ମୁମ୍ବାଇ: ବଲିଉଡ୍ ନାୟିକା ଜାହ୍ନବୀ କପୁରଙ୍କ ହାତରେ ଏବେ ଅଫର ପରେ ଅଫର୍ । ମାର୍ଚ୍ଚରେ ରିଲିଜ୍ ହୋଇଥିବା ଫିଲ୍ମ ‘ରୁହି’ରେ ଜାହ୍ନବୀ ରାଜକୁମାର ରାଓଙ୍କ ସହ ନଜର ଆସିଥିଲେ । ଏଥର ପୁଣିଥରେ ଏହି ଯୋଡିଙ୍କୁ ଦେଖିବାକୁ ମିଳିବ ବୋଲି ଶୁଣାଯାଉଛି । ମୁଭି ‘ଗୁଞ୍ଜନ ସାକ୍ସେନା’ର ନିର୍ଦ୍ଦେଶକ ଶରନ ଶର୍ମା ପୁଣିଥରେ ଜାହ୍ନବୀଙ୍କୁ ନେଇ କୁଆଡେ କାମ ଆରମ୍ଭ କରିବାକୁ ଯାଉଛନ୍ତି । ଏଥିରେ ସେ ରାଜକୁମାର ରାଓଙ୍କୁ ନାୟକ ଭୂମିକାରେ ନେଇ ପାରନ୍ତି ବୋଲି କୁହାଯାଉଛି । ମିଡିଆ ରିପୋର୍ଟ ଅନୁଯାୟୀ, ଏବେ ସ୍କ୍ରିପ୍ଟ ଉପରେ କାମ ଚାଲିଛି । ଫିଲ୍ମର ଟାଇଟଲ ଫାଇନାଲ ହୋଇ ନ ଥିଲେ ବି ଜାହ୍ନବୀ ଓ ରାଜକୁମାର ଏଥିରେ କ୍ରିକେଟର୍ସ ଭୂମିକାରେ ନଜର ଆସିବେ ବୋଲି କୁହାଯାଉଛି । ଏଥିପାଇଁ ସେମାନଙ୍କୁ ଟ୍ରେନିଂ ବି ଦିଆଯିବ । ଏବେ ଜାହ୍ନବୀଙ୍କ ହାତରେ ହେଲେନ୍, ଦୋସ୍ତାନା ୨ ଭଳି ବଡ ବଡ ପ୍ରୋଜେକ୍ଟ ଥିବା ବେଳେ ରାଜକୁମାର ରାଓଙ୍କ ହାତରେ ବି ଡଜନେ ଅଫର ରହିଛି । ସେ ହମ ଦୋ ହମାରେ ଦୋ, ବଧାଇ ଦୋ, ସେକେଣ୍ଡ ଇନିଙ୍ଗସ୍ ରେ ନଜର ଆସିବେ ।
