ୱେଲିଂଟନ୍‌ରେ ଜୟସ୍ବାଲଙ୍କ ଧମାକା: SENA ଦେଶରେ ଗୌତମ ଗମ୍ଭୀରଙ୍କୁ ପକାଇଲେ ପଛରେ

ୱେଲିଂଟନ,୨୦।୧୧: ୱେଲିଂଟନରେ ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ଚାଲିଥିବା ପ୍ରଥମ ଟେଷ୍ଟ ମ୍ୟାଚ୍‌ରେ ଭାରତୀୟ ଓପନର୍‌ ଯଶସ୍ବୀ ଜୟସ୍ବାଲଙ୍କ ବ୍ୟାଟ୍‌ରେ ଦେଖିବାକୁ ମିଳିଛି ଦମ୍‌ଦାର ପ୍ରଦର୍ଶନ। ପ୍ରଥମ ପାଳିରେ ନ୍ୟୁଜିଲାଣ୍ଡ ୩୬୮ ରନ କରିଥିବା ବେଳେ ଏହାର ଜବାବରେ କେଏଲ ରାହୁଲଙ୍କ ସହ ଓପନିଂ କରିବାକୁ ଆସିଥିବା ଜୟସ୍ବାଲ ଆକ୍ରମଣାତ୍ମକ ବ୍ୟାଟିଂ କରିଛନ୍ତି। ସେ ମାତ୍ର ୬୬ଟି ବଲ୍‌ରେ ନିଜର ଅର୍ଦ୍ଧଶତକ ପୂରଣ କରି ଦଳକୁ ଦୃଢ଼ ଆରମ୍ଭ ଦେଇଛନ୍ତି।

ନ୍ୟୁଜିଲାଣ୍ଡର ପରିବେଶ ଓ ପିଚ୍‌ର ଆହ୍ବାନକୁ ଖାତିର ନକରି ଜୟସ୍ବାଲ ଆରମ୍ଭରୁ ହିଁ ଆକ୍ରମଣାତ୍ମକ ଶୈଳୀରେ ବ୍ୟାଟିଂ କରିଥିଲେ। କିୱି ଦ୍ରୁତ ବୋଲରଙ୍କୁ ଆକ୍ରମଣ କରି ସେ ମାତ୍ର ୬୬ ବଲ୍‌ଷର ଅର୍ଦ୍ଧଶତକ ହାସଲ କରିଥିଲେ। ଏହା ତାଙ୍କ ଟେଷ୍ଟ କ୍ୟାରିୟରର ୧୪ତମ ଅର୍ଦ୍ଧଶତକ। ଏହି ଅର୍ଦ୍ଧଶତକୀୟ ପାଳି ମଧ୍ୟରେ ସେ ୩୬ ରନ କେବଳ ଚୌକାରୁ ସଂଗ୍ରହ କରିଥିଲେ।

ଏହି ଅର୍ଦ୍ଧଶତକ ସହ ଜୟସ୍ବାଲ ଆଉ ଏକ ରେକର୍ଡ ନିଜ ନାମରେ କରିଛନ୍ତି। SENA ଦେଶ ଦକ୍ଷିଣ ଆଫ୍ରିକା, ଇଂଲଣ୍ଡ, ନ୍ୟୁଜିଲାଣ୍ଡ ଓ ଅଷ୍ଟ୍ରେଲିଆରେ ଭାରତୀୟ ଓପନର୍‌ ଭାବେ ସେ ନିଜର ଅଷ୍ଟମ ୫୦ କିମ୍ବା ତା’ଠାରୁ ଅଧିକ ରନର ସ୍କୋର କରିଛନ୍ତି। ଏହା ସହ ପୂର୍ବତନ ଭାରତୀୟ ଓପନର୍‌ ଗୌତମ ଗମ୍ଭୀରଙ୍କ ୭ଟି ୫୦+ ସ୍କୋରର ରେକର୍ଡକୁ ପଛରେ ପକାଇଛନ୍ତି।

SENA ଦେଶରେ ଭାରତୀୟ ଓପନର୍‌ ଭାବେ ସର୍ବାଧିକ ୫୦+ ସ୍କୋର କରିବାର ରେକର୍ଡ କିମ୍ବଦନ୍ତୀ ବ୍ୟାଟର୍‌ ସୁନୀଲ ଗାଭାସ୍କରଙ୍କ ନାମରେ ରହିଛି। ସେ ୧୯ ଥର ଏହି ସଫଳତା ହାସଲ କରିଛନ୍ତି। ଏହି ତାଲିକାରେ ୧୨ଟି ୫୦+ ସ୍କୋର ସହ କେଏଲ ରାହୁଲ ଦ୍ୱିତୀୟ ସ୍ଥାନରେ ଅଛନ୍ତି। ବୀରେନ୍ଦ୍ର ସେହ୍ବାଗ ୧୦ ଥର ଓ ମୁରଲୀ ବିଜୟ ୯ ଥର ଏହି ସଫଳତା ପାଇଛନ୍ତି। ଏବେ ୮ଟି ୫୦+ ସ୍କୋର ସହ ଜୟସ୍ବାଲ ଗୌତମ ଗମ୍ଭୀରଙ୍କୁ ପଛରେ ପକାଇଛନ୍ତି।

 

Dharitri – Odisha’s No.1 Odia Daily

 

Share