ନୂଆଦିଲ୍ଲୀ,୭।୭: କଂଗ୍ରେସ ନେତା ରାହୁଲ ଗାନ୍ଧୀଙ୍କ ପୂର୍ବତନ ଘନିଷ୍ଠ ଜ୍ୟୋତିରାଦିତ୍ୟ ସିନ୍ଧିଆଙ୍କୁ ମିଳିଛି ବିମାନ ଚଳାଚଳ ମନ୍ତ୍ରଣାଳୟ। ପୂର୍ବରୁ ଏହି ମନ୍ତ୍ରଣାଳୟ ଦାୟିତ୍ୱରେ ଥିବା ହର୍ଦୀପ ପୁରୀଙ୍କୁ ଦିଆଯାଇଛି ସହରାଞ୍ଚଳ ବିକାଶ ଓ ପେଟ୍ରୋଲିୟମ ମନ୍ତ୍ରଣାଳୟର ଦାୟିତ୍ୱ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନୂଆ ମନ୍ତ୍ରିମଣ୍ଡଳରେ ସ୍ଥାନ ପାଇଥିବା ୩୬ ନୂଆ ମନ୍ତ୍ରୀଙ୍କ ମଧ୍ୟରେ ଅନ୍ୟତମ ହେଉଛନ୍ତି ସିନ୍ଧିଆ। ୧୯୭୧ରେ ଜନ୍ମ ଗ୍ରହଣ କରିଥିବା ସିନ୍ଧିଆ ହାର୍ଭଡ ଓ ଷ୍ଟାନଫର୍ଡ ଭଳି ବିଶ୍ୱ ପ୍ରଖ୍ୟାତ ଶିକ୍ଷାନୁଷ୍ଠାନରେ ଶିକ୍ଷା ଗ୍ରହଣ କରିଥିଲେ। ଏକ ବିମାନ ଦୁର୍ଘଟଣାରେ ତାଙ୍କ ବାପା ମାଧବରାଓ ସିନ୍ଧିଆଙ୍କ ମୃତ୍ୟୁ ପରେ ପ୍ରଥମ ଥର ପାଇଁ ଓହ୍ଲାଇଥିଲେ ନିର୍ବାଚନ ମୈଦାନକୁ। କଂଗ୍ରେସ ପ୍ରାର୍ଥୀ ଭାବେ ୨୦୦୨ରେ ଲଢ଼ିଥିଲେ ଉପନିର୍ବାଚନ। କଂଗ୍ରେସର ଟାଣୁଆ ନେତା ଭାବେ ନିଜକୁ ପ୍ରତିଷ୍ଠିତ କରିସାରିଥିବା ସିନ୍ଧିଆ ୨୦୨୦ ମାର୍ଚ୍ଚରେ ଦଳରୁ ଇସ୍ତଫା ଦେଇଥିଲେ। ତାଙ୍କର ଏହି ନିଷ୍ପତ୍ତି ଯୋଗୁ ୧୫ ମାସ ମଧ୍ୟରେ ଭୁଷୁଡ଼ି ଯାଇଥିଲା କମଲ ନାଥଙ୍କ ନେତୃତ୍ୱାଧୀନ ମଧ୍ୟପ୍ରଦେଶ ସରକାର। ସିନ୍ଧିଆଙ୍କ ସହ ୨୨ ଜଣ ବିଧାୟକ ଭାଜପାରେ ଯୋଗଦେଲେ। ଫଳରେ ସରକାର ଗଢ଼ିଲା ଭାଜପା।
ଅନ୍ୟପକ୍ଷରେ କୋଭିଡ୍-୧୯ ମହାମାରୀ ଯୋଗୁ ପୂର୍ବତନ ବିମାନ ଚଳାଚଳ ମନ୍ତ୍ରୀ ପୁରୀଙ୍କୁ ସମ୍ମୁଖୀନ ହେବାକୁ ପଡ଼ିଥିଲା କଠିନ ପରିସ୍ଥିତିର। ହସ୍ପିଟାଲିଟି ଇଣ୍ଡଷ୍ଟ୍ରି ଓ ଭ୍ରମଣ କ୍ଷେତ୍ରରେ ବାଧକ ସାଜିଥିଲା କୋଭିଡ୍-୧୯। ପୂରା ବିଶ୍ୱରେ ବିମାନ ଚଳାଚଳ ହ୍ରାସ ପାଇବାରୁ ବିମାନ କମ୍ପାନୀଗୁଡ଼ିକକୁ ସଂଘର୍ଷ କରିବାକୁ ପଡ଼ିଥିଲା। ବିମାନ ଚଳାଚଳ ମନ୍ତ୍ରଣାଳୟ ପକ୍ଷରୁ ଗତ ମାସରେ ପ୍ରକାଶ କରାଯାଇଥିବା ରିପୋର୍ଟରେ ଦର୍ଶାଯାଇଥିଲା ଯେ, ଚଳିତ ବର୍ଷ ଜାନୁୟାରୀରୁ ଅପ୍ରିଲ ମଧ୍ୟରେ ୨୯୧ ଲକ୍ଷ ଯାତ୍ରୀ ଘରୋଇ ଏୟାରଲାଇନ ବ୍ୟବହାର କରିଛନ୍ତି, ଯାହାକି ଗତବର୍ଷ ତୁଳନାରେ ୧୧.୬୫ ପ୍ରତିଶତ କମ୍ ଥିଲା।
