ଫୁଲବାଣୀ ଅଫିସ, ୨୮ା୧: କନ୍ଧମାଳ ଜିଲାର ପ୍ରାକୃତିକ ସୌନ୍ଦର୍ଯ୍ୟ ସମସ୍ତଙ୍କୁ ବିମୋହିତ କରିଛି । ଆଦିବାସୀଙ୍କ ନିଷ୍ପାପ ପ୍ରେମ ସମସ୍ତଙ୍କୁ ଋଣୀ କରିଛିା ସରଳ ଆଦିବାସୀଙ୍କ ଦେଶପ୍ରେମ ବିଷୟରେ ସମସ୍ତେ ଜାଣନ୍ତିନାହିଁ । ଜୀବନକୁ ଉତ୍ସର୍ଗ କରି ଏହି ମାଟିର କେତେ ବୀର ପୁରୁଷ ଦେଶ ସ୍ବାଧୀନ ପାଇଁ ବଳି ପଡିଛନ୍ତି। କେବଳ ଏତିକି ନୁହେଁ, ଓଡିଆ ଭାଷାକୁ କନ୍ଧମାଳର ଅବଦାନ ଅତୁଳନୀୟ ବୋଲି ଜିଲା ମହୋତ୍ସବର ତୃତୀୟ ସନ୍ଧ୍ୟାରେ ମୁଖ୍ୟଅତିଥି ଭାବେ ଯୋଗଦେଇ ରାଜ୍ୟ ସରକାରଙ୍କ ସ୍ବତନ୍ତ୍ର ବିକାଶ ପରିଷଦ ଉପଦେଷ୍ଟା ପ୍ରଦୀପ ମାଝି ପ୍ରକାଶ କରଛନ୍ତି। ସେହିପରି ସମ୍ମାନିତ ଅତିଥି ଭାବେ ଗଜପତି ସ୍ବତନ୍ତ୍ର ଉନ୍ନୟନ ପରିଷଦ ଅଧ୍ୟକ୍ଷା ମାରିୟମ ରାଇତୋ, ନବରଙ୍ଗପୁର ସ୍ବତନ୍ତ୍ର ଉନ୍ନୟନ ପରିଷଦ ଅଧ୍ୟକ୍ଷ ଉପେନ୍ଦ୍ର ଗଣ୍ଡ, କନ୍ଧମାଳ ସ୍ବତନ୍ତ୍ର ଉନ୍ନୟନ ପରିଷଦ ଅଧ୍ୟକ୍ଷ ରୋଦନ ମଲ୍ଲିକ ପ୍ରମୁଖ ଯୋଗଦେଇ କହିଥିଲେ ଆଦିବାସୀ ସଂସ୍କୃତି, ପରମ୍ପରା ଉଦ୍ଜୀବୀତ ରଖିବା, ଏହି ଜାତିକୁ ଆଗେଇ ନେବା ପାଇଁ ରାଜ୍ୟ ସରକାର ବହୁ ପଦକ୍ଷେପ ନେଇଛନ୍ତି। ସେଥିମଧ୍ୟରୁ ସ୍ବତନ୍ତ୍ର ଉନ୍ନୟନ ପରିଷଦ ଅନ୍ୟତମ । ଆଗକୁ ଆଦିବାସୀଙ୍କ ଉନ୍ନତି ପାଇଁ ବହୁ କାର୍ଯ୍ୟ କରାଯିବ ବୋଲି ସେ ପ୍ରକାଶ କରଛନ୍ତି। ଫୁଲବାଣୀ ସମନ୍ବିତ ଆଦିବାସୀ ଉନ୍ନୟନ ସଂସ୍ଥା ପ୍ରକଳ୍ପ ପ୍ରଶାସକ ନରେଶ ଚନ୍ଦ୍ର ଶବର ଅତିଥିମାନଙ୍କୁ ସ୍ବାଗତ କରିଥିଲେ । ସାଂସ୍କୃତିକ କାର୍ଯ୍ୟକ୍ରମରେ ଆସାମ ବିହୁ ନୃତ୍ୟ, ପଶ୍ଚିମବଙ୍ଗ ପିରୁଲିୟା ଛଉ, ବୌଦ୍ଧର ମହୁଲ ବେଟା ନୃତ୍ୟ, ନୟାଗଡ ପଶୁ ନୃତ୍ୟ, କଳାହାଣ୍ଡି ଘୁମୁରା, ବାଲେଶ୍ୱର ଚଢ଼େୟା-ଚଢ଼େୟାଣୀ, ରାୟଗଡା ଢ଼େମସା, ମାଳକାନଗିରି ଦୁରୁଆ ସମେତ ଜିଲାର ବିଭିନ୍ନ ବ୍ଲକର ଲୋକ ନୃତ୍ୟ ଏବଂ ସଂଗୀତ ବିଚିତ୍ରା ପରିବେଷଣ କରା ଯାଇଥିଲା । ସମ୍ବଲପୁର ମା’ ଆଦିଶକ୍ତି ଗ୍ରୁପ ଅର୍ଚ୍ଚନା ପାଢ଼ୀଙ୍କ ସଂଗୀତ ଯାଦୁରେ ଦର୍ଶକ ଝୁମିଥିଲେ ।
