ଭୁବନେଶ୍ୱର,୨୧।୧୦: ଆରମ୍ଭ ହେବ ଜୁନିୟର ପୁରୁଷ ହକି କପ୍। ୨୪ରୁ କଳିଙ୍ଗ ଷ୍ଟାଡିୟମ୍ରେ ଏହି ମ୍ୟାଚ୍ ଖେଳାଯିବା ନେଇ ଅନ୍ତର୍ଜାତୀୟ ହକି ମହାସଙ୍ଘ(ଏଫ୍ଆଇଏଚ୍) ବିଶ୍ୱକପ୍ର କ୍ରୀଡ଼ାସୂଚୀ ଘୋଷଣା କରାଯାଇଛି। ନଭେମ୍ବର ୨୪ରୁ ଡିସେମ୍ବର ୫ ତାରିଖ ମଧ୍ୟରେ ଜୁନିୟର ପୁରୁଷ ହକି ବିଶ୍ୱକପ୍ ଖେଳାଯିବ। ମେଗା ଇଭେଣ୍ଟର ଏହି ଦ୍ୱାଦଶ ସଂସ୍କରଣରେ ଗତଥରର ଚାମ୍ପିୟନ ଭାରତ ପ୍ରଥମ ଦିବସରେ ଫ୍ରାନ୍ସ ବିପକ୍ଷରୁ ଅଭିଯାନ ଆରମ୍ଭ କରିବ। ଭାରତ ଅପେକ୍ଷାକୃତ ସହଜ ପୁଲ୍ରେ ସ୍ଥାନ ପାଇଛି। ଭାରତ ସମେତ କାନାଡା, ଫ୍ରାନ୍ସ ଓ ପୋଲାଣ୍ଡ ପୁଲ୍ ବି’ରେ ସ୍ଥାନିତ ହୋଇଛନ୍ତି। ସେହିପରି ପୁଲ୍ ଏ’ରେ ବେଲଜିୟମ, ଚିଲି, ମାଲେସିଆ ଓ ଦକ୍ଷିଣ ଆଫ୍ରିକା ସାମିଲ ରହିଛନ୍ତି। ପୁଲ୍ ସି’ରେ କୋରିଆ, ନେଦରଲାଣ୍ଡ୍ସ, ସ୍ପେନ ଓ ଆମେରିକା ସାମିଲ ରହିଛନ୍ତି। ଅନ୍ୟପଟେ ପୁଲ୍ ଡି’ରେ ଆର୍ଜେଣ୍ଟିନା, ଇଜିପ୍ଟ, ଜର୍ମାନୀ ଓ ପାକିସ୍ତାନ ସାମିଲ ରହିଛନ୍ତି।
ଉଦ୍ଘାଟନୀ ଦିବସରେ ଭାରତ- ଫ୍ରାନ୍ସ ମ୍ୟାଚ୍କୁ ବାଦ୍ ଦେଲେ ଅନ୍ୟ ମ୍ୟାଚ୍ଗୁଡିକରେ ବେଲଜିୟମ- ଦକ୍ଷିଣ ଆଫ୍ରିକା, ମାଲେସିଆ- ଚିଲି, ଜର୍ମାନୀ- ପାକିସ୍ତାନ ଓ କାନାଡା- ପୋଲାଣ୍ଡ ମଧ୍ୟ ପରସ୍ପରକୁ ଭେଟିବେ। ବୁଧବାର ଅନ୍ତର୍ଜାତୀୟ ହକି ଫେଡେରେଶନ (ଏଫ୍ଆଇଏଚ୍) ପୁଲ୍ ନେଇ ଘୋଷଣା କରିଛି। ଫ୍ରାନ୍ସକୁ ଭେଟିବା ପରେ ଭାରତ ନଭେମ୍ବର ୨୫ରେ କାନାଡାକୁ ଓ ୨୭ରେ ପୋଲାଣ୍ଡକୁ ଭେଟିବ। ଡିସେମ୍ବର ୩ରେ ଦୁଇଟି ଯାକ ସେମିଫାଇନାଲ ଓ ୫ରେ ଫାଇନାଲ ମ୍ୟାଚ୍ ଖେଳାଯିବ। କୋଭିଡ୍-୧୯ ମହାମାରୀ କାରଣରୁ ଅଷ୍ଟ୍ରେଲିଆ, ନ୍ୟୁଜିଲାଣ୍ଡ ଓ ଇଂଲଣ୍ଡ ଓହରି ଯାଇଛନ୍ତି। ଫଳରେ କାନାଡ଼ା, ଆମେରିକା ଓ ପୋଲାଣ୍ଡକୁ ଓ୍ବାଇଲ୍ଡ କାର୍ଡ ଏଣ୍ଟ୍ରି ମିଳିଛି।
ସେହିପରି ଦକ୍ଷିଣ ଆଫ୍ରିକାର ପୋଚ୍ଫେଷ୍ଟ୍ରୁମ୍ରେ ଡିସେମ୍ବର ୫ରୁ ୧୬ ତାରିଖ ମଧ୍ୟରେ ମହିଳା ଜୁନିୟର ହକି ବିଶ୍ୱକପ୍ ଆୟୋଜନ ହେବ। ଏଫ୍ଆଇଏଚ୍ ଏହି ବିଶ୍ୱକପ୍ର ପୁଲ୍ ଓ କାର୍ଯ୍ୟସୂଚୀ ମଧ୍ୟ ଘୋଷଣା କରିଛି। ଭାରତ ସମେତ ଡିଫେଣ୍ଡିଂ ଚାମ୍ପିୟନ ଆର୍ଜେଣ୍ଟିନା, ଜାପାନ ଓ ରୁଷିଆ ପୁଲ୍ ସି’ରେ ସ୍ଥାନ ପାଇଛନ୍ତି। ଡିସେମ୍ବର ୬ ତାରିଖରୁ ଭାରତ ରୁଷିଆ ବିପକ୍ଷରେ ଅଭିଯାନ ଆରମ୍ଭ କରିବ। ଏହାପରେ ଭାରତ ଡିସେମ୍ବର ୭ରେ ଆର୍ଜେଣ୍ଟିନା ଓ ୯ରେ ଜାପାନକୁ ଭେଟିବ।
