ମୁମ୍ବାଇ,୨୮।୧୨ : ମହାରାଷ୍ଟ୍ରରେ ଭାରତୀୟ ଜନତା ପାର୍ଟି ସହିତ ମିଳିତ ଭାବେ ଗଠିତ ମୁଖ୍ୟମନ୍ତ୍ରୀ ଏକନାଥ ଶିନ୍ଦେଙ୍କ ସରକାର ବୁଧବାର ଏକ ଗୁରୁତ୍ୱପୂର୍ଣ୍ଣ ବିଲ ପାରିତ କରିଛନ୍ତି। ମହାରାଷ୍ଟ୍ର ଲୋକାୟୁକ୍ତ ବିଲ ୨୦୨୨ ମହାରାଷ୍ଟ୍ର ବିଧାନସଭାରେ ଶିନ୍ଦେ ସରକାରଙ୍କ ଦ୍ୱାରା ପାରିତ ହୋଇଛି।
ଅନେକ ଦଳର ନେତା ଏହି ବିଲକୁ ବିରୋଧ କରୁଥିଲେ। ଏହା ସତ୍ତ୍ୱେ ମହାରାଷ୍ଟ୍ର ବିଧାନସଭାରେ ଏହି ବିଲ ପାରିତ ହୋଇଛି।ଏହି ବିଲ ଅନୁଯାୟୀ, ମୁଖ୍ୟମନ୍ତ୍ରୀଙ୍କ ବିରୋଧରେ କୌଣସି ତଦନ୍ତ ଆରମ୍ଭ କରିବା ପୂର୍ବରୁ ଲୋକାୟୁକ୍ତଙ୍କୁ ବିଧାନସଭାର ଅନୁମୋଦନ ନେବାକୁ ପଡ଼ିବ। ଏହା ସହିତ ବିଧାନସଭାର ମୋଟ ସଦସ୍ୟମାନଙ୍କ ଅତିକମରେ ଦୁଇ-ତୃତୀୟାଂଶ ଅନୁମୋଦନ ଆବଶ୍ୟକ ହେବ। ଫଳରେ ମୁଖ୍ୟମନ୍ତ୍ରୀଙ୍କ ବିରୋଧରେ ତଦନ୍ତ କରିବା କଷ୍ଟକର ହେବ।
ଏହା ହେଉଛି ଏକ ବିଲ ଯେଉଁଥିରେ ମୁଖ୍ୟମନ୍ତ୍ରୀ ଏବଂ କ୍ୟାବିନେଟକୁ ଦୁର୍ନୀତି ବିରୋଧୀ ଲୋକପାଳଙ୍କ ଅଧୀନରେ ଆଣିବା ପାଇଁ ବ୍ୟବସ୍ଥା ରହିଛି। ଏହି ବିଲରେ ଏହା ମଧ୍ୟ କୁହାଯାଇଛି ଯେ, ମୁଖ୍ୟମନ୍ତ୍ରୀଙ୍କ ବିରୋଧରେ ଦୁର୍ନୀତି ଅଭିଯୋଗ, ଯାହା ଆଭ୍ୟନ୍ତରୀଣ ସୁରକ୍ଷା କିମ୍ବା ଜନସାଧାରଣଙ୍କ ଆଦେଶ ସହିତ ଜଡ଼ିତ ଏପରି ମାମଲାର ଲୋକାୟୁକ୍ତ ଯାଞ୍ଚ୍ କରିବ ନାହିଁ।
ଯଦି ଲୋକାୟୁକ୍ତ ଏହି ସିଦ୍ଧାନ୍ତରେ ପହଞ୍ଚିବେ ଯେ ଏହା ପ୍ରକାଶ ଯୋଗ୍ୟ ନୁହେଁ ତେବେ ଏଭଳି ଘଟଣାର ତଦନ୍ତ ଗୁପ୍ତ ରଖାଯିବ। ଅନୁସନ୍ଧାନର ରେକର୍ଡ ପ୍ରକାଶ ପାଇବ ନାହିଁ କିମ୍ବା କାହା ପାଇଁ ଉପଲବ୍ଧ ହେବ ନାହିଁ ।
