ମୁମ୍ବାଇ: ସାଧାରଣତଃ ସ୍ତ୍ରୀଠାରୁ ସ୍ବାମୀଙ୍କ ଧନସମ୍ପତ୍ତି ଟିକେ ଅଧିକ ହୋଇଥାଏ। ହେଲେ ବଲିଉଡ୍ ଅଭିନେତ୍ରୀ କ୍ୟାଟ୍ରିନା କୈଫ୍ଙ୍କ କ୍ଷେତ୍ରରେ ସେପରି ନୁହେଁ। ଏକ ରିପୋର୍ଟ ମୁତାବକ, ସ୍ବାମୀ ଭିକ୍କି କୌଶଲଙ୍କଠାରୁ ଅଧିକ ସମ୍ପତ୍ତିର ମାଲିକାଣୀ କ୍ୟାଟ୍ରିନା ବୋଲି ଜଣାପଡ଼ିଛି। ବଲିଉଡ୍ରେ ସର୍ବାଧିକ ପାରିଶ୍ରମିକପ୍ରାପ୍ତ ଅଭିନେତ୍ରୀଙ୍କ ମଧ୍ୟରୁ କ୍ୟାଟ୍ରିନା ଜଣେ। ଲାଇଫ୍ ଷ୍ଟାଇଲ୍ ଏସିଆ ଅନୁଯାୟୀ, ୨୦୨୩ରେ ତାଙ୍କ ସମ୍ପୂର୍ଣ୍ଣ ସମ୍ପତ୍ତିର ମୂଲ୍ୟ ପ୍ରାୟ ୨୬୩ କୋଟି ଟଙ୍କା। କ୍ୟାଟ୍ରିନା ମାସିକ ପ୍ରାୟ ୩ କୋଟି ଟଙ୍କା ଆୟ କରିଥା’ନ୍ତି। ଗୋଟିଏ ଚଳଚ୍ଚିତ୍ର ଲାଗି ସେ ପ୍ରାୟ ୧୨ କୋଟିରୁ ଊର୍ଦ୍ଧ୍ୱ ପାରିଶ୍ରମିକ ନେଇଥାନ୍ତି। ୨୦୨୨ ମସିହାରେ ସେ ପ୍ରାୟ ୨୩୦ କୋଟିର ମାଲିକାଣୀ ଥିଲେ। ତେବେ ଜାଣିଲେ ଆଶ୍ଚର୍ଯ୍ୟ ଲାଗିବ ଯେ, କ୍ୟାଟ୍ରିନାଙ୍କ ଆୟ ଏତେ ଅଧିକ ଥିବାବେଳେ ଭିକ୍କିଙ୍କ ସମ୍ପତ୍ତି ମାତ୍ର ୪୧ କୋଟି ଟଙ୍କା। ନିକଟରେ କ୍ୟାଟ୍ରିନାଙ୍କ ‘ଟାଇଗର ୩’ ଫିଲ୍ମ ରିଲିଜ୍ ହୋଇଯାଇଛି। ସେଥିରେ ସେ ଜୋୟା ଚରିତ୍ରରେ ନଜରକୁ ଆସିଛନ୍ତି। ଆଗକୁ ତାଙ୍କର ଆଉ ଏକ ଫିଲ୍ମ ‘ମେରି କ୍ରିଷ୍ଟମାସ୍’ ପରଦାକୁ ଆସୁଛି। ତେବେ କ୍ୟାଟ୍ରିନା ୨୦୦୩ରେ ତାଙ୍କ ଫିଲ୍ମ ଜୀବନ ଆରମ୍ଭ କରିଥିଲେ। ସେବେଠାରୁ ସେ ଅନେକ ହିଟ୍ ସିନେମା ପ୍ରଶଂସକଙ୍କୁ ଭେଟି ଦେଇ ଆସିଛନ୍ତି।
