ନୂଆଦିଲ୍ଲୀ, ୩।୧୧: ନିକଟରେ ନ୍ୟୁଜିଲାଣ୍ଡ ବିପକ୍ଷରେ ୩-୨ରେ ସିରିଜ ବିଜୟ ହାସଲ କରିବା ପରେ ଭାରତୀୟ ଅଧିନାୟକ ଶ୍ରେୟସ ଆୟର ସୋସିଆଲ ମିଡିଆରେ ପ୍ରଶଂସକଙ୍କ ପାଇଁ ଏକ ପୋଷ୍ଟ କରିଥିଲେ। ତେବେ ତାଙ୍କର ଏହି ପୋଷ୍ଟ ଦେଖୁ ଦେଖୁ ଭାଇରାଲ ହୋଇଯାଇଛି। ଏହାର କାରଣ ହେଉଛି, ଆୟରଙ୍କ ପୋଷ୍ଟ ଇଂରାଜୀ କିମ୍ବା ହିନ୍ଦୀରେ ନଥିଲା। ସେ ମାଓରୀ ଭାଷାର ଚାରୋଟି ଶବ୍ଦକୁ ନେଇ ଏକ ବାକ୍ୟାଂଶ ବ୍ୟବହାର କରିଥିଲେ। ଯାହାର ଅର୍ଥ ଜାଣିବାକୁ କ୍ରିକେଟ ପ୍ରଶଂସକଙ୍କ ମଧ୍ୟରେ ଉତ୍ସୁକତା ବଢ଼ିଯାଇଛି।
ରବିବାର ସିରିଜ ଶେଷ ହେବା ପରେ ଆୟର ସୋସିଆଲ ମିଡିଆରେ ଭାରତୀୟ ଦଳର ଅଭିଯାନର କିଛି ଫଟୋ ଶେୟାର କରିଥିଲେ। ଏହାର କ୍ୟାପଶନରେ ସେ ‘କା ମାଉ ତେ ୱେହି’ ସହ ଟ୍ରଫିର ଇମୋଜି ଦେଇଥିଲେ। ଏହି ଅଜବ କ୍ୟାପସନ ଦେଖିବା ପରେ ଫ୍ୟାନ୍ସ ଏହାର ଅର୍ଥ ଖୋଜିବାରେ ଲାଗିପଡ଼ିଥିଲେ।
ପ୍ରକୃତରେ ଶ୍ରେୟସ ଆୟର ନ୍ୟୁଜିଲାଣ୍ଡର ମୂଳ ମାଓରୀ ଭାଷାର ଏକ ଲୋକପ୍ରିୟ ବାକ୍ୟାଂଶ ବ୍ୟବହାର କରିଥିଲେ। ‘କା ମାଉ ତେ ୱେହି’ ଏକ ମାଓରୀ ଅଭିବ୍ୟକ୍ତି, ଯାହା ମାଧ୍ୟମରେ କୌଣସି ଅସାଧାରଣ ପ୍ରଦର୍ଶନ ପ୍ରତି ପ୍ରଶଂସା, ଆଶ୍ଚର୍ଯ୍ୟ ଓ ଉତ୍ସାହ ପ୍ରକାଶ କରାଯାଏ। ସାଧାରଣ ଭାଷାରେ ଏହାର ଅର୍ଥ ‘ଚମତ୍କାର!’, ‘ଅତି ସୁନ୍ଦର!’ କିମ୍ବା ‘କି ଜବରଦସ୍ତ ପ୍ରଦର୍ଶନ!’ ବୋଲି କୁହାଯାଇପାରେ।
ମାଓରୀ ସଂସ୍କୃତି ଓ ପାରମ୍ପରିକ କଳା ପରମ୍ପରାରେ ଏହି ଶବ୍ଦର ବିଶେଷ ମହତ୍ତ୍ୱ ରହିଛି। ବିଶେଷକରି କାପା ହାକା ଭଳି ପ୍ରଦର୍ଶନରେ କୌଣସି ଚମତ୍କାର ପ୍ରଦର୍ଶନ ଦେଖି ମନ୍ତ୍ରମୁଗ୍ଧ ହେବା କିମ୍ବା ଗଭୀର ପ୍ରଶଂସା ପ୍ରକାଶ କରିବା ପାଇଁ ଏହା ବ୍ୟବହାର କରାଯାଏ।
ସିରିଜ ଜିତିବା ସତ୍ତ୍ୱେ ଭାରତୀୟ ଦଳ ଆହୁରି ଭଲ ପ୍ରଦର୍ଶନ କରିପାରିଥାନ୍ତା ବୋଲି ସ୍ବୀକାର କରିଛନ୍ତି ଅଧିନାୟକ ଶ୍ରେୟସ ଆୟର। ବିଶେଷକରି ଶେଷ ଟି-୨୦ ମ୍ୟାଚ୍ରେ ଭଲ ବ୍ୟାଟିଂ ଆରମ୍ଭ କରିବା ସତ୍ତ୍ୱେ ଦଳ ଏହାର ଫାଇଦା ଉଠାଇପାରିନଥିଲା। ଫଳରେ ଭାରତ ୭ ଉଇକେଟ୍ରେ ପରାଜୟବରଣ କରିଥିଲା।
ମ୍ୟାଚ ପରବର୍ତ୍ତୀ ପୁରସ୍କାର ବିତରଣ ସମାରୋହରେ ଆୟର କହିଥିଲେ, “ସତ କହିବାକୁ ଗଲେ ଆମେ ଆହୁରି ଭଲ ପ୍ରଦର୍ଶନ କରିପାରିଥାନ୍ତୁ। ମଧ୍ୟ ଓଭରରେ ଆମକୁ ଯେଉଁ ଭଲ ଆରମ୍ଭ ମିଳିଥିଲା ଏବଂ ମୁଁ ଓ ଈଶାନ ଯେଉଁଭଳି ଭାବେ ଇନିଂସକୁ ଆଗକୁ ବଢ଼ାଇଥିଲୁ, ତାହାକୁ ଦେଖିଲେ ଆମେ ଆହୁରି ଭଲ କରିପାରିଥାନ୍ତୁ। କିନ୍ତୁ ଏହାପରେ ଆମେ ଲଗାତାର ଉଇକେଟ୍ରେ ହରାଇଥିଲୁ। ଫଳରେ ନୂଆ ବ୍ୟାଟରଙ୍କ ଉପରେ ହଠାତ୍ ଚାପ ବଢ଼ିଯାଇଥିଲା।”
ଏହାସହ ବୋଲିଂ ଓ ଫିଲ୍ଡିଂ କ୍ଷେତ୍ରରେ ମଧ୍ୟ ଦଳକୁ ଆହୁରି ସୁଧାର ଆଣିବାକୁ ପଡ଼ିବ ବୋଲି ସେ କହିଥିଲେ। ଆୟର କହିଥିଲେ, “ମୋତେ ଲାଗୁଛି ଆମେ ବୋଲିଂ ଓ ଫିଲ୍ଡିଂରେ ଆହୁରି ଭଲ କରିପାରିଥାନ୍ତୁ। ଆମେ ଟିକେ ଧିମା ଥିଲୁ। କିନ୍ତୁ ଏହି ଗସ୍ତ ଆମ ପାଇଁ ଏକ ଭଲ ଶିକ୍ଷଣୀୟ ଅନୁଭବ ଥିଲା। ବିଦେଶ ଗସ୍ତରେ ଆସିବା, ନ୍ୟୁଜିଲାଣ୍ଡ ଭଳି ଦେଶରେ ଭିନ୍ନ ଭିନ୍ନ ପରିସ୍ଥିତି ଓ ପିଚ୍ରେ ଖେଳିବାର ସୁଯୋଗ ମିଳିବା ଆମ ପାଇଁ ଏକ ବଡ଼ ଶିକ୍ଷା। ଏହା ଆମକୁ ଅନେକ କିଛି ଶିଖିବାର ସୁଯୋଗ ଦେଇଛି।”