ନୂଆଦିଲ୍ଲୀ, ୨୪।୯ : ଦିବ୍ୟାଙ୍ଗଙ୍କ ପାଇଁ ନ୍ୟାୟିକ ବ୍ୟବସ୍ଥାରେ ଡିଜିଟାଲ ଭିତ୍ତିଭୂମିକୁ ଅଧିକ ସୁଗମ ତଥା ସହଜ କରିବାକୁ ସୁପ୍ରିମକୋର୍ଟର ଇ-କମିଟି କାର୍ଯ୍ୟ କରୁଛି। ସୁପ୍ରିମକୋର୍ଟର ଜଷ୍ଟିସ ଡି.ଓ୍ବାଇ ଚନ୍ଦ୍ରଚ୍ୂଡ ଶନିବାର ଏହି ସୂଚନା ଦେଇଛନ୍ତି। ତୃତୀୟ ପ୍ରଫେସର ଶାମନାଦ ବଶିର ମେମୋରିଆଲ ଲେକଚର-୨୦୨୨ ରେ ଦିବ୍ୟାଙ୍ଗଙ୍କ ପାଇଁ ନ୍ୟାୟିକ ବ୍ୟବସ୍ଥା ସହ ଜଡିତ ବିଷୟ ଉପରେ ସେ ଏଭଳି କହିଛନ୍ତି। ସେ ଦୁଃଖ ପ୍ରକାଶ କରିଛନ୍ତି ଯେ ଆବଶ୍ୟକ ଆଇନ ସତ୍ତ୍ୱେ ଅନେକ ସରକାରୀ ତଥା ବେସରକାରୀ କୋଠା, ପରିବହନ, ପାର୍କ ଏବଂ ଅନ୍ୟାନ୍ୟ ସ୍ଥାନ ଦିବ୍ୟାଙ୍ଗଙ୍କ ପାଇଁ ଉପଲବ୍ଧ ନୁହେଁ।
ନ୍ୟାୟପାଳିକାକୁ ସେମାନଙ୍କ ନିକଟରେ ପହଞ୍ଚାଇବା ପାଇଁ ଆମକୁ ଅନେକ କିଛି କରିବାକୁ ପଡିବ। ଏଥିପାଇଁ ଆମେ ସଠିକ ଦିଗରେ ଗତି କରୁଛୁ। ଉଲ୍ଲେଖନୀୟ କଥା ହେଉଛି, ଜଷ୍ଟିସ ଚନ୍ଦ୍ରଚ୍ୂଡ ମଧ୍ୟ ସୁପ୍ରିମକୋର୍ଟର ଇ-କମିଟିର ଅଧ୍ୟକ୍ଷ। ସେ କହିଛନ୍ତି ଯେ ଆଗାମୀ ଦିନରେ ସୁପ୍ରିମକୋର୍ଟ ନ୍ୟାଶନାଲ ଜୁଡିସିଆଲ ଡାଟା ଗ୍ରୀଡରେ ଅନ୍ତର୍ଭୁକ୍ତ ହେବେ। ଯାହା ପରେ ସର୍ବୋଚ୍ଚ ଅଦାଲତର ସମସ୍ତ ବିଚାର ଏକ ମାଗଣା ପାଠ୍ୟ ସନ୍ଧାନ ଫର୍ମାଟରେ ଉପଲବ୍ଧ ହେବ।
ଯାହା ଦ୍ୱାରା କୋର୍ଟଙ୍କର ନିଷ୍ପତ୍ତି ସମସ୍ତଙ୍କ ପାଇଁ ସହଜରେ ଉପଲବ୍ଧ ହୋଇ ପାରିବ। ଜଷ୍ଟିସ ଚନ୍ଦ୍ରଚୂଡ କହିଛନ୍ତି ଯେ ଜାତୀୟ ସୂଚନା କେନ୍ଦ୍ରର ସହଯୋଗରେ ସୁପ୍ରିମକୋର୍ଟର ଇ-କମିଟି ମଧ୍ୟ ଏକ ବିଚାର ସର୍ଚ୍ଚ ପୋର୍ଟାଲ ସୃଷ୍ଟି କରିଛି। ଏହା ମଧ୍ୟ ଦିବ୍ୟାଙ୍ଗଙ୍କ ପାଇଁ ସହାୟକ ହେବ। ଏହା ମାଧ୍ୟମରେ ୭୫ ଲକ୍ଷରୁ ଅଧିକ ଫିସଲା ମୁକ୍ତ ଏବଂ ସହଜରେ ଦିବ୍ୟାଙ୍ଗ ତଥା ଅନ୍ୟ ଲୋକଙ୍କ ପାଇଁ ମଧ୍ୟ ଉପଲବ୍ଧ ହେବ।
