ଲକ୍ଷ୍ନୌ,୧୨।୮: ଅଗଷ୍ଟ ୧୫ ପୂର୍ବରୁ ଉତ୍ତରପ୍ରଦେଶ ଏଟିଏସ୍ ଏକ ବଡ଼ ଆତଙ୍କବାଦୀ ଆକ୍ରମଣକୁ ପଣ୍ଡ କରିଛି। ସାହାରନପୁରରୁ ଜୈଶ-ଏ-ମହମ୍ମଦ ଏବଂ ପାକିସ୍ତାନର ସଂଗଠନ ତେହେରିକ-ଏ-ତାଲିବାନ ସହ ଜଡିତ ଜଣେ ସନ୍ଦିଗ୍ଧ ଆତଙ୍କବାଦୀଙ୍କୁ ଏଟିଏସ୍ ଗିରଫ କରିଛି। ଶୁକ୍ରବାର ସାହାରନପୁରର ଗଙ୍ଗୋହ ନିବାସୀ ଆତଙ୍କବାଦୀ ମହମ୍ମଦ ନାଦିମଙ୍କୁ ଏଟିଏସ୍ ଗିରଫ କରିଛି। ମହମ୍ମଦ ନାଦିମଙ୍କଠାରୁ ବିଭିନ୍ନ ପ୍ରକାରର ଆଇଇଡି ଏବଂ ଫିଦାଇ ଫୋର୍ସର ବୋମା ତିଆରି ପାଇଁ ତାଲିମ ସାହିତ୍ୟ ଉଦ୍ଧାର କରିଛି। ସବୁଠାରୁ ବଡ଼ କଥା ହେଉଛି ନାଦିମଙ୍କୁ ପଚରାଉଚରା ବେଳେ ଜୈଶ ସଂଗଠନ ପକ୍ଷରୁ ତାଙ୍କୁ ନୂପୁର ଶର୍ମାଙ୍କୁ ହତ୍ୟା କରିବାର ଦାୟିତ୍ୱ ଦିଆଯାଇଥିଲା ବୋଲି ପୋଲିସ ଦାବି କରିଛି। ପୋଲିସ ଦାବି କରିଛି ଯେ, ନାଦିମ ଜୈଶ-ଏ-ମହମ୍ମଦ ଏବଂ ତେହେରିକ-ଏ-ତାଲିବାନ ପାକିସ୍ତାନର ଆତଙ୍କବାଦୀଙ୍କ ସହ ସିଧାସଳଖ ଯୋଗାଯୋଗରେ ରହିଥିଲେ। ଜୈଶ ଏବଂ ତେହେରିକ-ଏ-ତାଲିବାନର ଆଦର୍ଶ ଦ୍ୱାରା ପ୍ରଭାବିତ ହୋଇ ସେ ଏକ ଆକ୍ରମଣ ପାଇଁ ଷଡ଼ଯନ୍ତ୍ର ରଚିଥିଲେ। ଫିଦାୟିନ୍ ବିସ୍ଫୋରଣ ସହ ଜଡିତ ଏକ ପିଡିଏଫ୍ ଫାଇଲ ମଧ୍ୟ ନାଦିମଙ୍କ ମୋବାଇଲରୁ ମିଳିଛି। ତାଙ୍କ ମୋବାଇଲରୁ ଜୈଶ-ଏ-ମହମ୍ମଦ ଏବଂ ଟିଟିପି ଆତଙ୍କବାଦୀଙ୍କ ସହ ଚାଟ୍ ଓ ଭଏସ୍ ମେସେଜ କରିଥିବା ଦେଖିବାକୁ ମିଳିଛି। ହ୍ବାଟସ ଆପ୍, ଟେଲିଗ୍ରାମ, ଆଇଏମ୍ଓ, ଫେସ୍ବୁକ ମେସେଞ୍ଜର, କ୍ଲବ ହାଉସ ଭଳି ସୋସିଆଲ ମିଡିଆ ଜରିଆରେ ୨୦୧୮ରୁ ନାଦିମ ଜୈଶ ଏବଂ ଟିଟିପି ଆତଙ୍କବାଦୀଙ୍କ ସହ ଜଡିତ ଥିବା ପୋଲିସ ଦାବି କରିଛି। ଭର୍ଚୁଆଲ ନମ୍ବର ପ୍ରସ୍ତୁତ କରିବାକୁ ସେ ଏହି ଆତଙ୍କବାଦୀଙ୍କଠାରୁ ତାଲିମ ନେଇଥିଲେ। ଆତଙ୍କବାଦୀ ସଂଗଠନ ତାଙ୍କୁ ୩୦ରୁ ଅଧିକ ଭର୍ଚୁଆଲ ନମ୍ବର ସୋସିଆଲ ମିଡିଆ ଆଇଡି ତିଆରି କରିଦେଇଥିଲେ। ଏଟିଏସ୍ ଅନୁଯାୟୀ, ଆଫଗାନିସ୍ତାନ ଏବଂ ପାକିସ୍ତାନରେ କାର୍ଯ୍ୟ କରୁଥିବା ଜୈଶ ଏବଂ ଟିଟିପି ଆତଙ୍କବାଦୀଙ୍କୁ ସ୍ବତନ୍ତ୍ର ତାଲିମ ଦେବା ପାଇଁ ଆତଙ୍କବାଦୀମାନେ ନାଦିମଙ୍କୁ ପାକିସ୍ତାନକୁ ଡାକିଥିଲେ। ସେ ଖୁବ ଶୀଘ୍ର ଭିସା ନେଇ ପାକିସ୍ତାନ ଯିବାକୁ ଯାଉଥିଲେ।
