ନୂଆଦିଲ୍ଲୀ,୮।୬: ଅଷ୍ଟ୍ରେଲିଆ-ଇଂଲଣ୍ଡ ବିପକ୍ଷରେ ଦମ୍ଦାର ବ୍ୟାଟିଂ କରି ପ୍ରଶଂସିତ ହୋଇଥିଲେ ଭାରତୀୟ ଉଇକେଟକିପର ବ୍ୟାଟ୍ସମ୍ୟାନ୍ ଋଷଭ ପନ୍ତ। ଆଇପିଏଲ୍ ଆରମ୍ଭ ହେବା ପୂର୍ବରୁ ସେ ଅନେକ ଉଲ୍ଲେଖନୀୟ ପାଳି ଖେଳିଥିଲେ। ଏବେ ପନ୍ତ ଇଂଲଣ୍ଡ ଗସ୍ତରେ ଥିବା ବେଳେ ସେ ଭଲ ପ୍ରଦର୍ଶନ କରିବେ ବୋଲି ଆଶା ଥିବା ଉଇକେଟକିପର-ବ୍ୟାଟ୍ସମ୍ୟାନ୍ ଦିନେଶ କାର୍ତ୍ତିକ କହିଛନ୍ତି। ଏହାଛଡ଼ା ଭବିଷ୍ୟବାଣୀ କରି ପନ୍ତ ଭାରତ ପାଇଁ ୧୦୦ ଟେଷ୍ଟ ଖେଳିବେ ବୋଲି ସେ କହିଛନ୍ତି।
ସ୍ପୋଟ୍ସ ଟୁଡେ ସହ ସାକ୍ଷାତକାରରେ କାର୍ତ୍ତିକ କହିଛନ୍ତି, ମୋତେ ଲାଗୁଛି କିଛି ସମୟ ଧରି ଲୟରେ ଅଛନ୍ତି ପନ୍ତ। କିଛି ପ୍ରଶଂସନୀୟ ପାଳି ସେ ଖେଳିଛନ୍ତି। ବିଶ୍ୱକପ୍ ଫାଇନାଲ ହେଉ ଅଥବା ଆଇପିଏଲ୍ ଫାଇନାଲ। ଚାପରେ ଥାଇ ମଧ୍ୟ ସେ ଭଲ ଖେଳି ପାରନ୍ତି। ସେ ଏଭଳି ଜଣେ ଖେଳାଳି ଯିଏ ସବୁ ଚ୍ୟାଲେଞ୍ଜ ପାଇଁ ପ୍ରସ୍ତୁତ ଥାନ୍ତି। ଏହି ଚିନ୍ତାଧାରା ଯୋଗୁ ସେ ଦଳକୁ ମ୍ୟାଚ୍ ଜିତାଇବାରେ ସହାୟତା କରିବା ଲାଗି ମଉକା ଖୋଜି ପାଇଥାନ୍ତି। ଏସବୁକୁ ଦେଖିଲେ ଭାରତୀୟ କ୍ରିକେଟର ସେ ଜଣେ ଅଭିନ୍ନ ଅଙ୍ଗ ହୋଇ ରହିବେ। ସେ ୧୦୦ ଟେଷ୍ଟ ମ୍ୟାଚ୍ ଖେଳିଥିବା ଖେଳାଳିଙ୍କ ମଧ୍ୟରୁ ନିଶ୍ଚିତ ଭାବେ ଜଣେ ହେବେ। ଏହାଛଡ଼ା ସେ ସୀମିତ ଓଭର କ୍ରିକେଟ ମଧ୍ୟ ଖେଳିବେ ବୋଲି କାର୍ତ୍ତିକ କହିଛନ୍ତି।
