ସିଡନୀ,୨୭।୧୧: ଭାରତ-ଅଷ୍ଟ୍ରେଲିଆ ମଧ୍ୟରେ ଶୁକ୍ରବାର ଏକଦିବସୀୟ ସିିରିଜ୍ର ପ୍ରଥମ ମ୍ୟାଚ୍ ଖେଳାଯାଇଛି। ଏଥିରେ କଙ୍ଗାରୁ ଟିମ୍ ଜବରଦସ୍ତ ପ୍ରଦର୍ଶନ କରି ଭାରତ ସମ୍ମୁଖରେ ୩୭୫ ରନ୍ର ବିଶାଳ ସ୍କୋର ରଖିଛି। ଏହାର ଜବାବ ଦେବାକୁ ଯାଇ ପଡ଼ିଆକୁ ଓହ୍ଲାଇଥିବା ଭାରତୀୟ ଦଳ ନୈରାଶଜନକ ପ୍ରଦର୍ଶନ କରିଛି। ବିଶେଷକରି ଦଳରେ ୩ ଆଇପିଏଲ୍ ଟିମ୍ର ଅଧିନାୟକ ଥିବା ସତ୍ତ୍ୱେ ସେମାନେ ଗୋଟିଏ ପରେ ଗୋଟିଏ ଆଉଟ୍ ହୋଇ ଫେରିଛନ୍ତି।
ଅଷ୍ଟ୍ରେଲିଆ ଟିମ୍ରେ ଦୁଇ ଆଇପିଏଲ୍ ଟିମ୍ର ଅଧିନାୟକ ଥିଲେ। ପ୍ରଥମେ ସନରାଇଜର୍ସ ହାଇଦ୍ରାବାଦର ଅଧିନାୟକ ଥିବା ଡେଭିଡ ଓ୍ବାରନର ୬୯ ରନ୍ କରିଥିବା ବେଳେ ରାଜସ୍ଥାନ ରୟାଲ୍ସର ଅଧିନାୟକ ଷ୍ଟିଭ୍ ସ୍ମିଥ୍ ୧୦୫ ରନ୍ କରିଥିଲେ। ସେହିଭଳି ଅଧିନାୟକ ଆରୋନ୍ ଫିଞ୍ଚ ୧୧୪ ରନ୍ କରିବା ପରେ ୫୦ ଓଭରରେ ଦଳ ୩୭୪ ରନ୍ କରିଥିଲା। ଏହାପରେ ଭାରତୀୟ ଦଳ ଖେଳିବାକୁ ଓହ୍ଲାଇଥିଲା। ହେଲେ ଜୋଶ ହେଜଲଉଡ ପ୍ରଥମେ ମୟଙ୍କ ଅଗ୍ରଓ୍ବାଲଙ୍କୁ ୬ ଓଭରରେ ଆଉଟ୍ କରିଥିଲେ। ୧୦ମ ଓଭରରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରର ଅଧିନାୟକ ବିରାଟ କୋହଲି(୨୧ ରନ୍) ଏବଂ ଦିଲ୍ଲୀ କ୍ୟାପିଟାଲ୍ସର ଅଧିନାୟକ ଶ୍ରେୟସ ଅୟର(୨ ରନ୍)ଙ୍କୁ ଆଉଟ୍ କରିବାରେ ସଫଳ ହୋଇଛନ୍ତି। ଏହାପରେ ପଡ଼ିଆକୁ ଓହ୍ଲାଇଥିବା କିଙ୍ଗ୍ସ ଇଲେଭେନ୍ ପଞ୍ଜାବ ଅଧିନାୟକ କେ.ଏଲ୍. ରାହୁଲଙ୍କ ଓ୍ବିକେଟ୍ ନେଇଥିଲେ ଆଡମ୍ ଜମ୍ପା। ଏହିଭଳି ଭାବେ ଭାରତୀୟ ଟିମ୍ରେ ଖେଳୁଥିବା ତିନି ଆଇପିଏଲ୍ ଅଧିନାୟକ ଉଇକେଟ୍ ହରାଇଥିଲେ। ତେବେ ଚେନ୍ନାଇ ସୁପରକିଙ୍ଗ୍ସରେ ସାମିଲ ଥିବା ହେଜଲଉଡ୍ ଆଇପିଏଲ୍ରେ ମାତ୍ର ୩ଟି ମ୍ୟାଚ୍ ଖେଳିଥିଲେ। ତାଙ୍କୁ ଦଳରେ ଅଣଦେଖା କରାଯାଇଥିଲା। ହେଲେ ଏବେ ସେ ଭାରତୀୟ ଟିମ୍ ବିପକ୍ଷରେ ଦୃଢ଼ ପ୍ରଦର୍ଶନ କରି ସମସ୍ତଙ୍କୁ ଚକିତ କରିଛନ୍ତି।
