କାଶୀନଗର,୨୧ା୧୧: ଗଜପତି ଜିଲାର ଏକମାତ୍ର ଏନଏସି କାଶୀନଗର ସମସ୍ୟା ଘେରରେ ରହିଛି। ବେଶେଷକରି ଡମ୍ପିଂୟାର୍ଡ ସମସ୍ୟାର ସମାଧାନ ହୋଇପାରୁନଥିବା ଯୋଗୁ ଜନ ଅସନ୍ତୋଷ ବଢିବାରେ ଲାଗିଛି। ସହରରେ ଖୁବ ନିକଟବର୍ତ୍ତୀ ଅଞ୍ଚଳରେ ଉକ୍ତ ସ୍ଥାନ ରହିଛି। ସେଠାକାର ଦୁର୍ଗନ୍ଧ ଦ୍ୱାରା ବାୟୁ ପ୍ରଦୂଷିତ ହେଉଛି। ପଲ ପଲ ଘୁଷୁରି ବି ସେଠାରେ ରହୁଛନ୍ତି। ମଶା ପାଦ୍ରୁଭାବ ବଢ଼ୁଛି। ଡେଙ୍ଗୁ ବ୍ୟାପିବାର ସମ୍ଭାବନା ବୃଦ୍ଧି ପାଉଥିବା ବେଳେ ଏନ୍ଏସି ପ୍ରଶାସନ ଡମ୍ପିଂୟାର୍ଡ ଲାଗି ଅନ୍ୟତ୍ର ଜାଗା ବାଛିବା ସକାଶେ ପଦକ୍ଷେପ ନେଉନାହିଁ। ସୂଚନା ଅନୁସାରେ, ବର୍ତ୍ତମାନ ଆବର୍ଜନା ଫିଙ୍ଗା ଯାଉଥିବା ସ୍ଥାନଟି ଏକ ପଟ୍ଟାଜମି ଓ ତାହା ଜଣଙ୍କର ନାମରେ ରହିଛି। ଅନ୍ୟପକ୍ଷରେ ସ୍ଥାନୀୟ ଲୋକଙ୍କ କହିବା ଅନୁଯାୟୀ କାଶୀନଗର ସହର ରାଜପୁର ଗ୍ରାମ ମଧ୍ୟରେ ଥିବା ସରକାର ଜମିକୁ ଡପିଂୟାର୍ଡ଼ ରୂପେ ବ୍ୟବହାର କରାଗଲେ ସମସ୍ୟା କମିବ। ତେଣୁ ପ୍ରଶାସନ ଏହି ଦିଗରେ ବିଚାର କରିବା ଉଚିତ। ସେହିପରି ମଶା ପାଦ୍ରୁଭାବ ରୋକିବା ପାଇଁ ଧୂଆଁ ଛଡ଼ା ମେସିନ ଥିଲେ ମଧ୍ୟ ତାହା ବ୍ୟବହୃତ ନ ହୋଇ ପଡିରହିଥିବା ଅଭିଯୋଗ ହେଉଛି। ୨ଟି ପୁରୁଣା ଟ୍ରାକ୍ଟର ଇଞ୍ଜିନ ଓ ଡାଲା ୪ ପୁରୁଣା ୱାଟର ଟେଙ୍କର, ଗୋଟିଏ ପାଇଖାନା ଟାଙ୍କି ସଫା କରିବା ମେଶିନ ବିଜୁ କଲ୍ୟାଣ ମଣ୍ଡପ ନିକଟବର୍ତ୍ତୀ ରାସ୍ତା ପାର୍ଶ୍ୱରେ ପଡି ରହି ସହରର ସୌନ୍ଦର୍ଯ୍ୟ ହାନି ଘଟାଉଛି ବୋଲି ମଧ୍ୟ ମତ ପ୍ରକାଶ ପାଇଛି। ତେବେ ପ୍ରଶାସନ ଏଥିପ୍ରତି ଦୃଷ୍ଟି ଦେବାକୁ ଦାବି ହେଉଛି।
