ବଲିଉଡ୍ର ଲୋକପ୍ରିୟ ଅଭିନେତ୍ରୀ ଜୟା ପ୍ରଦାଙ୍କୁ ଇତିମଧ୍ୟରେ ୫୯ ବର୍ଷ ହୋଇଛି। ୩ ଏପ୍ରିଲ, ୧୯୬୨ରେ ଆନ୍ଧ୍ରପ୍ରଦେଶରେ ସେ ଜନ୍ମଗ୍ରହଣ କରିଥିଲେ। ବଲିଉଡ୍ ସାଙ୍ଗକୁ ସେ ସାଉଥ୍ର ଅନେକ ସୁପରହିଟ୍ ଫିଲ୍ମରେ ମଧ୍ୟ କାମ କରିଛନ୍ତି। ତେବେ ଜୟାଙ୍କ ଜୀବନ ଅନେକ ରହସ୍ୟରେ ପରିପୂର୍ଣ୍ଣ। ନିଜ ଜୀବନୀ ବିଷୟରେ ଏକ ସାକ୍ଷାତ୍କାରରେ ସେ ବିଶଦ ଭାବେ କହିଥିଲେ। ଅନେକ ସୁପରହିଟ୍ ଫିଲ୍ମରେ କାମ କରିସାରିଥିବା ଜୟାଙ୍କୁ ଏବେ ବଡ଼ ପରଦାରେ ଖୁବ୍ କମ୍ ଦେଖିବାକୁ ମିଳୁଛି। ଅନେକ ଦିନ ହେବ ସେ ଅଭିନୟଠାରୁ ଦୂରେଇ ଯାଇଥିବା ବେଳେ ରାଜନୀତିରେ ସକ୍ରିୟ ଅଛନ୍ତି।
ଯେତେବେଳେ ଜୟା ମାତ୍ର ୧୪ ବର୍ଷର ହୋଇଥିଲେ, ସ୍କୁଲରେ ଏକ ବାର୍ଷିକ ଉତ୍ସବରେ ତାଙ୍କର ନୃତ୍ୟ ଦେଖି ଜଣେ ନିର୍ଦ୍ଦେଶକ ତାଙ୍କୁ ତେଲୁଗୁ ଫିଲ୍ମରେ ଡ୍ୟାନ୍ସ ପାଇଁ ଅଫର ଦେଇଥିଲେ। ଫିଲ୍ମରେ ୩-୪ ମିନିଟର ଏହି ନୃତ୍ୟ ପାଇଁ ତାଙ୍କୁ ସେହି ସମୟରେ ପାରିଶ୍ରମିକ ୧୦ ଟଙ୍କା ମିଳିଥିଲା। କିନ୍ତୁ ଜୟାଙ୍କ ସେହି ନୃତ୍ୟ ତାଙ୍କୁ ଲୋକପ୍ରିୟ କରିଦେଇଥିଲା। ଏହା ପରେ ତାଙ୍କ ନିକଟରେ ଫିଲ୍ମର ଅଫର ଆସିବାକୁ ଲାଗିଲା।
୧୭ ବର୍ଷ ବୟସରେ ତାଙ୍କୁ ସାଉଥ୍ର ଲୋକପ୍ରିୟ ଅଭିନେତ୍ରୀଙ୍କ ମଧ୍ୟରେ ଗଣନା କରାଗଲା। ୧୯୭୯ରେ ଫିଲ୍ମ ‘ସରଗମ୍’ରୁ ସେ ବଲିଉଡ୍ରେ ଡେବ୍ୟୁ କରିଥିଲେ। ମାତ୍ର ୮୦ ଦଶକରେ ସେ ବଲିଉଡ୍ର ଲୋକପ୍ରିୟ ଅଭିନେତ୍ରୀ ହୋଇସାରିଥିଲେ। ଏଣୁ ସମସ୍ତ ନିର୍ମାତା, ନିର୍ଦ୍ଦେଶକ ତାଙ୍କୁ ନିଜ ଫିଲ୍ମରେ ନେବାକୁ ଚାହିଁଲେ। ଏହି ସମୟରେ ତାଙ୍କ ଘରେ ଇନ୍କମ୍ ଟ୍ୟାକ୍ସ ରେଡ୍ ହୋଇଥିଲା। ଏହାପରଠାରୁ ତାଙ୍କର କ୍ୟାରିୟର ଗ୍ରାଫ୍ ଧୀରେ ଧୀରେ ଖସିବାକୁ ଲାଗିଲା। ଏହାରି ମଧ୍ୟରେ ସେ ପ୍ରଯୋଜକ ଶ୍ରୀକାନ୍ତ ନହଟାଙ୍କ ନିକଟତର ହୋଇଥିଲେ। ଉଭୟ ବିବାହ କରିବାକୁ ମଧ୍ୟ ଚାହଁୁଥିଲେ, ମାତ୍ର ସବୁଠାରୁ ବଡ଼ ସମସ୍ୟା ଥିଲା ନହଟା ପୂର୍ବରୁ ବିବାହିତ ଥିଲେ ଏବଂ ସେ ୩ ସନ୍ତାନର ବାପା ଥିଲେ। ଶେଷରେ ନହଟା ପ୍ରଥମ ସ୍ତ୍ରୀଙ୍କୁ ଛାଡ଼ପତ୍ର ନ ଦେଇ ୧୯୮୬ରେ ଜୟାଙ୍କୁ ବିବାହ କଲେ। ମାତ୍ର ନହଟାଙ୍କ ପ୍ରଥମ ସ୍ତ୍ରୀ ଏ ନେଇ କେବେହେଲେ ବିରୋଧ କଲେ ନାହିଁ। ଜୟାଙ୍କ ବିବାହ ପରେ ତାଙ୍କର ଫିଲ୍ମ କ୍ୟାରିୟର ଶେଷ ହେବାକୁ ଲାଗିଲା। ତାଙ୍କର ବୈବାହିକ ଜୀବନ ମଧ୍ୟ ସେତେଟା ଭଲ ରହିଲା ନାହିଁ। କାରଣ ନହଟା ପ୍ରଥମ ସ୍ତ୍ରୀ ଏବଂ ୩ ପିଲାଙ୍କୁ ଏକାକୀ ଛାଡିବାକୁ ଚାହୁଁ ନ ଥିଲେ। ଏଣୁ ଜୟାଙ୍କୁ ସ୍ତ୍ରୀର ମାନ୍ୟତା ମିଳିଲା ନାହିଁ। ଜୟାଙ୍କର ଜନ୍ମିତ ସନ୍ତାନ ନାହାନ୍ତି। ସେ ନିଜ ଭଉଣୀର ପୁଅ ସିଦ୍ଧୁଙ୍କୁ ପୋଷ୍ୟପୁତ୍ର ଭାବେ ଗ୍ରହଣ କରିଛନ୍ତି। ଏବେ ସେ ସିଦ୍ଧୁଙ୍କ ସହ ରହୁଛନ୍ତି।
