ନୂଆପଡ଼ା,୪ା୯ (ମକାରୁ ବେମାଲ):ଜଣେ ଦଲାଲଙ୍କ ମାଧ୍ୟମରେ ଚିକିତ୍ସା ପାଇଁ ଛତିଶଗଡ଼ର ଦୁର୍ଗ ଅଞ୍ଚଳକୁ ଯାଇଥିବା ନୂଆପଡା ଜିଲାର ଜଣେ ଯୁବକ ୧୮ଦିନ ହେଲା ଘରକୁ ଫେରିନାହାନ୍ତି। ଏହାକୁ ନେଇ ପରିବାର ଲୋକେ ପୋଲିସ ନିକଟରେ ଅଭିଯୋଗ କରି ସୁଫଳ ନ ପାଇବାରୁ ଏସ୍ପିଙ୍କ ଦ୍ୱାରସ୍ଥ ହୋଇଛନ୍ତି। ବିଶେଷ କରି ଦଲାଲମାନେ ଜିଲାର ସିନାପାଲି ଓ ବୋଡେନ ବ୍ଲକର ଉପାନ୍ତ ଗଁା ଲୋକଙ୍କୁ ଟାର୍ଗେଟ କରୁଛନ୍ତି। କୌଣସି ବ୍ୟକ୍ତି ଗୁରୁତର ରୋଗରେ ପୀଡିତ ନ ଥିଲେ ମଧ୍ୟ ସେମାନେ ଆୟୁଷ୍ମାନ କାର୍ଡରେ ଟଙ୍କା ଲୁଟିବା ପାଇଁ ସେମାନଙ୍କୁ ଭଲ ଚିକିତ୍ସା ହେବ କହି ସାଙ୍ଗରେ ନେଇ ଛତିଶଗଡର ବିଭିନ୍ନ ଘରୋଇ ହସ୍ପିଟାଲରେ ଭର୍ତ୍ତି କରୁଛନ୍ତି। ପରେ ଆୟୁଷ୍ମାନ କାର୍ଡ ଟଙ୍କା ସରିଲେ ସେମାନଙ୍କୁ ଘରକୁ ପଠାଇ ଦେଉଛନ୍ତି।
ସୂଚନା ଅନୁଯାୟୀ, ଗତ ଜୁଲାଇ ୧୭ରେ ବୋଡେନ ବ୍ଲକର ଜଣେ ଦଲାଲ ନାଗପଡା ଗଁାର ୧୦ ଜଣ ଲୋକଙ୍କୁ ଦୁର୍ଗସ୍ଥିତ ଏସ୍ଆର୍ ହସ୍ପିଟାଲକୁ ନେଇ ଯାଇଥିଲେ। ସେଠାରେ ଚିକିସତ୍ିତ ହୋଇ ୯ ଜଣ ଘରକୁ ଫେରି ଆସିଥିବା ବେଳେ ଜୟଲାଲ ତାଣ୍ଡି (୩୮) ନାମକ ଯୁବକ ୧୮ ଦିନ ହେଲା ଘରକୁ ଫେରିନାହାନ୍ତି। ପରିବାର ଲୋକେ ଦଲାଲଙ୍କୁ ପଚାରିଲେ ଜୟଲାଲଙ୍କ ପାଇଲ୍ସ ଅପରେଶନ ହୋଇଛି। ଭଲ ହୋଇଗଲେ ଘରକୁ ଫେରିଆସିବ ବୋଲି କହୁଥିବା ପରିବାର ସୂତ୍ରରୁ ପ୍ରକାଶ। ହେଲେ ଦୀର୍ଘଦିନ ହେଲା ନ ଫେରିବାରୁ ସେମାନେ ସନ୍ଦେହ କରି ବୋଡେନ ଥାନାରେ ଲିଖିତ ଏତଲା ଦେଇଥିଲେ। ୭ ଦିନ ପରେ ପୋଲିସ କେବଳ ମାମଲା ରୁଜୁ କରି କାମ ସାରିଦେଇଛି। ପରେ ପରିବାର ଲୋକେ ନୂଆପଡା ଆରକ୍ଷୀ ଅଧୀକ୍ଷକଙ୍କ ଦ୍ୱାରସ୍ଥ ହୋଇଛନ୍ତି। ଜୟଲାଲଙ୍କୁ ସୁରକ୍ଷିତ ଘରକୁ ଫେରାଇ ଆଣିବା ସହ ଘଟଣାରେ ସମ୍ପୃକ୍ତ ଥିବା ବ୍ୟକ୍ତିମାନଙ୍କ ବିରୋଧରେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ସେମାନେ ଦାବି କରିଛନ୍ତି। ତୁରନ୍ତ ପଦକ୍ଷେପ ନିଆ ନ ଗଲେ ଜିଲାପାଳଙ୍କ ଅଫିସ ଆଗରେ ଧାରଣା ଦେବାକୁ ଚେତାବନୀ ଦେଇଛନ୍ତି। ଏ ସଂକ୍ରାନ୍ତରେ ଜିଲା ଆରକ୍ଷୀ ଅଧୀକ୍ଷକ ଅମ୍ରିତପାଲ ସିଂଙ୍କୁ ପଚାରିବାରୁ ଏ ନେଇ ଅବଗତ ଅଛୁ। ଘଟଣାର ପର୍ଦ୍ଦାଫାଶ କରିବା ପାଇଁ ସବୁ ଦିଗରୁ ତଦନ୍ତ ଚାଳିଛି ା ବହୁତ ଶୀଘ୍ର ଦଲାଲ ଧରାପଡିବେ ବୋଲି କହିଥିଲେ।