ନୂଆଦିଲ୍ଲୀ,୭।୧୦: ଜିନ୍ଜିଆଙ୍ଗରେ ଚାଇନା ସରକାରଙ୍କ ମାନବାଧିକାର ଉଲ୍ଲଂଘନ ମାମଲାରେ ୟୁଏନ୍ଏଚ୍ଆର୍ସିରେ ମତଦାନ ଅନୁଷ୍ଠିତ ହେବାର ଥିଲା। କିନ୍ତୁ ଚାଇନା ବିରୋଧରେ ଆଗତ ପ୍ରସ୍ତାବ ଉପରେ ଭୋଟ ଦେବାରୁ ଭାରତ ନିବୃତ୍ତ ରହିଥିଲା। ଏହାକୁ ନେଇ ଏବେ ରାଜନୀତି ଜୋର୍ ଧରିଛି। କଂଗ୍ରେସ ନେତା ମନୀଷ ତିଓ୍ବାରୀଙ୍କ ପରେ ଏବେ ଏହି ପ୍ରସଙ୍ଗରେ ଏଆଇଏମ୍ଆଇଏମ୍ ମୁଖ୍ୟ ଅସଦୁଦ୍ଦିନ ଓଓ୍ବାଇସି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଟାର୍ଗେଟ କରିଛନ୍ତି। ମୋଦି ଚାଇନା ରାଷ୍ଟ୍ରପତି ସି ଜିନ୍ପିଙ୍ଗଙ୍କୁ ଡରୁଛନ୍ତି କି ବୋଲି ସେ ପ୍ରଶ୍ନ କରିଛନ୍ତି।
ପ୍ରଧାନମନ୍ତ୍ରୀ ୟୁଏନ୍ଏଚ୍ଆର୍ସିରେ ଉଇଘର ମୁସଲମାନଙ୍କୁ ନେଇ ଆଗତ ପ୍ରସ୍ତାବରେ ଗୁରୁତ୍ୱପୂର୍ଣ୍ଣ ଭୋଟ ଦେବାଠାରୁ ଦୂରେଇ ରହିବା ଠିକ୍ ବୋଲି ବାଛିଛନ୍ତି। ଏହାର କାରଣ ମୋଦି ବାଖ୍ୟା କରିବେ କି? ସେ ଜିନ୍ପିଙ୍ଗଙ୍କୁ ଅପମାନିତ କରିବାକୁ ଏତେ ଭୟ କରୁଛନ୍ତି, ଯାହାଙ୍କୁ ସେ ୧୮ ଥର ଭେଟିଛନ୍ତି, କ’ଣ ଭାରତ ସତ୍ୟ ପାଇଁ ଛିଡ଼ା ହୋଇପାରିବ ନାହିଁ ବୋଲି ଓଓ୍ବାଇସି ପ୍ରଶ୍ନ କରିଛନ୍ତି।
Will the PM Modi saheb explain the reason for India’s decision to help China out in the UNHRC on the Uighur issue by choosing to abstain from an important vote? Is he so scared of offending Xi Jingping, whom he met 18 times, that India can’t speak for what is right? https://t.co/TJNy3Ffn2w
— Asaduddin Owaisi (@asadowaisi) October 7, 2022
ପ୍ରକାଶ ଯେ, ଚାଇନାରେ ଉଇଘର ମୁସଲମାନଙ୍କୁ ଗତ କିଛିବର୍ଷ ଧରି ଚରମ ନିର୍ଯାତନା ଦିଆଯାଉଛି। ଏପରିକି ପ୍ରାୟ ୧୦ ଲକ୍ଷରୁ ଅଧିକ ମୁସଲମାନଙ୍କୁ ବନ୍ଦି କରି ରଖାଯାଇଥିବା ଅଭିଯୋଗ ହୋଇଆସୁଛି। ଏହି ଘଟଣା ଉପରେ ମାନବ ଅଧିକାର ଗୋଷ୍ଠୀ ବର୍ଷ ବର୍ଷ ଧରି ସ୍ବର ଉତ୍ତୋଳନ କରିଆସୁଛନ୍ତି। ମାତ୍ର ଚାଇନା ଏହାକୁ ଅସ୍ବୀକାର କରୁଛି। ଶୁକ୍ରବାର ଏନେଇ ଆଗତ ପ୍ରସ୍ତାବକୁ ନେଇ ୪୭ ସଦସ୍ୟ ବିଶିଷ୍ଟ ପରିଷଦରେ ଭୋଟ ଆଗତ କରାଯାଇଥିଲା। ପ୍ରସ୍ତାବ ସପକ୍ଷରେ ୧୭ ଭୋଟ ପଡ଼ିଥିବା ବେଳେ ବିରୋଧରେ ୧୯ ଭୋଟ ପଡ଼ିଛି।
