ନବରଙ୍ଗପୁର/କୋଡିଙ୍ଗା, ୨୮।୧୦(ବି.ପ୍ର./ଡି.ଏନ୍.ଏ.): ରାଜ୍ୟ ଓ କେନ୍ଦ୍ର ସରକାରଙ୍କ ଅନେକ ଜନକଲ୍ୟାଣ ଯୋଜନା ରହିଛି। ଏହାର ତଦାରଖ କରିବା ପାଇଁ ପଞ୍ଚାୟତରୁ ଜିଲା ଓ ରାଜ୍ୟସ୍ତର ପର୍ଯ୍ୟନ୍ତ ଅନେକ ପଦାଧିକାରୀ ଓ ସଚିବ ଅଛନ୍ତି। ଅନ୍ୟପକ୍ଷେ କେନ୍ଦ୍ର ଓ ରାଜ୍ୟର ଶାସକ ଦଳ ଗାଁ ଗାଁରେ ପଦଯାତ୍ର କରି ସରକାରୀ ଯୋଜନାର ସଚେତନ କରାଉଛନ୍ତି। ବିରୋଧି ଦଳଗୁଡିକ ସରକାରଙ୍କୁ ଟାର୍ଗେଟ କରି ଯୋଜନାର ବିଫଳତା ନେଇ ହୁଙ୍କାର ଛାଡୁଛନ୍ତି। ତେବେ ନବରଙ୍ଗପୁର ଜିଲାରେ ବିରୋଧି ଦଳଗୁଡିକ ଦୁର୍ବଳ ଥିବାରୁ ନିଷ୍ପେଷିତ, ଅସହାୟ, ନିର୍ଯ୍ୟାତିତ ଓ ଠକାମିର ଶିକାର ହୋଇଥିବା ଲୋକଙ୍କ ପାଇଁ କଣ୍ଠ ଦବି ଯାଇଛି। ସରକାରୀ ଯୋଜନାର ଅର୍ଥ ହଡପ ହୋଇ ଯାଉଥିଲେ ମଧ୍ୟ ଶାସକ ଦଳର ନେତାଙ୍କ ଦୃଷ୍ଟି ନ ପଡିବା, କେବଳ ଯୋଜନା ଗୁଡିକ ପଦଯାତ୍ରରେ ବଖାଣିବା ଏବେ ବିଡମ୍ବନାର ବିଷୟ ପାଲଟିଛି।
ନବରଙ୍ଗପୁର ଜିଲା ଏକ ଆଦିବାସୀ ଅଧ୍ୟୁଷିତ ଅଞ୍ଚଳ। ଜିଲାର କୋଷାଗୁମୁଡା ବ୍ଲକ ଅଧୀନ ଉପାନ୍ତ ଏକରି ପଞ୍ଚାୟତର ସଦର, ଅଲେଖଗୁଡା, ନୁନ୍ ପାଣି, ପୁଜାରୀଗୁଡା ସମେତ ୭ ଖଣ୍ଡ ଗାଁର ୨ଶହରୁ ଊର୍ଦ୍ଧ୍ୱ ଚାଷୀଙ୍କ କାଳିଆ ଯୋଜନା ଓ ପ୍ରଧାନମନ୍ତ୍ରୀ କିଷାନ ନିଧି ଯୋଜନା ଟଙ୍କା ୨୦୧୯ ପରଠାରୁ ସେମାନଙ୍କ ଅଜାଣତରେ ଜଣେ ଯୋଗାଣ ସହାୟକ ଚଞ୍ଚକତା କରି ଉଠାଇ ନେଇଥିବା ଅଭିଯୋଗ ହୋଇଛି। ପଡିକାର୍ଡଗୁଡିକରେ ଆଧାର ସଂଯୋଗୀକରଣ ହେବ ବୋଲି ହିତାଧିକାରୀଙ୍କ ଆଧାର ଓ ଭୋଟ ପରିଚୟପତ୍ର ମାଗି ନେଇଥିଲେ। ପରେ ହିତାଧିକାରାରୀଙ୍କ ବ୍ୟାଙ୍କ ଆକାଉଣ୍ଟଗୁଡିକରେ କେୱାସି ଅପ୍ଡେଟ୍ କରି ଚଞ୍ଚକତା କରିଥିବା ଏକ ବିଶେଷ ସୂତ୍ରରୁ ଜଣାପଡିଛି। ୨୦୧୯ ବେଳକୁ ପ୍ରତି ହିତାଧିକାରୀଙ୍କ ଆକାଉଣ୍ଟକୁ କାଳିଆ ଯୋଜନାର ସହାୟତା ରାଶି ଦୁଇ କିସ୍ତିରେ ୬ ହଜାର ଟଙ୍କା ଓ ପିଏମ କିଷାନ ଯୋଜନାରୁ ଦୁଇ କିସ୍ତିରେ ୪ହଜାର ଟଙ୍କା ଆସୁଥିଲା। ପରବର୍ତ୍ତୀ ସମୟରେ ଅନୁଦାନ ରାଶି ନ ପାଇ ଅଲେଖଗୁଡା ଗାଁର ଚାଷୀମାନେ କୃଷି ବିଭାଗକୁ ଯାଇ ପଚାରିଥିଲେ। ସେମାନଙ୍କ ଟଙ୍କା ବ୍ୟାଙ୍କ ଆକାଉଣ୍ଟକୁ ଯାଇଥିବା ଅଧିକାରୀ ଜଣଙ୍କ କହିଥିବା ସହ ତାହାର ଏକ ନକଲ ମଧ୍ୟ ଦେଇଥିଲେ। ଚଞ୍ଚକତା କରି ସେମାନଙ୍କ ନାମରେ ଆଉ ଗୋଟିଏ ଲେଖାଏ ବ୍ୟାଙ୍କ ଆକାଉଣ୍ଟ ଖୋଲା ଯାଇଥିବା ଚାଷୀମାନେ ଜାଣିବାକୁ ପାଇଥିଲେ। ଏହାପରେ ଚାଷୀ ବୁଦ୍ରୀ ଭତରା, ମଙ୍ଗଳଦେଇ ଭତରା, ସନମତି ଭତରା, ସନାଇ ଭତରାଙ୍କ ସମେତ ଅନ୍ୟ ମହିଳା ଚାଷୀମାନେ କୋଡିଙ୍ଗା ଥାନାରେ ୨୩ ତାରିଖରେ ଲିଖିତ ଅଭିଯୋଗ କରିଥିଲେ। କେତେକ ହିତାଧିକାରୀଙ୍କ ଏଟିଏମ୍ ଓ କିଓସ୍କ ବ୍ୟାଙ୍କରେ ଟିପ ଚିହ୍ନ ବ୍ୟବହାର କରି ଟଙ୍କା ଉଠାଯାଇଥିବା ଅଭିଯୋଗ ହୋଇଛି। ଚାଷୀମାନେ କାଳିଆ ଟଙ୍କା ଖାତାକୁ ଆସି ନ ଥିବା ନେଇ ୩ବର୍ଷ ମଧ୍ୟରେ ଅନେକ ଥର ଯାଇ ପଚାରିଛନ୍ତି। ବାୟୋମେଟ୍ରିକ ମେଶିନରେ ଟିପ ଚିହ୍ନ ନେଇ ଆକାଉଣ୍ଟ ଯାଞ୍ଚ ଟଙ୍କା ଉଠାଇ ଜଣେ ବ୍ୟକ୍ତି ହଡପ କରିଛନ୍ତି। ଚାଷୀଙ୍କ ଟଙ୍କା ଉଠାଇବା ପାଇଁ ଯେଉଁ ଚଞ୍ଚକତା ହୋଇଛି ସେଥିରେ ଆଉ କିଛି ଗୋଷ୍ଠୀ ସାମିଲ ଥିବା ମଧ୍ୟ ଅଭିଯୋଗ ହେଉଛି। ଅନ୍ୟପକ୍ଷେ ସଠିକ ଆକାଉଣ୍ଟରେ ଟଙ୍କା ଥିଲେ ମଧ୍ୟ ଆକାଉଣ୍ଟରେ ଯାଞ୍ଚ ନାଁରେ ଉଠାଇ ହଡପ ହୋଇଥିବା ଜଣାପଡିଛି ା ଏନେଇ କୋଷାଗୁମୁଡା ବିଡିଓ ସୁକାନ୍ତ କୁମାର ପଟ୍ଟନାୟକଙ୍କୁ ପଚାରିବାରୁ ଚାଷୀମାନେ ମୌଖିକ ଅଭିଯୋଗ କରିଥିଲେ। ତଥାପି କୃଷି ବିଭାଗ କର୍ମଚାରୀଙ୍କୁ ନେଇ ଏକ ଟିମ ଗଠନ କରି ଘଟଣାର ତଦନ୍ତ ସହ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି।
