ଭବାନୀପାଟଣା,୨୬।୭(ସ୍ବ.ପ୍ର.): କଳାହାଣ୍ଡି ଜିଲା ଜୁନାଗଡ଼ ବ୍ଲକ ବଣ୍ଡାକୁଟ୍ରା ନିକଟ ହାଲେର ଯୋରରେ ବନ୍ୟା ପାଣି ଆସି ଗତ ୨୩ ତାରିଖରେ ଆପ୍ରୋଚ୍ ପୋଲ ଧୋଇ ହୋଇଯାଇଥିଲା। ଫଳରେ ଜୁନାଗଡ଼-ଧର୍ମଗଡ଼ ଜାତୀୟ ରାଜପଥ ୧୩୦-ସିରେ ଯୋଗାଯୋଗ ବିଚ୍ଛିନ୍ନ ହୋଇଯାଇଥିଲା। ଘଟଣାର ୨ଦିନ ପରେ ଅସ୍ଥାୟୀ ପୋଲ ନିର୍ମାଣ ପରେ ସୋମବାର ସା ସାଢ଼େ ୬ଟାରୁ ଏହି ରାସ୍ତା ଦେଇ ଯାତାୟାତ ସ୍ବାଭାବିକ ହୋଇଛି। ୨ଦିନ ଧରି ମୁଖ୍ୟ ରାସ୍ତା ବନ୍ଦ ଥିବାରୁ ସ୍ଥାନୀୟ ଲୋକେ ନାହିଁ ନ ଥିବା ଅସୁବିଧା ସମ୍ମୁଖୀନ ହୋଇଥିଲେ।
ସୂଚନାଯୋଗ୍ୟ, ଗତ ୧୨ ତାରିଖରେ ମଧ୍ୟ ବଢି ପାଣି ଯୋଗୁ ଏହି ଆପ୍ରୋଚ୍ ପୋଲ ଧୋଇ ହୋଇଯାଇଥିଲା। ଫଳରେ ୪ ଦିନ ଧରି ଜୁନାଗଡ଼-ଧର୍ମଗଡ଼ ଜାତୀୟ ରାଜପଥ ୧୩୦ ସି ମଧ୍ୟରେ ଯୋଗାଯୋଗ ବିଛିନ୍ନ ହୋଇଥିଲା। ୪ ଦିନ ପରେ ଏକ ଅସ୍ଥାୟୀ ପୋଲ ନିର୍ମାଣ କରାଯିବାରୁ ୧୬ ତାରିଖରୁ ଯାତାୟାତ ହୋଇଥିଲା। ହେଲେ ଏହାର ୭ ଦିନ ପରେ ପୁଣି ସମାନ ଅବସ୍ଥା ଦେଖିବାକୁ ମିଳିଥିଲା। ଏହା ଜାତୀୟ ରାଜପଥ ହୋଇଥିବା ବେଳେ ଏହା ଛତିଶଗଡ଼ ରାଜ୍ୟ ଦେଭୋଗକୁ ମଧ୍ୟ ସଂଯୋଗ କରୁଛି। ଯାହାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ତେବେ ନୂତନ ପୋଲ କାମ ବିଳମ୍ବ ଓ ଅଧପନ୍ତରିଆ ହୋଇଥିବାରୁ ପାଣି ବଢ଼ିଲେ ପୁଣି ଥରେ ଏପରି ସମାନ ଅବସ୍ଥା ହେବା ସମ୍ଭାବନା ରହିଛି। ଯାହାକି ୭ ଦିନ ମଧ୍ୟରେ ୨ ଥର ଆପ୍ରୋଚ ପୋଲ ଧୋଇ ନେବା ଭଳି ଘଟଣା ଦେଖିବାକୁ ମିଳିଛି।
