ଢେଙ୍କାନାଳ ଅଫିସ,୫ା୧୦ ଅନୁଗୋଳ ଜିଲା ସାତକୋଶିଆ ବନଖଣ୍ଡ ବାଘ କରିଡର ଢେଙ୍କାନାଳ ଜିଲାକୁ ସମ୍ପ୍ରସାରିତ ହେବ। ଢେଙ୍କାନାଳ ଜିଲା ବନଖଣ୍ଡ ଅଧୀନରେ ଥିବା ହିନ୍ଦୋଳ ରେଞ୍ଜ୍ର କନ୍ଧରା ଓ ନନ୍ଦିନିଆ ସଂରକ୍ଷିତ ଜଙ୍ଗଲକୁ ଏହି କରିଡରରେ ଅନ୍ତର୍ଭୁକ୍ତ କରିବା ପାଇଁ ସରକାରଙ୍କୁ ପ୍ରସ୍ତାବ ଦିଆଯାଇଛି। ଏହା ଅନୁମୋଦନ ଲାଭ କଲେ ଢେଙ୍କାନାଳ ଜିଲାର ଏହି ଦୁଇଟି ସଂରକ୍ଷିତ ଜଙ୍ଗଲ ସମ୍ପୂର୍ଣ୍ଣ ଭାବେ ସାତକୋଶିଆ ବନଖଣ୍ଡ ଅଧୀନକୁ ଚାଲିଯିବ।
ପ୍ରକାଶ ଯେ, ହିନ୍ଦୋଳ ରେଞ୍ଜ୍ର ନନ୍ଦିନିଆ ଓ କନ୍ଧରା ସଂରକ୍ଷିତ ଜଙ୍ଗଲ ସାତକୋଶିଆ ଅଭୟାରଣ୍ୟ ସୀମାକୁ ଲାଗିକରି ରହିଛି। ଫଳରେ ସାତକୋଶିଆରୁ ନନ୍ଦିନିଆ ଓ କନ୍ଧରା ବାଘଙ୍କ ଚଲାପଥ ଭାବେ ଚିହ୍ନଟ ହୋଇଛି। ଏହାକୁ ଦୃଷ୍ଟିରେ ରଖି ସାତକୋଶିଆ ବନଖଣ୍ଡ ବାଘ କରିଡରରେ ଏହି ଦୁଇଟି ସଂରକ୍ଷିତ ଜଙ୍ଗଲକୁ ଅନ୍ତର୍ଭୁକ୍ତ କରିବା ପାଇଁ ସାତକୋଶିଆ ବନଖଣ୍ଡ ଅଧିକାରୀ ପ୍ରସ୍ତାବ ଦେଇଥିବା ଢେଙ୍କାନାଳ ଜିଲା ବନଖଣ୍ଡ ସୂତ୍ରରୁ ଜଣାପଡିଛି। ଏଥିସହିତ ଆସନ୍ତା ବର୍ଷଠାରୁ ଢେଙ୍କାନାଳ ଜିଲାରେ ବାଘ ଗଣନା ପାଇଁ ପ୍ରକ୍ରିୟା ଆରମ୍ଭ ହୋଇଛି। ବର୍ତ୍ତମାନ ଢେଙ୍କାନାଳ ଜିଲାର ବିଭିନ୍ନ ସଂରକ୍ଷିତ ଜଙ୍ଗଲରେ ପ୍ରାୟ ୭ଟି ଲିଓପାର୍ଡ ରହିଥିବା ଜଣାପଡିଛି। ୬୦ଟି ଟ୍ରାପ୍ କ୍ୟାମେରା ମଧ୍ୟରୁ କିଛି କ୍ୟାମେରାରେ ବାଘ ଜଙ୍ଗଲ ମଧ୍ୟରେ ଚଲାବୁଲା କରୁଥିବା ଚିତ୍ର ଉତ୍ତୋଳନ ହୋଇଛି। ତେବେ କିଛିଦିନ ତଳେ ୩ଟି ଟ୍ରାପ କ୍ୟାମେରା ଶିକାରୀମାନେ ଚୋରି କରି ନେଇଥିବା ସନ୍ଦେହ କରାଯାଉଥିବାରୁ ବନବିଭାଗ ଏହାର ତଦନ୍ତ କରୁଛି। ବାଘ ଗଣନା ପୂର୍ବରୁ ବନ କର୍ମଚାରୀମାନଙ୍କୁ ତାଲିମ ଦିଆଯିବ। ଜିଲାରେ ଥିବା ସଂରକ୍ଷିତ ଜଙ୍ଗଲଗୁଡିକରେ ବାଘ ସଂଖ୍ୟା ବୃଦ୍ଧି କରିବା ପାଇଁ ବନବିଭାଗ ପକ୍ଷରୁ ଉଦ୍ୟମ ଜାରି ରହିଛି। ଏଥିପାଇଁ ଜଙ୍ଗଲ ମଧ୍ୟରେ ତୃଣଭୋଜି ପ୍ରାଣୀଙ୍କ ସଂଖ୍ୟା ବୃଦ୍ଧି ସହ ବିଭିନ୍ନ କିସମର ଘାସ ଲଗାଯିବାର ଯୋଜନା କରାଯାଉଛି। ଗ୍ରୀଷ୍ମ ଋତୁ ପୂର୍ବରୁ ଜଙ୍ଗଲ ମଧ୍ୟରେ ପୋଖରୀ ଓ ଜଳାଶୟ ବ୍ୟବସ୍ଥା କରାଯିବ। ଶିକାରୀ କବଳରୁ ବାଘ ସହ ଅନ୍ୟ ବନ୍ୟପ୍ରାଣୀଙ୍କ ସୁରକ୍ଷା ପାଇଁ ପାଟ୍ରୋଲିଂକୁ କଡାକଡି କରାଯାଇଛି। ପ୍ରତିମାସରେ ଟ୍ରାପ କ୍ୟାମେରାର ଚିତ୍ର ଗୁଡିକୁ ଯାଞ୍ଚ କରାଯାଉଛି। ସେହିପରି କପିଳାସ ଅଭୟାରଣ୍ୟରେ ପର୍ଯ୍ୟଟକଙ୍କ ଆକର୍ଷଣ ପାଇଁ ସଫାରି ବ୍ୟବସ୍ଥା ଆରମ୍ଭ ହେବ। ପର୍ଯ୍ୟଟକଙ୍କୁ ଅଭୟାରଣ୍ୟର ୧୦ କିଲୋମିଟର ମଧ୍ୟରେ ବୁଲାଇବା ପାଇଁ ଗାଡିର ବନ୍ଦୋବସ୍ତ କରାଯିବ। ସରକାରଙ୍କୁ ଏ ସଂକ୍ରାନ୍ତରେ ଜଣାଇ ଦିଆଯାଇଛି। ଜିଲା ବନଖଣ୍ଡ ଅଧିକାରୀ ଡା. ପ୍ରକାଶଚାନ୍ଦ ଗୋଗିନେନି କହିଛନ୍ତି, ସାତକୋଶିଆ ବ୍ୟାଘ୍ର କରିଡରରେ ନନ୍ଦିନିଆ ଓ କନ୍ଧରା ସଂରକ୍ଷିତ ଜଙ୍ଗଲକୁ ଅନ୍ତର୍ଭୁକ୍ତ କରିବା ନିମନ୍ତେ ପ୍ରସ୍ତାବ ଯାଇଛି। ଢେଙ୍କାନାଳ ଜିଲାରେ ବାଘ ଗଣନା ପାଇଁ ପ୍ରସ୍ତୁତି ଆରମ୍ଭ ହୋଇଛି। କପିଳାସ ଅଭୟାରଣ୍ୟରେ ସଫାରି ବ୍ୟବସ୍ଥା ନିମନ୍ତେ ଜଙ୍ଗଲ ମଧ୍ୟରେ ପାହାଡ ଦେଇ ଯାଇଥିବା ରାସ୍ତାକୁ ମରାମତି କରାଯାଉଛି।
