ବଳଙ୍ଗା/ପିପିଲି/ନିମାପଡ଼ା, ୨୬।୫(ଡି.ଏନ୍.ଏ./ସ୍ବ.ପ୍ର.): କାଳବୈଶାଖୀ ପ୍ରଭାବରେ ଗୁରୁବାର ବଳଙ୍ଗା ଅଞ୍ଚଳରେ ବ୍ୟାପକ କ୍ଷୟକ୍ଷତି ହୋଇଛି। ଘଡ଼ଘଡ଼ି ସହ କୁଆପଥର ବର୍ଷା ସାଙ୍ଗକୁ ପ୍ରବଳ ବେଗରେ ପବନ ବହିବାରୁ ଅଞ୍ଚଳର ବିଭିନ୍ନ ଗ୍ରାମ ଓ ମୁଖ୍ୟ ରାସ୍ତାରେ ଥିବା ବଡ଼ ବଡ଼ ଗଛ ଉପୁଡ଼ି ରାସ୍ତାରେ ପଡ଼ିବାରୁ ଯାତାୟାତ ବାଧାପ୍ରାପ୍ତ ହୋଇଥିଲା। ବଳଙ୍ଗା ବଜାରରେ ଥିବା ଅନେକ କ୍ୟାବିନ ଓ ଉଠାଦୋକାନୀଗୁଡ଼ିକ ନଷ୍ଟ ହୋଇଯାଇଛି। ଗ୍ରାମାଞ୍ଚଳର କେତେକ ଚାଳଘରର ଛପର ଉଡ଼ିଯାଇଛି। ଅନ୍ୟ ୪ କ୍ୟାବିନ ରାସ୍ତା ତଳକୁ ଓଲଟି ପଡ଼ି ଭିତରେ ଥିବା ସମସ୍ତ ଆସବାବପତ୍ର ନଷ୍ଟ ହୋଇଯାଇଛି। ଅନେକ ସ୍ଥାନରେ ବିଦ୍ୟୁତ୍ ତାର ଛିଣ୍ଡି ପଡ଼ିବାରୁ ବିଦ୍ୟୁତ୍ ସରବରାହ ବନ୍ଦ ହୋଇଯାଇଛି। ନିମାପଡ଼ାରୁ ଅଗ୍ନିଶମବାହିନୀ ଘଟଣାସ୍ଥଳରେ ପହଞ୍ଚି ଭଙ୍ଗା ଗଛକୁ କାଟି ରାସ୍ତା ସଫା କରିଥିଲେ। ସରକାରୀ ସ୍ତରରେ କ୍ଷୟକ୍ଷତି ଆକଳନ ପୂର୍ବକ ସରକାରଙ୍କ ପକ୍ଷରୁ ସହାୟତା ଯୋଗାଇ ଦେବାକୁ ବଳଙ୍ଗା ଅଞ୍ଚଳବାସୀ ଦାବି କରିଛନ୍ତି। ସେହିପରି କାଳବୈଶାଖୀ ପ୍ରଭାବରେ ପିପିଲି ସବ୍ଡିଭିଜନର ଏକାଧିକ ସ୍ଥାନରେ ବିଦ୍ୟୁତ୍ ତାର ଛିଡ଼ି ସରବରାହ ବନ୍ଦ ରହିଥିଲା। ପିପିଲି ସମେତ ବିଭିନ୍ନ ପଞ୍ଚାୟତରେ ବଡ଼ ବଡ଼ ଗଛ ଡାଳ ଭାଙ୍ଗି ଦୋକାନ ଘର ଭାଙ୍ଗିଯାଇଛି। ପ୍ରବଳ ବେଗରେ ବର୍ଷା ପବନ ଯୋଗୁ ରାସ୍ତାରେ ଗାଡି ଚଳାଚଳ ବନ୍ଦ ହୋଇଯାଇଥିଲା। ଏଥିସହ ବଜ୍ରପାତରେ ନୂଆ ଶାସନ ଉତ୍ତର ସାହିର ପ୍ରାୟ ୩୦ ଫୁଟ ଉଚ୍ଚ ନଡ଼ିଆ ଗଛରେ ନିଆଁ ଲାଗି ଗଛ ପୋଡ଼ିଯାଇଛି। ତେଇଶିପୁର ପଞ୍ଚାୟତ ପୋଟଳ ଗ୍ରାମଠାରେ ଥିବା ବିସ୍ଲାରି ପାଣି କମ୍ପାନିର ୩ବଖରା ଘରର ଟିଣ ଚଦର ଉଡ଼ିଯାଇ ଏକ ଗଛ ଡାଳରେ ଲାଗିଥିବା ଦେଖିବାକୁ ମିଳିଥିଲା। ସେହିପରି ପୁରୀ-ଭୁବନେଶ୍ୱର ୩୧୬ନଂ ଜତୀୟ ରାଜପଥର ପିପିଲିଠାରୁ ସାତଶଙ୍ଖ ପର୍ଯ୍ୟନ୍ତ ରାସ୍ତା କଡ଼ରେ ଥିବା ବିଭିନ୍ନ ଦୋକାନ ଘର ସବୁ ଭାଙ୍ଗିଯାଇଥିବା ଜଣାପଡ଼ିଛି। ସେହିପରି କାଳବୈଶାଖୀର ପ୍ରଚଣ୍ଡ ଶବ୍ଦରେ ନିମାପଡ଼ା ବ୍ଲକର ଛଣିଜଙ୍ଗ ପଞ୍ଚାୟତ ଅଧୀନ କନ୍ତିଆ ଗ୍ରାମର ମଣ୍ଡପ ଉପରେ ବସିଥିବା ୫ଜଣ ଆହତ ହୋଇ ଚାରିଛକ ମେଡିକାଲରେ ଚିକିତ୍ସିତ ହେଉଛନ୍ତି। ସେମାନଙ୍କ ମଧ୍ୟରୁ ଜଣଙ୍କ ଅବସ୍ଥା ସଙ୍କଟାପନ୍ନ ଥିବାରୁ ତାଙ୍କୁ କ୍ୟାପିଟାଲ ହସ୍ପିଟାଲ ସ୍ଥାନାନ୍ତର କରାଯାଇଛି। ଖବରପାଇ ନିମାପଡ଼ା ବିଧାୟକ ସମୀର ରଞ୍ଜନ ଦାଶ ଆହତଙ୍କୁ ଭେଟି ସେମାନଙ୍କ ଆରୋଗ୍ୟ କାମନା କରଥିଲେ। ସେମାନଙ୍କ ଉତ୍ତମ ଚିକିତ୍ସା ପାଇଁ ଡାକ୍ତରଙ୍କ ସହ ଆଲୋଚନା କରିଥିଲେ। କାଳବୈଶାଖୀ ପ୍ରଭାବରେ ଡେଣୁଅଁବସ୍ତ, ବଜିପୁର, ସର୍ବାପଡ଼ାର ବହୁ ନଡ଼ିଆ ଗଛ ବଜ୍ରପାତରେ ଜଳିଯାଇଛି। ଏଥିସହ ବିଦ୍ୟୁତ୍ ସରବରାହ ବହୁଳ ଭାବେ ବାଧାପ୍ରାପ୍ତ ହୋଇଛି। ଚାରିଛକ ଥାନା ଅଧିକାରୀ ମମତା ବିଶ୍ୱାଳ ଘଟଣାସ୍ଥଳରେ ପହଞ୍ଚି ତଦନ୍ତ ଚଳାଇଛନ୍ତି।
