ଲକ୍ଷ୍ନୌ,୭।୧୦: ଟି-୨୦ କ୍ରିକେଟ୍ରେ ଭାରତୀୟ ଦଳର ଫିଲ୍ଡିଂକୁ ନେଇ ଅନେକ ସମୟରେ ପ୍ରଶ୍ନ ଉଠିଥାଏ। ବିଶେଷକରି କ୍ୟାଚ ଧରିବା ମାମଲାରେ ଭାରତର ରେକର୍ଡ ଆହୁରି ଉନ୍ନତ ହେବାର ଆବଶ୍ୟକତା ରହିଛି। କିନ୍ତୁ ୱେଷ୍ଟଇଣ୍ଡିଜ ବିପକ୍ଷ ପ୍ରଥମ ଟି-୨୦ରେ ଇଶାନ କିଶନ ଏଭଳି ଏକ ଚମତ୍କାର କ୍ୟାଚ ଧରିଛନ୍ତି, ଯାହାକୁ ଦେଖି ଫ୍ୟାନ୍ସଙ୍କ ସହ ନିଜେ ଇଶାନ ମଧ୍ୟ ଆଶ୍ଚର୍ଯ୍ୟ ହୋଇଯାଇଥିଲେ।
ଇଶାନଙ୍କ ଏହି ଅବିଶ୍ୱସନୀୟ କ୍ୟାଚ୍ର ଭିଡିଓ ବିସିସିଆଇ ପକ୍ଷରୁ ସୋସିଆଲ ମିଡିଆରେ ସେୟାର କରାଯାଇଛି। ଭିଡିଓ ଦେଖିବା ପରେ ଫ୍ୟାନ୍ସଙ୍କୁ ମଧ୍ୟ ନିଜ ଆଖିକୁ ବିଶ୍ୱାସ କରିବା କଷ୍ଟକର ହୋଇପଡ଼ିଛି। ଏହି ଚମତ୍କାର କ୍ୟାଚ ୱେଷ୍ଟଇଣ୍ଡିଜ ଇନିଂସର ୧୫ତମ ଓଭରରେ ଦେଖିବାକୁ ମିଳିଥିଲା। ବୋଲିଂ କରୁଥିଲେ କୁଲଦୀପ ଯାଦବ। ଓଭରର ପଞ୍ଚମ ବଲ୍ଟି ୱେଷ୍ଟଇଣ୍ଡିଜ ବ୍ୟାଟର ମାଥ୍ୟୁ ଫୋର୍ଡେ ମିଡଉଇକେଟ ଆଡ଼କୁ ଜୋରଦାର ଫ୍ଲାଟ ଶଟ ଖେଳିଥିଲେ।
ବଲ୍ଟି ସହଜରେ ବାଉଣ୍ଡାରୀ ପାର ହୋଇଯିବ ବୋଲି ଲାଗୁଥିଲା। କିନ୍ତୁ ସେତେବେଳେ ମିଡଉଇକେଟରେ ଫିଲ୍ଡିଂ କରୁଥିବା ଇଶାନ କିଶନ ବାମପଟକୁ ଦ୍ରୁତ ଦୌଡ଼ି ଆସିଥିଲେ। ଏହାପରେ ଡ୍ରାଇଭ ମାରି ଏକ ହାତରେ ବଲ୍ଟିକୁ ଧରି ନେଇଥିଲେ।
କ୍ୟାଚ ଧରିବା ପରେ ଇଶାନ ଘାସ ଉପରେ ଫିସଳି ବାଉଣ୍ଡାରୀ ରୋପ ଆଡ଼କୁ ଯାଇଥିଲେ। ତେବେ ବାଉଣ୍ଡାରୀ ପୂର୍ବରୁ ନିଜକୁ ରୋକିବାରେ ସଫଳ ହୋଇଥିଲେ। କ୍ୟାଚ୍ରେ ଧରିବା ପରେ ଇଶାନଙ୍କ ମୁହଁରେ ଥିବା ଆଶ୍ଚର୍ଯ୍ୟର ଭାବ ମଧ୍ୟ ଚର୍ଚ୍ଚାରେ ରହିଛି। ଯେପରି ନିଜେ ମଧ୍ୟ ବିଶ୍ୱାସ କରିପାରୁ ନ ଥିଲେ ଯେ ବଲ୍ଟି ତାଙ୍କ ହାତରେ କିପରି ଆସିଗଲା! ଭାରତୀୟ ବୋଲରଙ୍କ ଦମଦାର ପ୍ରଦର୍ଶନ ଏବଂ ଚମତ୍କାର ଫିଲ୍ଡିଂ ଯୋଗୁ ୱେଷ୍ଟଇଣ୍ଡିଜ ୨୦ ଓଭର ମଧ୍ୟ ଖେଳିପାରି ନ ଥିଲା। ଲକ୍ଷ୍ନୌରେ କ୍ୟାରିବିଆନ ଦଳ ୧୯.୧ ଓଭରରେ ୧୭୧ ରନ୍ରେ ଅଲଆଉଟ ହୋଇଥିଲା।
ୱେଷ୍ଟଇଣ୍ଡିଜ ଅଧିନାୟକ ଶାଇ ହୋପ ୩୭ ବଲ୍ରେ ୫୨ ରନ କରିଥିବା ବେଳେ ଶେରଫେନ ରଦରଫୋର୍ଡ ୩୪ ବଲ୍ରେ ୫୬ ରନ୍ର ଧମାକାଦାର ଇନିଂସ ଖେଳିଥିଲେ। ଡେବ୍ୟୁ ମ୍ୟାଚ ଖେଳୁଥିବା ନମନ ଧୀର ଭାରତ ପକ୍ଷରୁ ସଫଳତମ ବୋଲର ହୋଇଥିଲେ। ସେ ୪ ଓଭରରେ ମାତ୍ର ୩୧ ରନ ଦେଇ ୩ଟି ଉଇକେଟ ନେଇଥିଲେ। କୁଲଦୀପ ଯାଦବ ଓ ଅକ୍ଷର ପଟେଲଙ୍କୁ ୨ଟି ଲେଖାଏ ଉଇକେଟ ମିଳିଥିବା ବେଳେ ମୟଙ୍କ ଯାଦବ ଓ ଅର୍ଶଦୀପ ସିଂହ ଗୋଟିଏ ଲେଖାଏ ଉଇକେଟ ନେଇଥିଲେ। ଇଶାନ କିଶନଙ୍କ ଏହି ଅସାଧାରଣ କ୍ୟାଚ ସହ ଭାରତୀୟ ଫିଲ୍ଡିଂର ଏହି ମ୍ୟାଚ୍ର ଦୃଶ୍ୟ ଏବେ ଚର୍ଚ୍ଚାର କେନ୍ଦ୍ରରେ ରହିଛି।
Reflexes and awareness 👌
Reaction 👉 😮 😅What a grab by Ishan Kishan!
Updates ▶️ https://t.co/2czVyKWreK
#TeamIndia | #INDvWI | @mflone_ | @ishankishan51 https://t.co/PaAI9sUD1p
— BCCI (@BCCI) October 6, 2026