂ ଏମ.ଟି.ଏସ (MTS) ଅଜିତ କୁମାର ପଣ୍ଡା ସକ୍ରିୟ ଅଂଶଗ୍ରହଣ କରିଥିଲେ। ଏଥିସହ ଡାକ୍ତର ରେନି ଅଗ୍ରୱାଲ ଓ ଡାକ୍ତର ଶକ୍ତି ସାଗର ଉପସ୍ଥିତ ରହି ଆବଶ୍ୟକୀୟ ତଥ୍ୟ ପ୍ରଦାନ କରିଥିଲେ। ଉଲ୍ଲେଖଯୋଗ୍ୟ ଯେ, ପ୍ରତିବର୍ଷ ଭଳି ସମଗ୍ର ଓଡ଼ିଶାରେ ସ୍ବାସ୍ଥ୍ୟ କେନ୍ଦ୍ର ଗୁଡ଼ିକ ମଧ୍ୟରେ ସୁସ୍ଥ ପ୍ରତିଯୋଗିତା ମନୋଭାବ ସୃଷ୍ଟି କରିବା ପାଇଁ ‘କାୟାକଳ୍ପ’ ପୁରସ୍କାର ପାଇଁ ଏହି ଆକଳନ କରାଯାଉଛି । ଥୁଆମୂଳ ରାମପୁର CHC ର କାର୍ଯ୍ୟଧାରାକୁ ନେଇ ଅଧିକାରୀମାନେ ସନ୍ତୋଷ ବ୍ୟକ୍ତ କରିଛନ୍ତି ।
