ପାଟଣା,୨୫।୫(ସ୍ବ.ପ୍ର ): କେନ୍ଦୁଝର ଜିଲା ପାଟଣା ବ୍ଲକ ତୁରୁମୁଙ୍ଗା ଅଞ୍ଚଳରେ କାଳବୈଶାଖୀ ପ୍ରଭାବରେ ପ୍ରବଳ ବର୍ଷା ସହ ଝଡ଼ ତୋଫାନ ହୋଇଛି। ଏହା ଯୋଗୁ କଇଣ୍ଡା ଗ୍ରାମରେ ବୁଧବାର ରାତ୍ରି ୧୨ରୁ ଉର୍ଦ୍ଧ ଘରର ଆଜବେଷ୍ଟସ ଓ ଛପର ଘରର ଛପର ଉଡିଯାଇଛି। ପବନର ବେଗ ଏତେ ପ୍ରଖର ଥିଲା ଯେ, ବଡ଼ ବଡ଼ ଗଛ ସବୁ ଉପୁଡି ପଡି ଯାଇଛି । ଘର ଉପରେ ଗଛ ପଡି ଘରର ଛପର ସହ ଆଜବେଷ୍ଟସ ଭାଙ୍ଗି ନଷ୍ଟ ହୋଇଛି। ଫଳରେ ଗାଈଗୋରୁ ଚାପି ହୋଇ ରହିଥିଲେ। ଏଥିସହ ଟିଣ ଛପର ଉଡି ଯାଇ ଗଛ ଡାଳରେ ଲଟକି ଥିବା ଦେଖିବାକୁ ମିଳିଛି। କାଳବୈଶାଖୀ ଯୋଗୁ ବିଦ୍ୟୁତ ଖୁଣ୍ଟ ପଡିଯିବାରୁ ଅଞ୍ଚଳରେ ବିଦ୍ୟୁତ ସେବା ମଧ୍ୟ ଠପ ହୋଇ ପଡିଛି । ଖବର ପାଇ ତୁରୁମୁଙ୍ଗା ସରପଞ୍ଚ ସୁଲେଖା ନାଏକ କ୍ଷତିଗ୍ରସ୍ତଙ୍କ ନିକଟରେ ପହଞ୍ଚି ତୁରନ୍ତ କ୍ଷତିପୂରଣ ଯୋଗାଇ ଦେବାକୁ ପ୍ରଶାସନ ନିକଟରେ ଦାବି କରିଛନ୍ତି। ଗ୍ରାମର ଗୋବିନ୍ଦ ଦେହୁରୀ, ଚିତ୍ରସେନ ବେହେରା, କଂସଲା ବେହେରା, ସରସ୍ବତୀ ବେହେରା, ଭାଗବତ ବେହେରା, ଧ୍ୟାନ ବେହେରା, ରବୀନ୍ଦ୍ର ବେହେରା, କୃଷ୍ଣଚନ୍ଦ୍ର ବେହେରା, ଉଗ୍ରେସନ ବେହେରା, ମଣ୍ଟୁ ବେହେରାଙ୍କ ଘରର ଛପର ଉଡି ଯାଇଥିବା ବେଳେ ଜନ୍ମେଜୟ ବେହେରାଙ୍କ ଛପର ଘର ଉପରେ ଏକ ବିରାଟ ଶିମିଳି ଗଛ ଖସି ପଡିଥିବାରୁ ଦୁଇ ବଖରା ଘର ସମ୍ପୂର୍ଣ୍ଣ ନଷ୍ଟ ହୋଇଯାଇଛି l
