ଡେରାଡୁନ୍/ନୂଆଦିଲ୍ଲୀ,୯ା୧: ଦେବଭୂମି ରୂପେ ପରିଚିତ ଉତ୍ତରାଖଣ୍ଡର ଛୋଟ ସହର ଜୋଷୀମଠ ଉପରେ ବଡ଼ ବିପଦ ଦେଖାଦେଇଛି। ଚମୋଲି ଜିଲାର ଏହି ଅଞ୍ଚଳରେ ଲଗାତର ଭାବେ ଘର କାନ୍ଥ ଭାଙ୍ଗିବା ସହ ରାସ୍ତା ଧସିବାରେ ଲାଗିଥିବାରୁ ରବିବାର ଏହାକୁ ‘ଭୂସ୍ଖଳନ ପ୍ରବଣ ଜୋନ୍’ ଘୋଷଣା କରାଯାଇଛି। ହିମାଳୟ ପାଦରେ ତଥା ସମୁଦ୍ର ପତ୍ତନଠାରୁ ୬,୧୫୦ ଫୁଟ୍ ଉଚ୍ଚତାରେ ଅବସ୍ଥିତ ଜୋଷୀମଠ ପ୍ରତି ବିପତ୍ତି ମାଡ଼ିଆସିଥିବାରୁ ଲୋକେ ଆତଙ୍କିତ ହୋଇ ଘରଦ୍ୱାର ଛାଡ଼ି ଅନ୍ୟତ୍ର ଆଶ୍ରୟ ନେଇଛନ୍ତି।
୬୦ ପରିବାରକୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଥିବାବେଳେ ଆହୁରି ଅନୂ୍ୟନ ୯୦ ପରିବାରକୁ ଅସ୍ଥାୟୀ ରିଲିଫ୍ କ୍ୟାମ୍ପକୁ ନିଆଯିବ ବୋଲି ପ୍ରଶାସନ ପକ୍ଷରୁ କୁହାଯାଇଛି। ହାଡ଼ଭଙ୍ଗା ଶୀତରେ ଲୋକଙ୍କ ପାଇଁ ବଞ୍ଚତ୍ବା ଦୁର୍ବିଷହ ହୋଇଯାଇଛି। ଏହାକୁ ଦୃଷ୍ଟିରେ ରଖି ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ (ପିଏମ୍ଓ) ପକ୍ଷରୁ ଉଚ୍ଚସ୍ତରୀୟ ବୈଠକ କରାଯାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂ ଧାମିଙ୍କୁ ଫୋନ୍ କରି ସବୁ ପ୍ରକାର ସହାୟତା ପ୍ରଦାନର ପ୍ରତିଶ୍ରୁତି ଦେଇଛନ୍ତି।
ବିଶେଷଜ୍ଞ ଦଳ ବାରମ୍ବାର ଭୂସ୍ଖଳନ ଓ ଫାଟ ସୃଷ୍ଟିର କାରଣ ଖୋଜିବା ଅଭିଯାନକୁ ଜୋରଦାର କରିଛନ୍ତି। ଇତିମଧ୍ୟରେ ସ୍ଥାନୀୟ ଲୋକଙ୍କ ଧନଜୀବନ ରକ୍ଷା ଲାଗି ଅଦାଲତଙ୍କ ହସ୍ତକ୍ଷେପ ଲୋଡ଼ାଯାଇଛି। ଜୋଷୀମଠ ଶଙ୍କରାଚାର୍ଯ୍ୟ ସ୍ବାମୀ ଅଭିମୁକ୍ତେଶ୍ୱରାନନ୍ଦ ସରସ୍ବତୀ ସୁପ୍ରିମକୋର୍ଟରେ ଏକ ଜନସ୍ବାର୍ଥ ମାମଲା (ପିଆଇଏଲ୍) ଦାଖଲ କରିଥିବାବେଳେ ଜଣେ ଅବସରପ୍ରାପ୍ତ ବିଚାରପତିଙ୍କ ଅଧ୍ୟକ୍ଷତାରେ ଉଚ୍ଚସ୍ତରୀୟ କମିଟି ଗଠନ ଲାଗି ନିର୍ଦ୍ଦେଶ ଦେବା ସକାଶେ ଆଇନଜୀବୀ ରୋହିତ ଦନ୍ଦ୍ରିୟାଲ ଦିଲ୍ଲୀ ହାଇକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି।
ଜୋଷୀମଠର କାନ୍ଥବାଡ଼, ରାସ୍ତା ଆଦିରେ ବଢ଼ୁଥିବା ଫାଟ କେବଳ ଉତ୍ତରାଖଣ୍ଡ ପାଇଁ ନୁହେଁ, ବରଂ କେନ୍ଦ୍ର ସରକାରଙ୍କ ମୁଣ୍ଡବ୍ୟଥାର କାରଣ ସାଜିଛି। ବିଶେଷକରି ଗତ ସପ୍ତାହରୁ ସ୍ଥିତି ଅଧିକ ଖରାପ ହେବାରେ ଲାଗିଛି। ଏହାକୁ ଦୃଷ୍ଟିରେ ରଖି ସବୁ ସ୍ତରରେ ଉଦ୍ୟମ ଚାଲିଛି। ୪-୫ଟି ସ୍ଥାନରେ ଅସ୍ଥାୟୀ ରିଲିଫ୍ କ୍ୟାମ୍ପ୍ ନିର୍ମାଣ କରି ସେଠାକୁ ଲୋକଙ୍କୁ ସ୍ଥାନାନ୍ତର କରାଯାଉଛି ବୋଲି ଗଢ଼ଓ୍ବାଲ କମିଶନର ସୁଶୀଲ କୁମାର ସୂଚନା ଦେଇଛନ୍ତି। ଗୁରୁବାରଠାରୁ ଜୋଷୀମଠରେ ଥିବା ଚମୋଲି ଜିଲାପାଳ ହିମାଂଶୁ ଖୁରାନା ପ୍ରଭାବିତ ଅଞ୍ଚଳରେ ଘର ଘର ବୁଲି କ୍ଷୟକ୍ଷତିର ଆକଳନ କରିବା ସହ ଲୋକଙ୍କୁ ସୁରକ୍ଷିତ ସ୍ଥାନକୁ ଯିବା ପାଇଁ ବୁଝାଶୁଝା କରିଛନ୍ତି।
ଜୋଷୀମଠକୁ ଭୂସ୍ଖଳନ ପ୍ରବଣ ଜୋନ୍ ଭାବେ ଘୋଷଣା କରାଯାଇଛି। ଯଥାଶୀଘ୍ର ସମ୍ଭବ ଅନ୍ୟ ୯୦ ପରିବାରକୁ ସ୍ଥାନାନ୍ତର କରାଯିବ। ସେ କହିଛନ୍ତି, ଜୋଷୀମଠରେ ୪,୫୦୦ କୋଠା ଥିବାବେଳେ ସେଥିରୁ ୬୧୦ ବିଲ୍ଡିଂରେ ବଡ଼ କ୍ରାକ୍ ସୃଷ୍ଟି ହୋଇଛି। ଫଳରେ ସେଗୁଡ଼ିକ ଆଉ ବାସୋପଯୋଗୀ ହୋଇ ରହିନାହିଁ। ଆଉ ଏକ ବୃହତ୍ ଅର୍ଦ୍ଧଗୋଲାକାର ଫାଟ ଦେଖାଦେଇଛି, ଯାହାକି ୧.୫ କି.ମି. ଅଞ୍ଚଳ ପର୍ଯ୍ୟନ୍ତ ବ୍ୟାପିପାରେ ବୋଲି ସେ ସତର୍କ କରାଇଛନ୍ତି। କେତୋଟି ହୋଟେଲ, କଲେଜ ଓ ଗୁରୁଦ୍ୱାରାରେ ମଧ୍ୟ ଲୋକଙ୍କ ଆଶ୍ରୟ ଦେବା ପାଇଁ ବ୍ୟବସ୍ଥା କରାଯାଇଛି।
ଭଡ଼ାଘରେ ରହିବା ପାଇଁ ଚାହୁଁଥିବା ଲୋକଙ୍କୁ ମାସିକ ୪,୦୦୦ ଟଙ୍କା ଲେଖାଏ ୬ ମାସ ପର୍ଯ୍ୟନ୍ତ ଦେବା ପାଇଁ ରାଜ୍ୟ ସରକାରଙ୍କ ପକ୍ଷରୁ ଘୋଷଣା କରାଯାଇଛି। ମୁଖ୍ୟମନ୍ତ୍ରୀ ପୁଷ୍କର ସିଂ ଧାମି ଜୋଷୀମଠ ପରିଦର୍ଶନ କରି ସ୍ଥିତି ଅନୁଧ୍ୟାନ କରିଛନ୍ତି। ରିଲିଫ୍ ଓ ଉଦ୍ଧାର କାର୍ଯ୍ୟ ତ୍ୱରାନ୍ବିତ କରିବାକୁ ସେ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରବିବାର ଧାମିଙ୍କୁ ଫୋନ୍ କରି ସ୍ଥିତି ସମ୍ପର୍କରେ ପଚାରି ବୁଝିଛନ୍ତି। ଏଥିସହ ସଙ୍କଟ ସମୟରେ ସବୁ ପ୍ରକାର ସହାୟତା ପ୍ରଦାନର ପ୍ରତିଶ୍ରୁତି ଦେଇଛନ୍ତି।
ବଦ୍ରୀନାଥ ଓ ହେମକୁଣ୍ଡ ସାହିବର ପ୍ରବେଶପଥ ଭାବେ ଖ୍ୟାତ ଜୋଷୀମଠ ସ୍ଥିତି ଉପରେ ପ୍ରଧାନମନ୍ତ୍ରୀ ବ୍ୟକ୍ତିଗତ ଭାବେ ନଜର ରଖିଥିବା ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ସୂତ୍ରରୁ ପ୍ରକାଶ। ହାଇଦ୍ରାବାଦସ୍ଥିତ ନ୍ୟାଶନାଲ ରିମୋଟ ସେନ୍ସିଂ ସେଣ୍ଟର ଏବଂ ଡେରାଡୁନ୍ର ଇଣ୍ଡିଆନ୍ ଇନ୍ଷ୍ଟିଚ୍ୟୁଟ୍ ଅଫ୍ ରିମୋଟ ସେନ୍ସିଂକୁ ପୁଙ୍ଖାନୁପୁଙ୍ଖ ଅନୁଧ୍ୟାନ ପାଇଁ ପରାମର୍ଶ ଦିଆଯାଇଛି। ଏଥିସହ ଉପଗ୍ରହରୁ ସଂଗୃହୀତ ଚିତ୍ର ଓ ଅନ୍ୟ ଅଧ୍ୟୟନ ଆଧାରରେ ବିସ୍ତୃତ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦିଆଯାଇଛି। ଭାରତୀୟ ଭୂବିଜ୍ଞାନ ସର୍ବେକ୍ଷଣ ବା ଜିଓଲୋଜିକାଲ ସର୍ଭେ ଅଫ୍ ଇଣ୍ଡିଆକୁ ଜୋଷୀମଠରେ ଥିବା କୋଟି ଫାର୍ମ, ହର୍ବ ଇନ୍ଷ୍ଟିଚ୍ୟୁଟ୍ ଏବଂ ଉଦ୍ୟାନ ବିଭାଗର ମୃତ୍ତିକା ପରୀକ୍ଷଣ କରିବାକୁ କୁହାଯାଇଛି।
