ତ୍ରିନିଦାଦ,୨୫।୭: ପୋର୍ଟ ଅଫ ସ୍ପେନରେ ୱେଷ୍ଟଇଣ୍ଡିଜ ବିପକ୍ଷରେ ଖେଳାଯାଉଥିବା ଦ୍ୱିତୀୟ ତଥା ଅନ୍ତିମ ଟେଷ୍ଟ ମ୍ୟାଚ ଡ୍ର’ ରହିଛି। ଏହି ମ୍ୟାଚ୍ରେ ହୃଦୟ ଜିଣିଛନ୍ତି ଭାରତୀୟ ଉଇକେଟ କିପର ବ୍ୟାଟ୍ସମ୍ୟାନ ଇଶାନ କିଶନ। ଏହି ମ୍ୟାଚରେ କିଶାନ ମାତ୍ର ୩୩ ବଲରେ ନିଜର ପ୍ରଥମ ଟେଷ୍ଟ ଅର୍ଦ୍ଧଶତକ ପୂରଣ କରିଥିଲେ। ସେ ଖେଳୁଥିବା ବ୍ୟାଟ୍ରେ ଭାରତର ଅନ୍ୟ ଜଣେ ଉଇକେଟ୍ କିପର ରିଷଭ ପନ୍ତଙ୍କ ନାଁ ଲେଖାଥିଲା। ଇନିଂସ ପରେ ଇଶାନ ମଧ୍ୟ ନିଜ ଆକ୍ରମଣାତ୍ମକ ବ୍ୟାଟିଂ ପାଇଁ ପନ୍ତଙ୍କୁ ଧନ୍ୟବାଦ ଦେଇଥିଲେ। ପନ୍ତଙ୍କ ଉପଦେଶ ମାନି ସେ ଏଭଳି ଇନିଂସ ଖେଳିଛନ୍ତି ବୋଲି କହିଥିଲେ। ଇଶାନ ଏବଂ ପନ୍ତଙ୍କ ମଧ୍ୟରେ ଅନେକ ସମାନତା ଅଛି । ଉଭୟ ଉଇକେଟ ରକ୍ଷକ ଅଟନ୍ତି। ଉଭୟ ବାମ ହାତରେ ବ୍ୟାଟିଂ କରନ୍ତି। ଏବଂ ଉଭୟ ଖେଳିବାର ଉପାୟ ଆକ୍ରମଣାତ୍ମକ ଅଟେ ।
କିଶାନ ବ୍ୟାଟିଂ କରୁଥିବାବେଳେ ପନ୍ତଙ୍କ ଶୈଳୀରେ ଗୋଟିଏ ହାତରେ ସିଧାସଳଖ ଛକା ମାରି ନିଜର ଅର୍ଦ୍ଧଶତକ ପୂରଣ କରିଥିଲେ। କିଶାନଙ୍କ ଏହି ଫଟୋ ଭାଇରାଲ ହେବାରେ ଲାଗିଛି। ଏଥିରେ ଦୃଶ୍ୟମାନ ହେଉଛି ଯେ, ତାଙ୍କ ବ୍ୟାଟ ଉପରେ ‘ଆରପି୧୭’ ଲେଖାଯାଇଛି। ଏହା ହେଉଛି ରିଷଭ ପନ୍ତଙ୍କ ନାମ ଏବଂ ତାଙ୍କ ଜର୍ସି ନମ୍ବରର ପ୍ରଥମ ଅକ୍ଷର। ଗତ ବର୍ଷ ଏକ କାର ଦୁର୍ଘଟଣାରେ ଆହତ ହେବା ପରେ ପନ୍ତ ଏବେ ବିଶ୍ରାମ ନେଉଛନ୍ତି।
