ନୂଆଦିଲ୍ଲୀ/ଲକ୍ଷ୍ନୌ,୫।୭: ଡକ୍ୟୁମେଣ୍ଟାରୀ ଫିଲ୍ମ ‘କାଳୀ’ଙ୍କ ପୋଷ୍ଟରକୁ ନେଇ ବିବାଦ ବଢ଼ିବାରେ ଲାଗିଛି। ଫିଲ୍ମ ନିର୍ମାତା ଲୀନା ମଣିମେକଲଇଙ୍କ ଡକ୍ୟୁମେଣ୍ଟାରୀ ଫିଲ୍ମର ପୋଷ୍ଟରରେ ମା’ କାଳୀଙ୍କୁ ସିଗାରେଟ୍ ଟାଣୁଥିବାର ଦେଖିବାକୁ ମିଳିଥିଲା। ଏଥିସହ ଆଉ ଗୋଟିଏ ହାତରେ ଏଲ୍ଜିବିଟି ସମ୍ପ୍ରଦାୟର ପତାକା ମଧ୍ୟ ଧରିଥିବା ନଜର ଆସିଛି। ଏହି ବିବାଦୀୟ ପୋଷ୍ଟରକୁ ନେଇ ଏବେ ବିବାଦ ଥମିବାର ନା ନେଉନି। ବର୍ତ୍ତମାନ ଏହି ମାମଲା ଏବେ ପୋଲିସ ପାଖରେ ପହଞ୍ଚିଛି। ସୂଚନାଯୋଗ୍ୟ, ଦିଲ୍ଲୀ ପୋଲିସର ଆଇଏଫ୍ଏସ୍ଓ ୟୁନିଟ ଫିଲ୍ମ ମା’ କାଳୀଙ୍କ ବିବାଦୀୟ ପୋଷ୍ଟରକୁ ନେଇ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଦିଲ୍ଲୀ ପୋଲିସ ଧାରା ୧୫୩ଏ ଏବଂ ୨୯୫ଏ ଅନୁଯାୟୀ ଏକ ଏଫ୍ଆଇଆର୍ ରୁଜୁ କରାଯାଇଛି। ସୂଚନା ମୁତାବକ, କାଳୀ ମା’ଙ୍କ ପୋଷ୍ଟରକୁ ନେଇ ବିବାଦ ସମ୍ପର୍କରେ ଦିଲ୍ଲୀ ପୋଲିସ ଦୁଇଟି ଅଭିଯୋଗ ପାଇଥିଲା। ଗୋଟିଏ ଅଭିଯୋଗ ନୂଆଦିଲ୍ଲୀ ଜିଲାରୁ ଏବଂ ଅନ୍ୟଟି ଆଇଏଫ୍ଏସ୍ଓରୁ, ଯାହା ସାଇବର ଅପରାଧ ସହ ଜଡିତ ରହିଛି। ଜାତି ଧର୍ମର ଭାବନାକୁ ଆଘାତ ଦେବା ଅଭିଯୋଗରେ ଆଇପିସି ୨୯୫ଏ ଆଇଏଫ୍ଏସ୍ଓ ୟୁନିଟ କାଳୀ ଫିଲ୍ମର ନିର୍ଦ୍ଦେଶକ ଲୀନା ମଣିମେକଲଇଙ୍କ ବିରୋଧରେ ମାମଲା ରୁଜୁ କରିଛି। ଅନ୍ୟପଟେ ଉତ୍ତରପ୍ରଦେଶରେ ମଧ୍ୟ ଏହାକୁ ନେଇ ଏଫ୍ଆଇଆର୍ ରୁଜୁ କରାଯାଇଛି।
