ନୂଆଦିଲ୍ଲୀ,୨୮।୯(ପି.ଟି.): ସମାଜର ଆର୍ଥିକ ଦୁର୍ବଳ ଶ୍ରେଣୀ (ଇଡବ୍ଲ୍ୟୁଏସ୍)ଙ୍କ ପାଇଁ ଶିକ୍ଷା ଓ ନିଯୁକ୍ତି କ୍ଷେତ୍ରରେ ୧୦ ପ୍ରତିଶତ ସଂରକ୍ଷଣ ପ୍ରଦାନ ଲାଗି ସମ୍ବିଧାନର ୧୦୩ତମ ସଂଶୋଧନର ବୈଧତାକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରାଯାଇଥିଲା। ମଙ୍ଗଳବାର ସର୍ବୋଚ୍ଚ ଅଦାଲତ ଏ ସମ୍ପର୍କିତ ଏକାଧିକ ପିଟିଶନ୍ର ଶୁଣାଣି କରିବା ପରେ ରାୟ ସଂରକ୍ଷିତ ରଖିଛନ୍ତି। ଇଡବ୍ଲ୍ୟୁଏସ୍ କୋଟା ସମ୍ବିଧାନର ମୂଳ ଢାଞ୍ଚାକୁ ଉଲ୍ଲଂଘନ କରୁଛି କି ନାହିଁ ଏନେଇ ପ୍ରଧାନ ବିଚାରପତି ଉଦୟ ଉମେଶ ଲଲିତଙ୍କ ଅଧ୍ୟକ୍ଷତାରେ ୫ ଜଣିଆ ସାମ୍ବିଧାନିକ ପୀଠ ଶୁଣାଣି କରିଥିଲେ। ଏନେଇ ଅଦାଲତ ଦୀର୍ଘ ସାଢ଼େ ୬ ଘଣ୍ଟା ଧରି ଆଟର୍ନି ଜେନେରାଲ କେ.କେ. ବେଣୁଗୋପାଳ, ସଲିସିଟର ଜେନେରାଲ ତୁଷାର ମେହେଟ୍ଟାଙ୍କ ସମେତ ବହୁ ବରିଷ୍ଠ ଆଇନଜୀବୀଙ୍କ ଯୁକ୍ତି ଶୁଣିଥିଲେ। ସାମ୍ବିଧାନିକ ପୀଠରେ ସିଜେଆଇଙ୍କ ବ୍ୟତୀତ ଜଷ୍ଟିସ୍ ଦୀନେଶ ମାହେଶ୍ୱରୀ, ଏସ୍. ରବୀନ୍ଦ୍ର ଭଟ୍ଟ, ବେଲା ଏମ୍. ତ୍ରିବେଦୀ, ଜେ.ବି. ପର୍ଡିଓ୍ବାଲା ରହିଛନ୍ତି। ଗତ ୧୩ ତାରିଖରେ ପ୍ରଥମେ ଶିକ୍ଷାବିତ୍ ମୋହନ ଗୋପାଳ ନିଜର ଯୁକ୍ତି ଉପସ୍ଥାପନ କରି ଇଡବ୍ଲ୍ୟୁଏସ୍ କୋଟାକୁ ବିରୋଧ କରିଥିଲେ। ସଂରକ୍ଷଣର ଧାରଣାକୁ ନଷ୍ଟ କରିଦେବା ଲାଗି ଏହା ଛଳନାତ୍ମକ ତଥା ପଛଦ୍ୱାର ଉଦ୍ୟମ ବୋଲି ସେ କହିଥିଲେ। ବରିଷ୍ଠ ଆଇନଜୀବୀ ରବି ବର୍ମା କୁମାର, ପି. ଓ୍ବିଲସନ, ମୀନାକ୍ଷୀ ଆରୋରା, ସଞ୍ଜୟ ପାରିଖ, କେ.ଏସ୍. ଚୌହାନ ପ୍ରମୁଖ କୋଟାକୁ ବିରୋଧ କରିଥିଲେ। ଏଥିରେ ଅନୁସୂଚିତ ଜାତି, ଜନଜାତି ଏବଂ ପଛୁଆ ବର୍ଗ ବାହାରେ ଥିବା ଗରିବଙ୍କୁ ସାମିଲ କରାଯାଉଥିବାରୁ ଏହା ସ୍ବଚ୍ଛଳ ବର୍ଗ ଧାରଣାକୁ ପ୍ରତିହତ କରୁଥିବା ସେମାନେ ଯୁକ୍ତି ଦର୍ଶାଇଥିଲେ। ଅନ୍ୟପକ୍ଷରେ ସଲିସିଟର ଜେନେରାଲ କହିଥିଲେ, ସାଧାରଣ ବର୍ଗରେ ରହିଥିବା ଦାରିଦ୍ର୍ୟ ଦୂରୀକରଣ ଲାଗି ସକାରାତ୍ମକ ପଦକ୍ଷେପ ନେବା କ୍ଷମତା ରାଷ୍ଟ୍ରର ରହିଛି। ସମ୍ବିଧାନ ସଂଶୋଧନ ଏହାର ମୂଳ ବିଶେଷତାକୁ ସୁଦୃଢ଼ କରୁଛି। କୌଣସି ପରିସଂଖ୍ୟାନରେ ଏହାର ବୈଧତାକୁ ପରୀକ୍ଷା କରାଯାଇପାରିବ ନାହିଁ ବୋଲି ସଲିସିଟର ଜେନେରାଲ କହିଥିଲେ। ‘ୟୁଥ୍ ଫର୍ ଇକ୍ୱାଲିଟି’ ନାମକ ଏନ୍ଜିଓ ପକ୍ଷରୁ ବରିଷ୍ଠ ଆଇନଜୀବୀ ଗୋପାଳ ଶଙ୍କରନାରାୟଣନ୍ ଇଡବ୍ଲ୍ୟୁଏସ୍ କୋଟାକୁ ସମର୍ଥନ କରିବା ସହ ଏହା ସଠିକ୍ ଦିଗରେ ଠିକ୍ ପଦକ୍ଷେପ ବୋଲି କହିଥିଲେ।
