ବେଙ୍ଗାଲୁରୁ,୨୪।୧୨: କର୍ନାଟକ ମାଣ୍ଡ୍ୟା ଜିଲାର ଏକ ସ୍କୁଲରେ ଗୁରୁବାର ଖ୍ରୀଷ୍ଟମାସ ପାଳନକୁ ବନ୍ଦ କରି ଦେଇଛନ୍ତି ହିନ୍ଦୁତ୍ୱବାଦୀ ଗୋଷ୍ଠୀର କର୍ମକର୍ତ୍ତା। ସେମାନେ ସ୍କୁଲ ଭିତରେ ପସି ଅଧିକାରୀଙ୍କୁ ଧମକ ଦେଇଥିଲେ। ସମ୍ପୂର୍ଣ୍ଣ ଘଟଣା କଏଦ ହୋଇଛି ଭିଡିଓ ଏବେ ଭାଇରାଲ ହେଉଛି।
ନିର୍ମଳା ଇଂଲିଶ ହାଇସ୍କୁଲ ଓ କଲେଜ ପ୍ରଧାନଶିକ୍ଷୟତ୍ରୀଙ୍କ ଅନୁଯାୟୀ, ଛାତ୍ରୀଛାତ୍ରମାନେ ସ୍କୁଲରେ ଖ୍ରୀଷ୍ଟମାସ ପାଳନ କରୁଥିବା ବେଳେ ଦକ୍ଷଣପନ୍ଥୀ ଗୋଷ୍ଠୀର କିଛି ସଦସ୍ୟ ସ୍କୁଲ ପରିସରକୁ ପସି ଆସିଥିଲେ।
“ଆମେ ପ୍ରତିବର୍ଷ ଖ୍ରୀଷ୍ଟମାସ ପାଳନ କରୁ। କିନ୍ତୁ ମହାମାରୀ ଜନିତ କଟକଣା କାରଣରୁ ଆମେ ଚଳିତ ବର୍ଷ ପାଳନ ନ କରିବାକୁ ନିଷ୍ପତ୍ତି ନେଇଛି। କିଛି ଛାତ୍ରୀଛାତ୍ର ଛୋଟ ଆକାରରେ ଏକ ଉତ୍ସବ ଆୟୋଜନ କରିଥିଲେ। ସେମାନେ ନିଜ ଆଡ଼ୁ ଟଙ୍କା ଆଦାୟ କରି ଅର୍ଡର କରିଥିଲେ କେକ୍। ଏହା ଉପରେ ସେମାନଙ୍କ ମଧ୍ୟରୁ ଜଣଙ୍କ ଅବିଭାବକ ପ୍ରଶ୍ନ ଉଠାଇଥିଲେ” ବୋଲି ପ୍ରଧାନଶିକ୍ଷୟତ୍ରୀ କନିକା ଫ୍ରାନ୍ସିସ ମେରି କହିଛନ୍ତି।
ସ୍କୁଲରେ ଖ୍ରୀଷ୍ଟିଆନ ଧର୍ମର ପ୍ରଚାର ଚାଲିଥିବା ଦକ୍ଷିଣପନ୍ଥୀ ଗୋଷ୍ଠୀକୁ ସୂଚନା ଦେଇଥିଲେ ଉକ୍ତ ଅବିଭାବକ। ସେମାନେ ହିନ୍ଦୁ ପର୍ବ ପାଳନ କରୁ ନାହାନ୍ତି। କିନ୍ତୁ ଖ୍ରୀଷ୍ଟମାସ ପାଳନ କରୁଥିବା କହିଥିଲେ। ଏହା ଜାଣିବା ପରେ ହିନ୍ଦୁତ୍ୱ ଗୋଷ୍ଠୀର କର୍ମକର୍ତ୍ତା ସ୍କୁଲ ମଧ୍ୟକୁ ପସି ଆସି ପ୍ରଶ୍ନ କରିଥିଲେ ସ୍କୁଲ ମ୍ୟାନେଜମେଣ୍ଟଙ୍କୁ। ଭିଡିଓରେ ଜଣେ ବ୍ୟକ୍ତି ସ୍କୁଲ ଅଧିକାରୀଙ୍କୁ ପଚାରିଥିଲେ, ସ୍କୁଲ ପରିସରରେ କାହିଁକି ହିନ୍ଦୁ ପର୍ବ ପାଳନ କରାଯାଉ ନାହିଁ?
ଅନ୍ୟ ଜଣେ ବ୍ୟକ୍ତି ଧମକ ଦେଇ କହୁଛନ୍ତି, ଆମେ ଏହି ନିଷ୍ପତ୍ତି ତୁମ ଉପରେ ଛାଡ଼ୁଛୁ। ଯଦି ଆମେ ପରିସ୍ଥିତି ହାତକୁ ନେବୁ, ତେବେ ଦୃଶ୍ୟ ଭିନ୍ନ ହେବ।
