ମସ୍କୋ/ଟୋକିଓ,୬।୧୨ : ରୁଷିଆ ଏବଂ ଜାପାନ ମଧ୍ୟରେ ପୁଣି ଥରେ ଉତ୍ତେଜନା ବୃଦ୍ଧି ହେବାର ଆଶଙ୍କା ଦେଖାଦେଇଛି। ବାସ୍ତବରେ ରୁଷିଆର ଉତ୍ତେଜନାମୂଳକ ପଦକ୍ଷେପ ପରେ ଏଭଳି ସ୍ଥିତି ସୃଷ୍ଟି ହୋଇଥିବା କୁହାଯାଉଛି। ରୁଷିଆ ଜାପାନ ନିକଟସ୍ଥ ବିବାଦୀୟ କୁରିଲ ଦ୍ୱୀପପୁଞ୍ଜରେ କ୍ଷେପଣାସ୍ତ୍ର ପ୍ରଣାଳୀ ସ୍ଥାପନ କରିଛି। ରୁଷିିଆର ଏହି ପଦକ୍ଷେପ ବିବାଦକୁ ବଢ଼ାଇବାର ଆଶଙ୍କା ରହିଛି।
କୁରିଲ ଦ୍ୱୀପପୁଞ୍ଜ ଜାପାନ ଏବଂ ରୁଷିଆର କାମଚଟକା ଉପଦ୍ୱୀପ ମଧ୍ୟରେ ବିସ୍ତାରିତ ଏକ ରଣନୈତିକ ଶୃଙ୍ଖଳାର ଏକ ଅଂଶ। ଯାହା ପ୍ରଥମ ବିଶ୍ୱଯୁଦ୍ଧ ସମୟରୁ ବିବାଦରେ ରହିଆସିଛି। ଜାପାନୀମାନେ ଏହି ଦ୍ୱୀପପୁଞ୍ଜକୁ ଉତ୍ତର ଅଞ୍ଚଳ ବୋଲି କହୁଥିବାବେଳେ ରୁଷିଆ ଏହାକୁ କୁରିଲ ବୋଲି କହୁଛି। ଏହି ଦ୍ୱୀପପୁଞ୍ଜକୁ ନେଇ ଜାପାନ ଏବଂ ରୁଷିଆ ମଧ୍ୟରେ ଦୀର୍ଘ ଦିନ ଧରି ବିବାଦ ଲାଗି ରହିଛି। ପ୍ରାୟ ୨୦ ବର୍ଷ ମଧ୍ୟରେ ପ୍ରଥମ ଥର ପାଇଁ ଜାପାନ ଏହି ଦ୍ୱୀପପୁଞ୍ଜକୁ ବେଆଇନ ଭାବେ ଅଧିକୃତ ଅଞ୍ଚଳ ବୋଲି କହିଛି।
ଏହି ବିବାଦ ଦ୍ୱିତୀୟ ବିଶ୍ୱଯୁଦ୍ଧର ଶେଷ ଭାଗରୁ ଆରମ୍ଭ ହୋଇଥିଲା। ରୁଷିଆ ଦାବି କରୁଛି ଯେ ଏହା ଦ୍ୱିତୀୟ ବିଶ୍ୱ ଯୁଦ୍ଧରେ ଏହି ଦ୍ୱୀପ ଜିତିଥିବାରୁ ଏହା ଏହାର ଅଟେ। ଅନ୍ୟପକ୍ଷରେ ଜାପାନ କହୁଛି ଯେ ଷୋଡଶ ଶତାବ୍ଦୀରେ ଜାପାନୀମାନେ ଏହି ଦ୍ୱୀପପୁଞ୍ଜ ପରିଦର୍ଶନ କରିଥିଲେ, ଯାହା ରୁଷିଆ ଆସିବାର ପ୍ରାୟ ୨୦୦ବର୍ଷ ପୂର୍ବରୁ। ତେଣୁ ଦ୍ୱୀପପୁଞ୍ଜ ସେମାନଙ୍କ ଅଧୀନରେ ଅଛି। ଦ୍ୱିତୀୟ ବିଶ୍ୱଯୁଦ୍ଧ ଶେଷ ହେବା ପରେ ଜାପାନ ସହଯୋଗୀ ବାହିନୀ ସହିତ ୧୯୫୧ ସାନ ଫ୍ରାନ୍ସିସ୍କୋ ଶାନ୍ତି ଚୁକ୍ତିନାମା ସ୍ବାକ୍ଷର କରିଥିଲା। ଯେଉଁଥିରେ ଜାପାନ କୁରିଲ ଦ୍ୱୀପପୁଞ୍ଜ ଉପରୁ ସମସ୍ତ ଅଧିକାର ଦାବି ତ୍ୟାଗ କରିଥିଲା।
