ବେଙ୍ଗାଲୁରୁ, ୧।୪: ମେ’ ୧୦ରେ ବିଧାନସଭା ନିର୍ବାଚନ ହେବାକୁ ଯାଉଥିବା କର୍ନାଟକରେ ଆଦର୍ଶ ଆଚରଣ ବିଧି ଲାଗୁ ହୋଇଛି। ଏଥିସହିତ ସେଠାରେ ଗାଡ଼ିମୋଟର ଯାଞ୍ଚକୁ ଜୋର୍ଦାର କରାଯାଇଛି। ଶୁକ୍ରବାର ମୁଖ୍ୟମନ୍ତ୍ରୀ ବାସବରାଜ ବୋମାଇ ଚିକ୍କାବାଲ୍ଲାପୁର ଜିଲାର ଏକ ମନ୍ଦିରକୁ ଯାଉଥିବାବେଳେ ତାଙ୍କ କାର୍କୁ ନିର୍ବାଚନ ଅଧିକାରୀମାନେ ଅଟକାଇ ଯାଞ୍ଚ କରିଛନ୍ତି। ଏହି ଯାଞ୍ଚ ସମୟର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି। ସୂଚନା ଅନୁଯାୟୀ ନିର୍ବାଚନ ତାରିଖ ଘୋଷଣା ହେବା ପରେ ବୋମାଇ ତାଙ୍କ ସରକାରୀ କାର୍କୁ ଫେରାଇ ଦେଇଥିଲେ। ଶୁକ୍ରବାର ସେ ଏକ ଘରୋଇ କାର୍ରେ ଗାଟି ସୁବ୍ରମଣ୍ୟ ମନ୍ଦିର ଯାଉଥିବାବେଳେ ହୋସାହୁଦ୍ୟା ଚେକ୍ପୋଷ୍ଟରେ ଏହାକୁ ଅଟକା ଯାଇଥିଲା। କୌଣସି ଆପତ୍ତି ଜନକ ଜିନିଷ ନ ବାହାରିବାରୁ ଅଧିକାରୀ ମାନେ କାର୍କୁ ଛାଡ଼ି ଦେଇଥିଲେ।
