ଜେରୁଜେଲମ, ୨୬।୧୨: ହମାସ ସହିତ ଯୁଦ୍ଧରେ ଇସ୍ରାଏଲର ଅର୍ଥବ୍ୟବସ୍ଥାର ମୂଳଦୁଆକୁ ହଲାଇ ଦେଇଛି। ରିପୋର୍ଟ ଅନୁଯାୟୀ, ଏହି ତ୍ରୌମାସରେ ଇସ୍ରାଏଲର ଅର୍ଥନୀତି ଦୁଇ ପ୍ରତିଶତ ହ୍ରାସ ପାଇବ। ରିପୋର୍ଟରେ କୁହାଯାଇଛି ଯେ ଏହାର କାରଣ ହେଉଛି ପାଲେଷ୍ଟାଇନ କର୍ମଚାରୀମାନେ ଯୁଦ୍ଧ ପୂର୍ବରୁ କାମ ଛାଡିଛନ୍ତି।
ଅକ୍ଟୋବର ୭ରେ ଯୁଦ୍ଧ ଆରମ୍ଭ ହେବା ପରେ ଇସ୍ରାଏଲ ପାଲେଷ୍ଟାଇନ କର୍ମଚାରୀମାନଙ୍କୁ ଗାଜାକୁ ପଠାଇ ଦେଇଥିଲା, ଯେଉଁ କାରଣରୁ ଅନେକ କାମ ବନ୍ଦ ହୋଇଯାଇଥିଲା। ଯୁଦ୍ଧ ଆରମ୍ଭ ପରେ ସରକାର ପ୍ରାୟ ୯ ଲକ୍ଷ ଲୋକଙ୍କୁ ସେନାରେ ସେବା କରିବାକୁ ଡାକିଥିଲେ। ଯୁଦ୍ଧ ମଧ୍ୟରେ ଏହି ଲୋକମାନେ ନିଜ କାମକୁ ଯାଉନାହାଁନ୍ତି । କାରଖାନାଗୁଡ଼ିକର କାର୍ଯ୍ୟ ସ୍ଥଗିତ ରହିଛି କାରଣ ଏହି ଆକ୍ରମଣ ଯୋଗୁ ସେମାନେ ବହୁ କ୍ଷତି ସହିଛନ୍ତି। ବିଶେଷଜ୍ଞମାନେ ବିଶ୍ୱାସ କରୁଛନ୍ତି ଯେ ଆସନ୍ତା ବର୍ଷ ଇସ୍ରାଏଲର ଅର୍ଥବ୍ୟବସ୍ଥା ମାତ୍ର ୦.୫ ପ୍ରତିଶତ ବୃଦ୍ଧି ପାଇବ।
ଇସ୍ରାଏଲରେ ଯୁଦ୍ଧ ପରଠାରୁ ୧ଲକ୍ଷ ୯୧ହଜାର ୬୬୬ ଲୋକ ବେକାରୀ ଭତ୍ତା ପାଇଁ ଆବେଦନ କରିଛନ୍ତି। ଏହି ଲୋକମାନଙ୍କ ମଧ୍ୟରୁ ଅଧିକାଂଶ କହିଛନ୍ତି ଯେ, ସେମାନଙ୍କୁ ଜବରଦସ୍ତ ଛୁଟିରେ ପଠାଯାଇଛି, ଯେଉଁଥିପାଇଁ ସେମାନଙ୍କୁ ଦରମା ମଧ୍ୟ ଦିଆଯିବ ନାହିଁ । ସାମ୍ପ୍ରତିକ ପରିବେଶରେ ପର୍ଯ୍ୟଟନ, ନିର୍ମାଣ ଏବଂ କୃଷି କ୍ଷେତ୍ରରେ ଶ୍ରମିକମାନଙ୍କର ଅଭାବ ଦେଖାଦେଇଛି। ନିର୍ମାଣ ଶିଳ୍ପ ପାଲେଷ୍ଟାଇନ କର୍ମଚାରୀଙ୍କ ଉପରେ ନିର୍ଭର କରେ। ଶ୍ରମିକ ଅଭାବକୁ ଦୂର କରିବା ପାଇଁ ଇସ୍ରାଏଲ ଅନେକ ଦେଶରୁ ସାହାଯ୍ୟ ଲୋଡିଛି। ଭାରତରୁ ୧ ଲକ୍ଷ ଶ୍ରମିକ ପଠାଇବାକୁ ଇସ୍ରାଏଲ କହିଛି। ଏହି କ୍ରମରେ ହରିୟାଣା ସରକାର ଇସ୍ରାଏଲର ସର୍ତ୍ତ ଗ୍ରହଣ କରି ୧୦ ହଜାର ଶ୍ରମିକ ପଠାଇବା ପାଇଁ ଏକ ବିଜ୍ଞାପନ ଜାରି କରିଛନ୍ତି।
