ନୂଆଦିଲ୍ଲୀ,୧୨।୭: ଅଲରାଉଣ୍ଡର ରବୀନ୍ଦ୍ର ଜାଡେଜା ଭାରତର ସର୍ବକାଳୀନ ଶ୍ରେଷ୍ଠ ଫିଲ୍ଡର ବୋଲି ପୂର୍ବତନ ବ୍ୟାଟ୍ସମ୍ୟାନ ଆକାଶ ଚୋପ୍ରା କହିଛନ୍ତି। ଭାରତର ଶ୍ରେଷ୍ଠ ୬ଜଣ ଫିଲ୍ଡର ଚୟନ ପାଇଁ ସେ ପ୍ରୟାସ କରୁଥିଲେ। ତେବେ ସେ ଦେଖିଥିବା ଭାରତୀୟ ଖେଳାଳିଙ୍କ ମଧ୍ୟରୁ ଚୟନ କରିଛନ୍ତି ବୋଲି କହିଛନ୍ତି। ଜାଡେଜା ଜଣେ ଉଚ୍ଚକୋଟୀର ଫିଲ୍ଡର। ତାଙ୍କର ରକେଟ ଆର୍ମ ରହିଛି। ବିଶ୍ୱ କ୍ରିକେଟରେ ତାଙ୍କ ସର୍ବଶ୍ରେଷ୍ଠ ଆର୍ମ ରହିଛି। ତାଙ୍କର ଗ୍ରାଉଣ୍ଡ କଭରେଜ ଉଚ୍ଚକୋଟୀର। ତେବେ ସ୍ଲିପ୍ରେ ସେ ଫିଲ୍ଡର ହିସାବରେ ଶ୍ରେଷ୍ଠ ପ୍ରଦର୍ଶନ କରି ନ ଥାନ୍ତି ବୋଲି ଚୋପ୍ରା ତାଙ୍କ ଅଫିସିଆଲ ୟୁଟ୍ୟୁବ୍ ଚ୍ୟାନେଲରେ କହିଛନ୍ତି।
ପୂର୍ବରୁ ଜାଡେଜାଙ୍କୁ ଟେଷ୍ଟ କ୍ରିକେଟରେ ଏକବିଂଶ ଶତାବ୍ଦୀରେ ଭାରତର ‘ମୋଷ୍ଟ ଭେଲ୍ୟୁଏବଲ୍’ କ୍ରିକେଟର ବିବେଚନା କରାଯାଇଥିଲା। ଜାଡେଜାଙ୍କ ପରେ ଚୋପ୍ରା ସୁରେଶ ରାଇନା, ମହମ୍ମଦ କୈଫ୍, ଯୁବରାଜ ସିଂ, କପିଳ ଦେବ ଓ ବିରାଟ କୋହଲିଙ୍କୁ ଭାରତର ସର୍ବକାଳୀନ ଶ୍ରେଷ୍ଠ ଫିଲ୍ଡର ତାଲିକାରେ ସାମିଲ କରିଛନ୍ତି। ୧୯୮୩ ବିଶ୍ୱକପ୍ ଫାଇନାଲରେ କପିଳ ଚମତ୍କାର ଢଙ୍ଗରେ ଓ୍ବେଷ୍ଟଇଣ୍ଡିଜ୍ର ଭିଭିଆନ ରିଚାଡର୍ସ କ୍ୟାଚ୍ ଧରି ଭାରତ ବିଜୟରେ ମୁଖ୍ୟ ଭୂମିକା ଗ୍ରହଣ କରିଥିଲେ। ସେହିପରି ଯୁବରାଜ ଓ କୈଫ୍ ମଧ୍ୟ ଭାରତୀୟ ଫିଲ୍ଡିଂରେ ଆସିଥିବା ବିପ୍ଳବରେ ମହତ୍ତ୍ୱପୂର୍ଣ୍ଣ ଯୋଗଦାନ କରିଥିଲେ। ପ୍ରଥମ ୧୫ ଓଭରରେ ୩୦ ୟାର୍ଡ ସର୍କଲରେ ଏହି ଫିଲ୍ଡର ଚମତ୍କାର ଫିଲ୍ହିଂ କରିଥିଲେ ଏବଂ ଶେଷରେ ସ୍ଲଗ୍ ଓଭରରେ ଆଉଟ୍ ଫିଲ୍ଡରେ ଫିଲ୍ଡିଂ କରି ଚମତ୍କାର ପ୍ରଦର୍ଶନ କରିଥିଲେ। ଏବେ କୋହଲି ଓ ଜାଡେଜା ଠିକ୍ ଏହି ଢଙ୍ଗ୍ରେ ଫିଲ୍ଡିଂ କରୁଛନ୍ତି।
