ପାଟନା,୨ ।୧୧: ପୂର୍ବତନ କେନ୍ଦ୍ରମନ୍ତ୍ରୀ ତଥା ଲୋକ ଜନଶକ୍ତି ପାର୍ଟିର ମୁଖ୍ୟ ରାମବିଳାସ ପାଶୱାନଙ୍କ ମୃତ୍ୟୁକୁ ନେଇ ଏବେ ରାଜନୀତି ହୋଇଛି ସରଗରମ । ବିହାରର ପୂର୍ବତନ ମୁଖ୍ୟମନ୍ତ୍ରୀ ଜିତନ ରାମ ମାଝି ପାଶୱାନଙ୍କ ମୃତ୍ୟୁକୁ ନେଇ ପ୍ରଶ୍ନ କରିଛନ୍ତି । ମାଝିଙ୍କ ଦଳ ହିନ୍ଦୁସ୍ତାନ ଆବାମ ମୋର୍ଚ୍ଚା ଏହି ମାମଲାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଚିଠି ଲେଖିଛନ୍ତି । ଏହାସହ ସେମାନେ ଏହାର ଆଇନଗତ କାର୍ଯ୍ୟାନୁଷ୍ଠାନ ଦାବି କରିଛନ୍ତି । ମାଝି କହିଛନ୍ତି ପାଶୱାନ କେନ୍ଦ୍ର ମନ୍ତ୍ରୀ ସହ ଜଣେ ପ୍ରତିଷ୍ଠିତ ରାଜନେତା । ହେଲେ ତାଙ୍କ ସ୍ୱାସ୍ଥ୍ୟକୁ ନେଇ କୌଣସି ମେଡିକାଲ ବୁଲେଟିନ ଜାରି କରାଯାଇ ନ ଥିଲା । ପୁଣି ତାଙ୍କ ମୃତ୍ୟୁ ଖବର ବିଳମ୍ବରେ ଦିଆଗଲା । ସେଥିପାଇଁ ଆମେ ଏହାର ଆଇନଗତ ଯାଞ୍ଚ ଦାବି କରୁଛୁ । ହିନ୍ଦୁସ୍ତାନ ଆବାମ ମୋର୍ଚ୍ଚାର ପ୍ରବକ୍ତା ଡା, ଦାନିଶ ରିଜାୱାନ ଲୋକ ଜନଶକ୍ତି ପାର୍ଟିର ଅଧ୍ୟକ୍ଷ ଚିରାଗ ପାଶୱାନଙ୍କୁ ପ୍ରଶ୍ନ କରିଛନ୍ତି ଦେଶବାସୀ ଜାଣିବାକୁ ଚାହୁଁଛନ୍ତି ରାମବିଳାସ ପାଶୱାନଙ୍କୁ ନେଇ କେଉଁ ତଥ୍ୟ ସେ ଲୁଚାଉଛନ୍ତି । କାରଣ ରାମବିଳାସଙ୍କ ମୃତ୍ୟୁର ଗୋଟିଏ ଦିନ ପରେ ଚିରାଗ ଏକ ଶୁଟିଂ ସମୟରେ ଖୁସି ଥିବା ନଜର ଆସିଥିଲା । ତେଣୁ ଏହାକୁ ନେଇ ତାଙ୍କ ପ୍ରିୟ ପରିଜନ ଓ ପ୍ରଶଂସକଙ୍କ ମନରେ ନାନା ପ୍ରଶ୍ନ ଉଠୁଛି ବୋଲି ରିଜାୱାନ କହିଛନ୍ତି ।
