ଅଧ୍ୟାପକ ହେବାକୁ ଲକ୍ଷ୍ୟ ରଖିଥିବା ଜଗବନ୍ଧୁ ଏବେ ଶଯ୍ୟାଶାୟୀ
11:11 amOctober 11, 2023October 11, 2023 / 09

ପରଜଙ୍ଗ,୧୧।୧୦: (ନିଗମାନନ୍ଦ ଦଳବେହେରା): ଇଚ୍ଛା ଥିଲା ଅଧ୍ୟାପକ ହେବେ। ରାଜମିସ୍ତ୍ରି କାମ କରୁଥିବା ବାପାଙ୍କ ଅଭାବୀ ସଂସାରର ବୋଝକୁ ସହଜ କରିଦେବେ। ସେଥିପାଇଁ ନାନା ଅଭାବ ଅସୁବିଧା ମଧ୍ୟରେ ବି ଅଧ୍ୟୟନ କ୍ଷେତ୍ରକୁ ସର୍ବଦା ଅଗ୍ରାଧିକାର ଦେଉଥିଲେ। ଏପରି କି ତାଳଚେର ସ୍ବୟଂଶାସିତ କଲେଜରୁ ଯୁକ୍ତ ୩ରେ ପ୍ରଥମ ଶ୍ରେଣୀରେ ଉତ୍ତୀର୍ଣ୍ଣ ମଧ୍ୟ ହୋଇଥିଲେ। ଉଚ୍ଚତର ଶିକ୍ଷା ପାଇଁ ଅର୍ଥ ଯୋଗାଡ଼ ଉଦ୍ଦେଶ୍ୟରେ ଜଣେ ଠିକାଦାରଙ୍କ ନିକଟରେ ପାର୍ଟଟାଇମ୍‌ କାମ କରୁଥିଲେ। ହେଲେ ଲକ୍ଷ୍ୟସ୍ଥଳରେ ପହଞ୍ଚିବା ପଥରେ ବାଧକ ସାଜିଲା କିଡ୍‌ନୀ ରୋଗ। ୨ଟି ଯାକ କିଡ୍‌ନୀର ୯୦ ଭାଗ ନଷ୍ଟ ହୋଇଯାଇଥିବାରୁ ଏବେ ଶଯ୍ୟାଶାୟୀ ହୋଇପଡ଼ିଛନ୍ତି ଢେଙ୍କାନାଳ ଜିଲା ପରଜଙ୍ଗ ବ୍ଲକ ପିତିରି ଗାଁର ମେଧାବୀ ଛାତ୍ର ଜଗବନ୍ଧୁ ରାଉତ (୨୪)। ପୁଅକୁ ଗୋଟିଏ କିଡ୍‌ନୀ ଦେବାକୁ ବାପା ଦୁଃଖବନ୍ଧୁ ପ୍ରସ୍ତୁତ ଥିଲେ ହେଁ ଏଥିପାଇଁ ୨୦ରୁ ୨୫ ଲକ୍ଷ ଟଙ୍କା ଆବଶ୍ୟକ ବୋଲି ଡାକ୍ତର କହୁଛନ୍ତି। ଫଳରେ ସରକାରୀ ଓ ବେସରକାରୀ ସହାୟତା ପାଇଁ ହାତ ପାତିଛନ୍ତି ଅସହାୟ ଛାତ୍ର ଜଗବନ୍ଧୁ ଓ ବାପା ଦୁଃଖବନ୍ଧୁ।
ଦୁଃଖବନ୍ଧୁ କହିଛନ୍ତି, ତାଙ୍କର ୩ ଝିଅ ଓ ଗୋଟିଏ ପୁଅ। ରାଜମିସ୍ତ୍ରି କାମ କରି ଯାହା ରୋଜଗାର କରନ୍ତି ତାହା ପରିବାର ଚଳାଇବାକୁ ନିଅଣ୍ଟ। ତଥାପି ପୁଅ ଜଗବନ୍ଧୁ ପିଲାବେଳୁ ଭଲ ପାଠ ପଢ଼ନ୍ତି। ଅଧ୍ୟାପକ ହେବାର ସ୍ବପ୍ନ ଥିବାରୁ ସେ ଦିଗରେ ଉଦ୍ୟମ କରିଆସିଛନ୍ତି। ହେଲେ ହଠାତ୍‌ ପୁଅର ଦେହ ଅସୁସ୍ଥ ହେଲା। ତୁରନ୍ତ ତାଙ୍କୁ କଟକର ଏକ ଘରୋଇ ହସ୍ପିଟାଲକୁ ଚିକିତ୍ସା ପାଇଁ ନେଇଥିଲେ। ସେଠାରେ ଡାକ୍ତର ଜଗବନ୍ଧୁଙ୍କ ୨ଟି ଯାକ କିଡ୍‌ନୀ ୯୦ ଭାଗ ନଷ୍ଟ ହୋଇଯାଇଥିବା କହିଥିଲେ। ଏହା ଜାଣିବା ପରେ ତାଙ୍କ ପାଦ ତଳୁ ଯେପରି ମାଟି ଖସିଯାଇଥିଲା। ପରିବାରର ସମସ୍ତ ସଦସ୍ୟ ଭାଙ୍ଗି ପଡ଼ିଥିଲେ। ଜୀବନର ଲକ୍ଷ୍ୟ ପୂରଣ ସମୟ ପାଖେଇ ଆସୁଥିବା ବେଳେ ଭାଗ୍ୟର ଏମିତି ବିଡ଼ମ୍ବନା ପୂରା ପରିବାରକୁ ଅସହାୟ କରିଦେଇଥିଲା। ପାଖରେ ଅର୍ଥ ନ ଥିବାରୁ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାରେ ସେ ପୁଅର ଚିକିତ୍ସା କରିଥିଲେ। ହେଲେ କିଡ୍‌ନୀ ପ୍ରତିରୋପଣ ବ୍ୟତୀତ ଅନ୍ୟ କୌଣସି ଉପାୟ ନ ଥିବା ଡାକ୍ତର କହିଥିଲେ। ପୁଅକୁ ଗୋଟିଏ କିଡ୍‌ନୀ ଦେବାକୁ ସେ ପ୍ରସ୍ତୁତ ଥିବା ଜଣାଇବା ପରେ ଡାକ୍ତର ଏଥିପାଇଁ ୨୦ରୁ ୨୫ ଲକ୍ଷ ଟଙ୍କା ଖର୍ଚ୍ଚ ହେବ ବୋଲି କହିଥିଲେ। ପୁଅର ଚିକିତ୍ସା ପାଇଁ ହାତଉଧାରି ବହୁ ଟଙ୍କା ଆଣିଥିବା ବେଳେ ଜାଗାବାଡ଼ି ବୋଲି କିଛି ନାହିଁ। ତେଣୁ ସରକାର ଓ ସହୃଦୟ ବ୍ୟକ୍ତିଙ୍କ ସହାୟତା ହିଁ ତାଙ୍କ ପୁଅକୁ ଭଲ କରିପାରିବ ବୋଲି ଦୁଃଖବନ୍ଧୁ କହିଛନ୍ତି। ତେଣୁ ସହାୟତା କରିବାକୁ ଚାହଁୁଥିବା ଲୋକେ ଫୋନ ନମ୍ବର ୯୬୯୨୫୩୫୫୯୮ରେ ତାଙ୍କୁ ସାହାଯ୍ୟ କରିପାରିବେ ବୋଲି ଦୁଃଖବନ୍ଧୁ ପ୍ରକାଶ କରିଛନ୍ତି। ଏ ସମ୍ପର୍କରେ ପରଜଙ୍ଗ ବିଡିଓ ମନ୍ମଥ ନାୟକ କହିଛନ୍ତି, ଘଟଣା ବିଷୟରେ ସେ ଜିଲାପାଳଙ୍କୁ ପତ୍ର ମାଧ୍ୟମରେ ଜଣାଇବା ସହିତ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧିକାରୀଙ୍କୁ ମଧ୍ୟ ଚିଠି କରିଛନ୍ତି। ଖୁବ୍‌ଶୀଘ୍ର ଜଗବନ୍ଧୁଙ୍କ ଚିକିତ୍ସା ବ୍ୟବସ୍ଥା କରାଯିବ।