ଭୁବନେଶ୍ୱର, ୧୩।୯ (ବ୍ୟୁରୋ):ମା’ ଜଗଜ୍ଜନନୀଙ୍କ ଆବାହନ ପାଇଁ ଏବେଠୁ ଶ୍ରଦ୍ଧାଳୁଙ୍କ ମନରେ ଉତ୍କଣ୍ଠା ବାରି ହୋଇପଡୁଛି। ସମସ୍ତେ ମା’ଙ୍କ ଧରାବତରଣ ପାଇଁ ଚାହିଁ ବସିଛନ୍ତି। ଏଥିପାଇଁ ରାଜଧାନୀର ବିଭିନ୍ନ ପୂଜା କମିଟି ପକ୍ଷରୁ ପ୍ରସ୍ତୁତିକୁ ମଧ୍ୟ ଜୋର୍ଦାର କରାଯାଇଛି। ୨୨ ବର୍ଷ ପୂରଣ କରିଥିବା ବରମୁଣ୍ଡା ଦୂର୍ଗାପୂଜା କମିଟି ଏଥର ୨୩ ବର୍ଷରେ ପଦାର୍ପଣ କରିଛି। ଚଳିତ ବର୍ଷର ପୂଜା ବ୍ୟୟ ଅଟକଳ ୨୫ରୁ ୩୦ ଲକ୍ଷ ଟଙ୍କା ରହିଛି। ପ୍ରତିଥର ନୂଆ ନୂଆ ତୋରଣ କରି ସ୍ବତନ୍ତ୍ରତା ବଜାୟ ରଖୁଥିବା ଏହି ପୂଜା କମିଟି ଏଥର ଶ୍ରଦ୍ଧାଳୁଙ୍କୁ ରାଜସ୍ଥାନ ଯୋଧପୁର ରାଜପ୍ରସାଦ ଭେଟି ଦେଉଛି। ରାଜପୁତଙ୍କ ଐତିହ୍ୟର ଗାଥା ବହନ କରୁଥିବା ଏହି ତୋରଣରେ ଝଲସିବ ସହର। ୧୨୦ ଫୁଟ ଚଉଡା ଓ ୮୫ ଫୁଟ ଉଚ୍ଚତା ବିଶିଷ୍ଟ ତୋରଣ ନିର୍ମାଣ ପାଇଁ ପଶ୍ଚିମବଙ୍ଗ ମେଦିନିପୁରର କାରିଗର ସୁବାଷ ମଣ୍ଡଳ ଓ ସାଥୀ ଲାଗିପଡ଼ିଛନ୍ତି। ସେହିପରି ମା’ଙ୍କ ପ୍ରତିମାର ଉଚ୍ଚତା ୧୪ ଫୁଟ ରହିବ। ଏହାକୁ କେନ୍ଦ୍ରାପଡ଼ା ମାର୍ଶାଘାଇର କାରିଗର ନିର୍ମାଣ କରୁଛନ୍ତି। ସୁନାର ଟିକା, ସିନ୍ଥି, କାନଫୁଲ ସହିତ ୧୫କେଜି ରୁପାରେ ସଜେଇ ହେବେ ମା’ ଦଶଭୂଜା। ସପ୍ତମୀରେ ପ୍ରାୟ ୩ହଜାର ଲୋକଙ୍କ ପାଇଁ ମାଗଣା ପ୍ରସାଦ ସେବନର ଆୟୋଜନ କରାଯାଇଥିବାବେଳେ ସପ୍ତମୀରୁ ଦଶମୀ ପର୍ଯ୍ୟନ୍ତ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହେବ। ସପ୍ତମୀରେ ନିମାପଡ଼ାର ପାରମ୍ପରିକ ଘୋଡ଼ାନାଚ ସହିତ ଅଷ୍ଟମୀରେ କଟକର ମେଲୋଡି ଏବଂ ନବମୀରେ ବ୍ରହ୍ମପୁରର ମେଲୋଡି ପରିବେଷଣ କରାଯିବ। ସେହିପରି ମୀନାବଜାର, ବିପଦମୁକ୍ତ ଦୋଳିର ବ୍ୟବସ୍ଥା ମଧ୍ୟ ରହିବ।
ଅପରପକ୍ଷେ ଦୀର୍ଘ ୨ ବର୍ଷ ପରେ ପୁଣିଥରେ ଫେରିବ ରାବଣ ପୋଡ଼ି। ୬୫ ଫୁଟ ରାବଣ ମୂର୍ତ୍ତି ତିଆରି ଦାୟିତ୍ୱ ନେଇଛନ୍ତି ପୁରୁଣା ଭୁବନେଶ୍ୱରର କାରିଗର। ସରକାରଙ୍କ ନିୟମ ଅନୁଯାୟୀ କମ୍ ଶବ୍ଦଯୁକ୍ତ ବାଣ ଏବଂ ଅନ୍ୟାନ୍ୟ ବ୍ୟବସ୍ଥା କରାଯିବ। ସୁରକ୍ଷାକୁ ଦୃଷ୍ଟିରେ ରଖି ପ୍ରାୟ ୭୦ଜଣ ଭଲ୍ୟୁଣ୍ଟରଙ୍କୁ ନିୟୋଜିତ ହେବେ। ମହିଳାଙ୍କ ସୁରକ୍ଷା ତଥା ସହାୟତା ପାଇଁ ମହିଳା ଭଲ୍ୟୁଣ୍ଟର ମଧ୍ୟ ରହିବେ। ମଣ୍ଡପ ଓ ଏହା ଆଖପାଖରେ ୧୦ ସିସିଟିଭି କ୍ୟାମେରା ଲଗାଯିବ।
