ନୂଆଦିଲ୍ଲୀ, ୨୬।୬: ବଲିଉଡର ଆକ୍ସନ ଷ୍ଟାର୍ ଜନ ଅବ୍ରାହମ୍ ଏବେ କ୍ରିକେଟ୍ ପିଚ୍ରେ ନଜର ଆସିବେ। ସେ ପ୍ରଥମ ୟୁରୋପିଆନ୍ ଟି-୨୦ ପ୍ରିମିୟର ଲିଗ୍ (ETPL)ର ଫ୍ରାଞ୍ଚାଇଜ୍ ଦଳ ‘ରଟରଡ୍ୟାମ୍ ଡକର୍ସ’ର ସହ-ମାଲିକ ଭାବେ ଅଂଶଧନ କିଣିଛନ୍ତି। ଆସନ୍ତା ଅଗଷ୍ଟ ୨୬ରୁ ସେପ୍ଟେମ୍ବର ୨୦ ପର୍ଯ୍ୟନ୍ତ ଚାଲିବାକୁ ଥିବା ଏହି ଟୁର୍ନାମେଣ୍ଟରେ ୟୁରୋପର ୬ଟି ପ୍ରମୁଖ ସହରର ଦଳ ପରସ୍ପର ସହ ମୁକାବିଲା କରିବେ।
ରଟରଡ୍ୟାମ୍ ଡକର୍ସର ନେତୃତ୍ୱ ଗ୍ରୁପ୍ରେ ଜନ ଅବ୍ରାହମ୍ ଏକମାତ୍ର ବଡ଼ ନାମ ନୁହନ୍ତି, ବରଂ ତାଙ୍କ ସହ କ୍ରିକେଟ୍ ଜଗତର ଅନେକ ଦିଗ୍ଗଜ ମଧ୍ୟ ସାମିଲ ଅଛନ୍ତି। ଏହି ଦଳ ସହିତ ଦକ୍ଷିଣ ଆଫ୍ରିକାର ପୂର୍ବତନ ଅଧିନାୟକ ଫାଫ୍ ଡୁ ପ୍ଲେସି, କ୍ରିକେଟ୍ କିମ୍ବଦନ୍ତୀ ଜଣ୍ଟି ରୋଡ୍ସ ଏବଂ ବିସ୍ଫୋରକ ବ୍ୟାଟର ହେନ୍ରିକ୍ କ୍ଲାସେନ୍ ମଧ୍ୟ ଜଡ଼ିତ ଅଛନ୍ତି। ଏଥିସହିତ ସ୍ପୋର୍ଟସ ବିଜନେସ୍ରେ ସକ୍ରିୟ ଥିବା ମଧୁକର ଶ୍ରୀ ଏହି ଦଳର ମ୍ୟାନେଜିଂ ପାର୍ଟନର ଅଛନ୍ତି।
ଖେଳ ଦୁନିଆ ସହ ଜନ ଅବ୍ରାହମଙ୍କର ସମ୍ପର୍କ ବେଶ୍ ପୁରୁଣା। ସେ ଇଣ୍ଡିଆନ ସୁପର ଲିଗ୍ (ISL)ର ପ୍ରସିଦ୍ଧ ଫୁଟବଲ୍ ଦଳ ‘ନର୍ଥଇଷ୍ଟ ୟୁନାଇଟେଡ୍ FC’ର ମାଲିକ ମଧ୍ୟ ଅଛନ୍ତି। ଫୁଟବଲ୍ ପରେ ଏବେ କ୍ରିକେଟ୍ରେ ନିବେଶ କରି ସେ ୟୁରୋପୀୟ ବଜାରରେ ନିଜର ଉପସ୍ଥିତି ଜାହିର କରିଛନ୍ତି।
ଏହି ETPL ଟୁର୍ନାମେଣ୍ଟକୁ କ୍ରିକେଟ୍ ଆୟରଲ୍ୟାଣ୍ଡ, ସ୍କଟଲ୍ୟାଣ୍ଡ ଏବଂ ନେଦରଲ୍ୟାଣ୍ଡ କ୍ରିକେଟ୍ ବୋର୍ଡ ମିଳିତ ଭାବେ ଆୟୋଜନ କରୁଛନ୍ତି। ୟୁରୋପରେ କ୍ରିକେଟ୍କୁ ଏକ ନୂଆ ପରିଚୟ ଦେବା ଏହାର ମୁଖ୍ୟ ଉଦ୍ଦେଶ୍ୟ। ଏହି ଲିଗ୍ରେ ମୋଟ ୬ଟି ଦଳ ଭାଗ ନେଉଛନ୍ତି, ଯେଉଁଥିରେ ସାମିଲ ଅଛନ୍ତି ଗ୍ଲାସଗୋ, ଆମଷ୍ଟରଡ୍ୟାମ୍,ଏଡିନବର୍ଗ,ଡବ୍ଲିନ, ବେଲଫାଷ୍ଟ, ରଟରଡ୍ୟାମ୍।
ଆନ୍ତର୍ଜାତୀୟ କ୍ରିକେଟ୍ ପରିଷଦ (ICC) ପକ୍ଷରୁ ଏହି ଲିଗ୍କୁ ମାନ୍ୟତା ପ୍ରଦାନ କରାଯାଇଛି, ଯାହାଫଳରେ ଅନେକ ବଡ଼ ବଡ଼ ଆନ୍ତର୍ଜାତୀୟ ଖେଳାଳି ଏଥିରେ ଖେଳିବା ନିଶ୍ଚିତ ହୋଇଯାଇଛି। ଏହି ନୂଆ ଭାଗିଦାରୀକୁ ନେଇ ଜନ ଅବ୍ରାହମ୍ ଖୁସି ବ୍ୟକ୍ତ କରିଛନ୍ତି। ସେ କହିଛନ୍ତି, “କ୍ରିକେଟ୍ ଏବଂ ସିନେମା ଉଭୟ ଲୋକମାନଙ୍କୁ ଯୋଡ଼ିବାର କାମ କରନ୍ତି। ରଟରଡ୍ୟାମ୍ ଡକର୍ସ ଜରିଆରେ ମୁଁ ୟୁରୋପରେ କ୍ରିକେଟ୍ର ବିକାଶର ଏକ ଅଂଶ ହେବାକୁ ଚାହୁଁଛି। ଜଣ୍ଟି, ଫାଫ୍ ଏବଂ କ୍ଲାସେନ୍ଙ୍କ ଭଳି ଦିଗ୍ଗଜମାନଙ୍କ ସହ କାମ କରିବା ମୋ ପାଇଁ ଗର୍ବର ବିଷୟ।”
ୟୁରୋପରେ ଫୁଟବଲ୍ ତୁଳନାରେ କ୍ରିକେଟ୍ର ଲୋକପ୍ରିୟତା କମ୍ ଥିଲେ ମଧ୍ୟ ନେଦରଲ୍ୟାଣ୍ଡ ଏବଂ ସ୍କଟଲ୍ୟାଣ୍ଡ ଭଳି ଦଳ ବିଶ୍ୱକପ୍ରେ ବଡ଼ ବଡ଼ ଦଳକୁ ହରାଇ ଚମତ୍କାର କରିସାରିଛନ୍ତି। ଏହି ଲିଗ୍ ଦ୍ୱାରା ସ୍ଥାନୀୟ ଖେଳାଳିମାନଙ୍କୁ ବିଶ୍ୱସ୍ତରୀୟ ତାରକାମାନଙ୍କ ସହ ଖେଳିବାର ସୁଯୋଗ ମିଳିବ। IPL ଏବଂ SA20 ଭଳି ଏହି ଲିଗ୍ ମଧ୍ୟ ଆଗାମୀ ଦିନରେ ଏକ ବଡ଼ ବ୍ରାଣ୍ଡ୍ ହେବ ବୋଲି ଆୟୋଜକମାନେ ଆଶା ରଖିଛନ୍ତି।
